Read Zotung Chin GENESIS 40 Bible Online

GENESIS 40 - Zotung Chin bible

GENESIS 40

¹Tukoute ccyh sohsoh aro tuh Izip siapharan banang kyngtu bawi te sanlou raetu bawi nynh mih bawipaw Izip siapharan tungvaw a sei hae.

²Faro siapharan tuh banang kyngtu bawi te sanlou raetu bawi, tuh-e lu ning tungvaw a thinria zah

³Josef thong a sawnaw hae siapharan inn rintu bawi a inn kyakhe minmin kha thong a sawbua hae.

⁴Siapharan inn rintu bawi nynh Josef kha minmin hanlan ryalawpahtu lang khang zah Josef nynh rya a lawpya hae; te minmin kha khaw cia thong a saw hae.

⁵Zi kheit tuh tuh-e thongccah hae paw Izip siapharan banang kyngtu bawi te sanlou raetu bawi nynh mimaw raveihte asuilan um kalang paw maan kha a sah kalang hae.

⁶Awkhua khe Josef nynh minmin kalan he thua tuh, mih lungriathaepaw kha a muih hae.

⁷Josef nynh a bawipaw inn kya thongccahkheih hae paw Faro kya-e ryalahtu bawi hae kha, “Pawcce atunin nae mitmae hoy khyh rei?” cite a khia hae.

⁸Minmin nynh Josef kha, “Maan kae sah zah oun leihpah khotu lu kheit sanmah um khyh,” a ci hae. Te Josef nynh, “Maan leih khonaw tuh Pachia te sekuh khyh tou? Nae maan tuh yn hopya tua oh,” a cipya hae.

⁹Tukeiccuze banang kyngtu bawi nynh a maan kha Josef kalan hynhte a hopya: “Ka maan ze ka malang hin misu ku kukheit a la um,

¹⁰tuh-e misu ku kyatuin aran ran thum a um. A naw he yn toih tuh a paw kha palou yn paw zah a thae tuh palou yn thae vae.

¹¹Faro banang tuh ka kuih kya ka ccyng, te misu thae kha ka lo zah Faro banang lungkhu kya ka su koute Faro kuih kya ka pya,” a ci.

¹²Oute Josef nynh, “Na maan asuilan tuh hynhte nynh thua: Misu aran ran thum tuh nin thum cipaw nynh thua;

¹³Nin thum lungkhu Faro nynh thong kyate ae pousah cih zah langmaw na ryalaw kha bua ae pya cih; te banang kyngtu bawi na la thua lyaze na la cyi hawkhate Faro banang kha a kuih kya bua na pya cih.

¹⁴Tuhte hoynaw he na tung te, kamaw kha ning leite thaw yn ccih lah kamaw kong kha Faro kya beih la hopah vae ii, tuhcite e thonginn kyate yn luesah bua.

¹⁵Accaccingte ho lanze kamaw hynh Hebru ram kyate oun ru hae; e Izip ram kya mah minmin nynh thongsaw lan ciate pawpaw mah ka cyih khyh,” a ci.

¹⁶Maan a leihpaw kha accing cipaw sanlou raetu bawi nynh he a muih tuh, Josef kha, “Kae mah maan ccangkheit ka sah: Ka lu kya sanlou bawng bawngthum ka la khangkuh zah

¹⁷avawlankou umpaw sanlou bawng kyatuin Faro siapharan hanlan sanlou aphuinphuin a um, thuasalama pavaw hae nynh ka lu vawlan umpaw sanlou bawng kya-e kha a la ae hae,” a ci.

¹⁸Te Josef nynh, “Na maan asuilan tuh hynhte nynh thua: Sanlou bawng bawngthum tuh nin thum cipaw nynh thua;

¹⁹nin thum lungkhu Faro siapharan nynh na lu kha ae pae cih. Te na pyn kha thing kya ae sae cih zah pavaw hae nynh na saw kha ae ae cih hae,” a cipya.

²⁰Nin thumnaw nin tuh Faro pui nin thua zah Faro nynh a ryalawpahtu hae hanlan poi a tuapya hae, te banang kyngtu bawi te sanlou raetu bawi kha tuh-e a ryalawpahtu hae malang khe a pousah hae.

²¹Faro nynh banang kyngtu bawi kha langmaw a ryalaw kyakhe bua a nung; te aning nynh banang kha Faro kuih kya a pya;

²²thuasalama Josef nynh maan a leihpya hae hawte sanlou raetu bawi kha theih zah a sae.

²³Tuhzemah banang kyngtu bawi nynh Josef kha liathui leite phe a ning vae.