Read Zotung Chin GENESIS 34 Bible Online

GENESIS 34 - Zotung Chin bible

GENESIS 34

¹Jakob te Leah nynh a saah hae paw mih ccanung Dinah tuh tuh-e ram kya umpaw nopi hae kalan a paebua.

²Tuh-e ram kyaze bawi athuapaw, Hiv minphuinpaw Hamor ccapaw Shekhem nynh Dinah kha he a muih tuh kyngdete ikhae zah a thethyasah.

³Te a thinlung tuh Jakob ccanung Dinah kyakhe phang a um; aning nynh liaccanung kha sungsah zah nebaleih lante bya leih a beih.

⁴Shekhem nynh a paaw Hamor kha, “E liaccanung hynh ka zu lang yn dypah,” a cipya.

⁵Jakob nynh a ccanung Dinah kha Shekhem nynh a thethyasah cipaw a ny; thuasalama a ccapaw hae tuh a sahiin hae ryte ramkaw kya a um hae keiccuze Jakob tuh minmin oun thua hae makhia daebabi lan a um.

⁶Te Shekhem paaw Hamor tuh Jakob te byahoku khylan cceih zah

⁷tuh lyatuin Jakob ccapaw hae tuh ramkaw kyate la thua hae. Shekhem nynh Jakob ccanung kha ikhae zah Israel minphuin kya ahoy leipaw, cyi lan accan leipaw kha a cyi keiccuze minmin tuh mih thinlungccih zah myarya mih thinria.

⁸Hamor nynh minmin kyakhe, “Ka ccapaw Shekhem nynh nae ccanung kha a sungsah; tukeiccuze a zu lang beih pya oh.

⁹Nanning nynh kaening te zudykunaw kha rae oh lah nae ccanung hae kha zu lang oun pya oh, te kae ccanung hae hynh mah zu lang dykuh oh.

¹⁰Nanning tuh kaening kya umbua oh lah, e ram tuh nanning elang ua athua cih, e ram kya khuasah oh lah kungkunaw kha rae oh, te na hoi oh paw uccaw tuh nae uccaw lang a tang cih,” a ci.

¹¹Shekhem nynh Dinah a paaw te a raee hae kyakhe, “Ngaethya oun umsah oh lah, na ho oh paw miakaw kae pya cih oh.

¹²Lasung te mee zemah na ry oh zeihte hokuh oh lah nae ngia oh paw miakaw kae pya cih oh; liaccanung rou kha ka zu lang oun pya oh,” a cipya hae.

¹³Shekhem nynh mih ccianung Dinah kha a thethyasah keiccuze Jakob ccaaw hae nynh Shekhem te a paaw Hamor kha lingpaw bya te a leih hae.

¹⁴Jakob ccaaw hae nynh, “Kae ccianung tuh vingdungawkuh leipaw kalan kae pya kho khyh, pawccecize kae pya zetuh kaening kha the oun thyasah cih.

¹⁵Kae nawccaw kho nawlan ccangkheit kyalya um zah tuh-e tuh: nanning nynh kaening hawte pise miakaw vingdung na awkuh cih oh.

¹⁶Tuhteze nynh kae ccianung hae kha nae zu lang kae pya cih oh zah nae ccianung hae kha zu lang kae dykuh cih, te nanning kya kae umbua cih zah minphuin phuin kheit lang ah tang cih oh.

¹⁷Thuasalama kae bya kha na ngae khyh oh zah vingdung na awkuh khyh oh zetuh kae ccanung kha kae ko cih zah kae cceih vae cih,” a ci hae.

¹⁸Mih bya tuh Hamor te a ccapaw Shekhem nynh mih nawccah.

¹⁹Te ccangvaepaw tuh Jakob ccanung kha a lungrythua zah cyi lanpaw kha arangte a cyi vae. Aning tuh a innbyn hae balyn kyaze sawtua lan um huapaw nynh thua.

²⁰Oute Hamor te a ccapaw Shekhem nynh mih khua koikua tungkunaw hmin kalan cceih hae zah mih khuaccaaw hae kyakhe,

²¹“E ccungccaw hae tuh aening te ccawku lan a um hae; ah ram kya khuasah hae sah lah kungku hae sah, pawccecize ah ram tuh minmin hanlan mah phe azawbia; mih ccanung hae kha zu lang dy oh sih lah ah ccanung hae kha mah zu lang dy hae sah.

²²Thuasalama minmin nynh vingdung a awku hae hawte aening pise miakaw vingdung ah awku oh ze rou nynh aening ryte umkheih lan te minphuin phuin kheit lang tang lang mih nawccah cih.

²³Minmin kya-e sahiin hae, sisua te sahiin-awvaw balyn tuh aening uccaw lang a tang cih khaw? Minmin rynaw kha ah nawccaw ze rou nynh aening kya a umbua cih hae,” a ci hae.

²⁴Hamor te a ccapaw Shekhem nynh a ho hae paw kha a khua koikua kyate a pou hae paw balyn nynh mih nawccah zah pise miakaw tuh vingdung a awkuh vae hae.

²⁵Tukoute nin thumnaw kya mih vaemaw a cci lyakhe Jakob ccaaw hae lu ning Simeon te Levi, Dinah a raee hae nynh mih thaloi hae kha lawkuh hae zah aphirute tuh-e khua lungkhu lang tee hae zah pise balyn kha pong a chia hae.

²⁶Hamor te a ccapaw Shekhem kha thaloi te phe a chia hae, te Dinah kha Shekhem inn kyate ko hae zah a cciakhae hae.

²⁷Mih ccianung tuh a thethya vae keiccuze ccangpaw Jakob ccaaw hae nynh a chia vae hae paw ccungccaw hae kalan cceih hae zah, khua kha thiing hae zah

²⁸mih sahiin hae, mih lann hae, te khua kya te loo kya umpaw atyn-are kha phe lawpya hae.

²⁹Mih sisua balyn, mih ccaaw hae balyn te mih zu hae, inn kya umpaw balyn kha pong lua hae zah a cciakhae hae.

³⁰Oute Jakob nynh Simeon te Levi kha, “E ram kya umpaw Kanaan hae te Periz hae nynh kamaw kha nae huasah vae oh keiccuze vawsawnaw nae thuakhaepya vae oh; ka ccungccaw hae tuh a zya hae, te minmin nynh sueluakuh hae zah kamaw kha rawsete oun tuk hae zetuh kamaw te ka innbyn hae tuh kae chih vae cih,” a cipya hae.

³¹Thuasalama minmin nynh, “Kae ccianung tuh ohhuanung hawte cyisah lan accan tou?” a ci hae.