Read Zotung Chin GENESIS 39 Bible Online

GENESIS 39 - Zotung Chin bible

GENESIS 39

¹Josef kha Izip ram lang a cciakhae hae, te Izip ccungccapaw Potifar cikuhpaw, Faro kya-e bawi lu kheit, siapharan inn a do-oihtu hae mih bawi a thuapaw nynh Izip ram lang a cciakhaetu hae Ishmael hae kyate Josef kha a re.

²BAWIPAW nynh Josef kha umkhae zah ahangkuhpaw ccungccaw lang a tang; te a bawipaw Izip ccungccapaw inn kya a um.

³BAWIPAW nynh Josef kha umkhae zah a cyipaw balyn kyakhe BAWIPAW nynh a laansui a uasahpya cipaw kha a bawipaw nynh a muih.

⁴Tukeiccuze Josef tuh a bawipaw malang maehoynaw mue zah a bawipaw nynh a sungsah keiccuze a ryalawpahtu lang a nung; Potifar nynh Josef kha a inn uktu lang nung zah a hoipaw balyn kha a do-oihtu lang a nung.

⁵A inn te a hoipaw balyn kha a do-oihtu lang he a nung ccyh kyate BAWIPAW nynh Josef liate Izip paw a inn kha hythua a pya; BAWIPAW hythuanaw tuh Potifar a hoipaw balyn kya, a inn te a loo kya a um.

⁶Tukeiccuze Potifar nynh a hoipaw balyn kha Josef kuih kya pong ap zah amaw a aepaw looh holeite tuh ccangpaw pawpaw hanlan mah a peki vae khyh. Josef tuh a pynrua hoy zah a puithya.

⁷Tukoute a bawipaw zu nynh Josef kha ry zah, “Kamaw te ihkheih sih,” a cipya.

⁸Thuasalama Josef nynh ei zah a bawipaw zu kha, “Hein kya ka um zah ka bawipaw nynh a inn kya umpaw pawpaw mah peki leite a uccaw tynre kha ka kuih kya yn ap vae.

⁹E inn kya kamaw laeze ale huapaw um vae khyh, a zu na thuapaw nang holeite tuh pawpaw mah kaw yn khyasah leipaw um khyh. Pawtemou e hoyleinaw alepaw kha raete Pachia a rawsepaw seinaw kha pharung ka rae kho cih?” a ci.

¹⁰Te a bawinung nynh Josef kha nin kheit koute nin kheit soih salamah Josef nynh ikheih, umkheih lanpaw kha a nawccah khyh.

¹¹Nin kheit tuh, inn kya lu kheit sanmah a um khyh lyakhe Josef nynh ryalaw lan inn lungkhu lang he a tee tuh,

¹²A bawinung nynh Josef a boeining kha phang kyng zah, “Oun ikhae!” a cipya. Thuasalama Josef nynh a boeining kha a bawinung kuih kya ccuetaw zah atolang po a ccue vae.

¹³Josef nynh a kuih kya a boeining kha cciataw zah atolang a ccuepaw kha a bawinung nynh he a muih tuh,

¹⁴a inn um hae paw kha ko hae zah, “Do oh, ka vawpaw nynh e Hebru paw hynh aening kha dothatheih khylan aening kalan yn thuakhae! Aning nynh kamaw kha ikhae lan yn teenua zah kae nynh thawte ka sia;

¹⁵aning nynh thawte ka siapaw roi kha he thae tuh, a boeining kha ka pe khe ccuetaw zah atolang po ccue vae,” a ci.

¹⁶Oute a bawipaw innvaw yn thua mawlaezung a bawinung nynh Josef boeining kha a pe khe phang a nung.

¹⁷te a bawipaw innvaw he yn thua tuh a bawinung nynh a la ho vae hawkhate a vawpaw kyakhe, “Aening kalan nae thuakhaepaw Hebru seepaw nynh kamaw kha yn dothatheih zah yn teenua;

¹⁸thuasalama thawte he ka sia tuh, a boeining kha ka pe khe ccuetaw zah atolang po ccue vae,” a cipya.

¹⁹“E hynh na seepaw nynh ka tungvaw yn cyisahnaw nynh thua,” cite a zu nynh a hopaw bya kha a bawipaw nynh he thae tuh myarya a thinria.

²⁰Te a bawipaw nynh Josef kha cciakhae zah siapharan kya-e thongccah hae a nungnaw hae thonginn kyakhe a nung, te Josef tuh thong a ccah vae.

²¹Thuasalama BAWIPAW nynh Josef kha umkhae zah atynpaw sungsahnaw kha a muihsah, te thong uktupaw malang maehoynaw kha a pya.

²²Te thonginn lupi nynh thonginn kya umpaw thongccah hae kha Josef kuih kya a ap, te thonginn kya cyi lan accanpaw pawpaw balyn Josef nynh a cyi.

²³Josef nynh a cyipaw miakaw kha thong uktupaw nynh pawpaw mah dothui vae khyh, pawccecize BAWIPAW nynh Josef kha umkhae zah a cyipaw miakaw kha BAWIPAW nynh a laansui a uasahpya.