Read Zotung Chin GENESIS 33 Bible Online

GENESIS 33 - Zotung Chin bible

GENESIS 33

¹Jakob nynh dothung zah Esau te ccungccaw za pali oun ccia hae paw kha a muih. Tukeiccuze imua hae kha Leah, Rachel te seenung lu ning kyakhe a nee hae.

²Seenung hae kha mih ccaaw hae ryte malang khe a nung hae, tukoute Leah te a ccaaw hae, te Rachel te Josef kha nulang kou khe a nung hae.

³Jakob tuh minmin malang khe cceih zah a upaw pe a thua maw laephi kya vae sari a bakhung.

⁴Esau nynh Jakob kha ccuenua zah phang a pom, te Jakob kha myng zah lu ning te a rawkhaekuh hae.

⁵Esau nynh dothung zah nopi hae te ccaaw hae kha he muih tuh, “Namaw kya a um hae paw khuh hum hae mou?” cite khia zah Jakob nynh, “Pachia nynh na seepaw kae kha thawccinawte yn pyapaw ccaaw hae nynh thua hae,” a ci.

⁶Oute seenung hae tuh mih ccaaw hae ryte oun naekuh hae zah a bakhung hae;

⁷Leah tuh a ccaaw hae ryte oun naekuh hae zah a bakhung hae; te nyathyakou kya Josef te Rachel oun naekuh hae zah a bakhung hae.

⁸Esau nynh, “Kae tungkuhpaw aphu hae balyn kha paw suilan mou athua?” cite khia zah Jakob nynh, “Ka bawipaw, na malang maehoynaw ka mue ccaw cite kae saw hae paw nynh thua,” cite a leih.

⁹Thuasalama Esau nynh, “Ka neitaw, phe azaw lan mang ka hoi; na hoipaw kha namaw hanlan nungkuh,” a cipya.

¹⁰Jakob nynh, “Tuhte thua khyh, na malang maehoynaw ka mue zetuh kae pyapaw lasung hynh yn lawpakuh; pawccecize hynhcite maehoynaw he ka mue tuh na mitmae muihpaw hynh Pachia mitmae muihpaw te nynh a loku.

¹¹Namaw kalan kae ccyngpyapaw ka lasung hynh beih yn lawpakuh, Pachia nynh thaw yn ccih zah ka rypaw tynre kha yn pya,” a ci. Jakob nynh Esau kha a soihbia keiccuze Esau nynh khah-e kha a lawku.

¹²Oute Esau nynh, “Cceih ccavae oh sih, kamaw laan ka maw cih,” a ci.

¹³Thuasalama Jakob nynh Esau kha, “Ka bawipaw, imua hae tuh mih thaw azya, tuu hae, miaa hae te vaetua hae tuh mih taw hae ryte ka do-oih lan hae paw nynh thua cipaw kha na ny; arangte eih ka cciakhae hae zetuh sahiin hae hynh nin kheit mawte pong chih cih hae.

¹⁴Tukeiccuze ka bawipaw, nang tuh ka malang la cceihlo, kae tuh ka malang umpaw sahiin hae te imua hae nynh a ccia kho hae thyhte ka bawipaw na umnaw Seir ram kae thua makhia byabyate kae cciakhae cih hae,” a ci.

¹⁵Te Esau nynh, “Ka kya umpaw ccungccaw abang hynh na kyakhe kae cciataw hae sah,” a ci. Thuasalama Jakob nynh, “Pawccemou ka bawipaw nang nynh ka tungvaw hynhcih baban na hoy?” a ci.

¹⁶Te Esau tuh tuh-e nin khe Seir ram lang bua a ki.

¹⁷Jakob tuh Sukkoth[40] lang cceih zah amaw hanlan inn te a sahiin hae hanlan bu kha a sak; tukeiccuze tuh-e hmin tuh Sukkoth a ci hae.

¹⁸Jakob tuh Mesopotamia ram kyate yn ki zah Kanaan ram umpaw Shekhem khua kya khyndadyh lante a thua; te tuh-e khua malang khe bu kha a sakku.

¹⁹Te Shekhem paaw Hamor a ccapaw hae kyate bu a saknawpaw laephi hmin kha ngunphua za kheit te a re.

²⁰Tuin kyakhe silawhang kha rae zah El, Elohe-Israel[41] cite min a phu.