Read Zotung Chin GENESIS 41 Bible Online

GENESIS 41 - Zotung Chin bible

GENESIS 41

¹Kum ning he aro koute Faro nynh maansah zah a maan kyaze Nal vawpi pe khe a la thadyn,

²te puithya zah athopaw vaetua sa sari tuh vawpi lungkhu te oun pou hae zah vawkhu kin umpaw lonua kha a boukuh hae.

³Tukoute a muinthah zah angethahpaw vaetua sa sari tuh Nal vawpi kyate oun pou hae zah Nal vaw kin kya umpaw masaty e vaetua hae pe khe a la thadyn hae.

⁴A muinthah zah angethahpaw vaetua hae nynh puithya zah athopaw vaetua sa sari kha phe ae hae. Te Faro tuh luih a thaekuh.

⁵Oute Faro nynh ih zah vaeningnaw maan a sah; a maan kyaze accan le zah ahoypaw loohku kya-e avui vui sari tuh ku kheit kyate a lethung hae.

⁶Accan dih zah nithua lang e khisan keiccuze asipaw loohku kya-e avui tuh vui sari a vui hae.

⁷Te accan dihpaw looh avui hae nynh accan le zah ahoypaw looh avui vui sari kha phe a laang hae. Faro nynh he thaekuh tuh a maan nynh thua cipaw a ny.

⁸Khua he yn dae te, Faro tuh a lungriathae; tukeiccuze Izip ram e mitleihthya hae paw te ahaw hae paw balyn kha kosah hae zah Faro nynh a maan kha a hopya hae, thuasalama Faro maan kha a leihpah khopaw lu kheit sanmah um khyh hae.

⁹Oute banang kyngtu bawi nynh Faro kha, “Ka seinaw kha atunin ka nykuh cih.

¹⁰Vaekheit tuh Faro nynh a ryalawpahtu hae tungvaw a thinria zah kae te sanlou raetu bawi kha inn rintu bawi a inn kya-e thonginn kyakhe yn nung.

¹¹Kae te aning nynh zi kheit lungkhu kaemaw raveihte asuilan umpaw maan kha kae sah.

¹²Tuin kya kaening ryte inn rintu bawi a seepaw Hebru ccangvaepaw a umbua. Kae maan kha kae hopah zah kae maan raveih thyhte yn leihpya.

¹³Maan yn leihpya thyhte phe accing; kae nynh langmaw ka ryalaw kha bua ka mue zah sanlou raetupaw kha tuh theih zah a sae,” a ci.

¹⁴Oute Faro nynh Josef kha kosah hae zah Josef tuh thonginn kyate arangte a cciakhae hae. Josef nynh a khawming kha ngokuh zah uccaw a liakuh koute Faro kalan a tee.

¹⁵Te Faro nynh Josef kha, “Maan ccangkheit ka sah zah a leih khopaw lu kheit sanmah um khyh. Maan kha he na thae ze phe na leih kho cipaw ka thae,” a ci.

¹⁶Josef nynh Faro kha, “E tuh kamaw cyi khonaw thua khyh, Pachia nynh nang kha ahoypaw maan asuilan ae pya cih,” a cipya.

¹⁷Tukoute Faro nynh Josef kha, “Ka maan kyaze Nal vawpi kin khe ka la thadyn;

¹⁸te puithya zah athopaw vaetua sa sari tuh Nal vawpi lungkhu te oun pou hae zah vawpi kin kya popaw lonua kha a boukuh hae.

¹⁹Tuh-e vaetua hae malang khe a muinthah zah angethahpaw ccangpaw vaetua sa sari tuh oun pou hae, tuhte amuinthahpaw vaetua hae tuh Izip ram balyn kya ka muih boi khyh.

²⁰Muinthah zah angethahpaw vaetua hae nynh masaty e athopaw vaetua sa sari kha phe a ae hae,

²¹thuasalama he a ae kou hae te, phe a ae vae hae cipaw kha humhung nynh mah nyh khyh, pawccecize minmin tuh atakaw lya hawte mih muinthah mamin. Tukoute luih ka thaekuh vae.

²²Vaeningnaw ka ih zah ka maan kyaze accan le zah ahoypaw loohku kya-e avui vui sari tuh ku kheit kya a lethung hae,

²³tukoute accan dih zah nithua lang e khisan keiccuze asipaw avui vui sari tuh a vui hae;

²⁴te accan dihpaw avui hae nynh accan hoypaw vui sari hae kha phe a laang hae. Tuh-e tuh mitleihthya hae paw kya ka hopah hae zah yn leihpah khopaw lu kheit sanmah um khyh,” a ci.

