Read Zotung Chin GENESIS 4 Bible Online

GENESIS 4 - Zotung Chin bible

GENESIS 4

¹Te Adam nynh a zu Evi te ihkheih hae zah Evi tuh ccaaw a poi, te Kain kha saah zah, “BAWIPAW bawmnaw liate ccapise lu kheit ka saah,” a ci.

²Tukoute a neitaw Abel kha a saah. Abel tuh tuurinpaw thua zah Kain tuh loophopaw nynh thua.

³Accyh yn zaw tuh Kain nynh BAWIPAW pya khylan loo kya-e athae kha yn ccyng,

⁴te Abel nynh a tuuphu kyate masaty a than hae paw kya-e athopaw kha a pya. Te BAWIPAW nynh Abel te a pyapaw a uccaw kha a ccoupya,

⁵thuasalama Kain te a pyapaw a uccaw kha ccoupah khyh. Tukeiccuze Kain tuh myarya a thinria zah a mitmae hoy khyh.

⁶BAWIPAW nynh Kain kha, “Pawcce na thinria, pawcce na mitmae hoy khyh?

⁷Ahoypaw kha na rae lanze ccoupya leite um na thua cih zawtou? Te ahoypaw kha na rae khyh lanze seinaw nynh thuakaw kya phang ae buh, seinaw nynh nang kha uk lan ae ry, thuasalama nang nynh seinaw kha na tae lanpaw nynh thua,” a cipya.

⁸Kain nynh a neitaw Abel kha, “Loo lang cceih sih,” a cipya. Te loo kya a um lya hae khe Kain nynh a neitaw Abel kha rawse zah a chia.

⁹Oute BAWIPAW nynh Kain kha, “Na neitaw Abel teimou um?” a ci. Kain nynh, “Ka nyh khyh; kae tuh ka neitaw rintu ka thua zawtou?” a ci.

¹⁰Te BAWIPAW nynh, “Pawmou phe na rae vae? Ngaetua; na neitaw chii nynh laephi kyate kamaw kalan palei a sia!

¹¹Na kuih te na chiapaw na neitaw chii kha zu khylan a khalang a awpaw laephi kyate nang tuh atu thyalaw na thua vae.

¹²Laephi kya rya na law ze pawsang mah ae poupah lan khyh; nang tuh laephi kya a ccuepaw te a khiavuikuhpaw na thua cih,” a ci.

¹³Kain nynh BAWIPAW kha, “Nae pyapaw detahnaw tuh ka ngaesang khonaw laeze alehua!

¹⁴Kae kha laephi kyate atunin nae dee vae zah na mae kha kae muih vae lan khyh; laephi kya a ccuepaw te a khiavuikuhpaw ka thua vae cih, yn muihpaw lukhakheit nynh kae kha yn theih vae cih,” a cipya.

¹⁵Oute BAWIPAW nynh Kain kha, “Tuhte thua khyh! Kain a theihpaw tuh humhung zemah liarunaw leit sari a ing cih,” a ci. Te Kain a muihpaw lukhakheit nynh Kain kha a chia khyh nawlan BAWIPAW nynh Kain kyakhe syntawnaw ccangkheit a rae.

¹⁶Oute Kain tuh BAWIPAW umnaw kyate po pou zah Eden nithua lang umpaw Nod[4] ram kya khua a sah.

¹⁷Kain tuh a zu te a ihkheih hae, te a zu nynh ccaawpoi zah Enok kha a saah; khuapi khuakheit rae zah a min tuh a ccapaw Enok min kha lee zah Enok cite min a phu.

¹⁸Enok nynh Irad kha a saah; te Irad tuh Mehujael a paaw, Mehujael tuh Methusael a paaw, Methusael tuh Lamek a paaw nynh thua.

¹⁹Lamek nynh zu lu ning a hoi; lu kheit min tuh Adah cikuh zah ccangpaw lu kheit min tuh Zillah a cikuh.

²⁰Adah nynh Jabal kha a saah; Jabal tuh bu kya um hae paw te sahiin a kua hae paw mih minpaaw nynh thua.

²¹Jabal a neitaw min tuh Jubal nynh thua; aning tuh tintang a khuathya hae paw te phyly a tuthya hae paw mih minpaaw nynh thua.

²²Zillah nynh Tubal-kain kha a saah, aning tuh sohin te sivawhaelua aphuinphuin a raethyapaw nynh thua. Tubal-kain a ccianung tuh Naamah nynh thua.

²³Lamek nynh a zu hae kha: “Adah te Zillah, ka roi hynh thaetua oh; Lamek zu hae, ka hopaw bya hynh ngaetua oh: Vaemaw yn muihsahpaw ccungccapaw lu kheit kha phe ka chia, kae yn buapaw ccangvae lu kheit kha phe ka chia.

²⁴Kain a theihpaw kha leih sari te liaru athua lanze Lamek a theihpaw tuh sung sari leit sari te liaru athua cih,” a ci.

²⁵Te Adam nynh a zu te bua a ihkheih hae, te aning nynh ccapaw lu kheit saah zah Seth cite min a phu, pawccecize aning nynh, “Kain nynh a chiapaw Abel ccelang ccangpaw ccapaw kha Pachia nynh yn khangpya vae,” a ci.

²⁶Seth nynh ccapaw lu kheit saah zah Enosh cite min a phu. Tuh-e ccyh lya ccungccaw hae nynh BAWIPAW min kha mangte a beik takaw hae.