²⁵Oute Josef nynh Faro kha, “Na maan hae tuh phuin kheit thua zah phe lokuh hae; Pachia nynh a cyi lanpaw kha namaw kya ae langsapyaku vae.

²⁶Ahoypaw vaetua sa sari tuh kum sari thua zah ahoypaw looh avui vui sari tuh mah kum sari cipaw nynh thua; na maan hae tuh ccangkheit nynh thua hae.

²⁷Nulang te oun pou hae paw vaetua a ngethah zah a muinthah hae paw tuh kum sari cipaw nynh thua. Nithua lang e khisan keiccuze asipaw looh avui vui sari tuh mah ccakannaw kum sari cipaw nynh thua.

²⁸Phe kae hopya vae hawte nynh thua; Pachia nynh a cyi lanpaw kha namaw kya ae muihsah.

²⁹Izip ram balyn kya kum sari lungkhu myarya loohvoi cih.

³⁰Tukoute ccakannaw kum sari yn thua cih zah Izip ram kya loohvoinaw balyn kha phe oun ning cih hae; te ccakannaw nynh ram kha yn roh cih.

³¹Oun thua cih paw ccakannaw tuh myarya yn ccih cih keiccuze ram lungkhu looh a la voi boi paw kha oun nyh vae lan khyh hae.

³²Vae ning maan na sahpaw asuilan tuh, e uccaw hynh Pachia nynh phe a khyade vae paw thua zah Pachia nynh taloi yn cyih vae cih cinawpaw nynh thua.

³³Tukeiccuze nang nynh a thya a hawpaw pise lu kheit kha na po cih zah Izip ram a uktu lang na nung cih.

³⁴E ram kya bawi hae kha na khang cih hae zah kum sari loohvoi lungkhu Izip ram kyate a poupaw pum pangaw pum kheit kha na khoisah cih hae.

³⁵Minmin nynh oun thua cih paw ahoypaw kum sari kya-e looh kha ccakhung hae sah lah Faro kawhoinaw zakaw khe nung hae sah. Khuapi kya looh kha suelua hae sah lah phang ccy hae sah.

³⁶Tuh-e looh tuh Izip ram lungkhu yn thua cih paw ccakannaw kum sari lungkhu ae lan ram hanlan nungdaepaw athua cih zah ccakancci lungkhu ram tuh roh vae lan khyh,” a ci.

³⁷Tuh-e bya nynh Faro te a ryalawpahtu balyn kha mih lung a pawsah.

³⁸Faro nynh a ryalawpahtu hae kha, “Pachia muisaw nynh a umkhaepaw ccangpaw lukhakheit, e ccungccapaw tahawpaw hynh ah muih kho ung cih oh tou?” a ci.

³⁹Tukeiccuze Faro nynh Josef kha, “E balyn hynh Pachia nynh nang kha ae muihsah vae keiccuze nang hawte a thya a hawpaw lu kheit sanmah um vae lan khyh.

⁴⁰Nang tuh ka inn uktu na thua cih zah ka ccungccaw hae nynh na bya kha a ngae cih hae; siapharan tungkhung kya ka dahungpaw kyalya hynh nynh nang laeze ka lehuanawpaw athua cih,” a ci.

⁴¹Te Faro nynh Josef kha, “Nang kha Izip ram balyn a uktu lang kae nung vae,” a cipya.

⁴²Faro nynh a tazeih kuihpu kha khahkuh zah Josef kuih kya a pusah; myarya hoypaw boeining kha lawsakuh zah suisi kha a oisah.

⁴³Te siapharan nynh ccangningnaw umpaw a marangle kha ccisakuh zah minmin nynh Josef malang khate, “Nae ccukharutung oh,” cite a sia hae. Tuhcite Faro nynh Izip ram balyn kha a uksah.

⁴⁴Tuhpiaze Faro nynh Josef kha, “Kae tuh Faro siapharan nynh ka thua, Izip ram balyn kya na kaw leite humhung nynh mah a kuih a ccu hang lan khyh,” a cipya.

⁴⁵Faro nynh Josef kha Zafenath-paneah cite min a phu; te On khua e ranpibawi Potifera ccanung Asenath kha Josef zu lang a pya. Tuhcite Josef tuh Izip ram balyn kha uknaw kaw a mue.

⁴⁶Josef nynh Izip siapharan Faro kya ryalaw he a tee lya tuh kum sung thum he acih. Te Josef nynh Faro umnaw kyate pou zah Izip ram balyn kya khua a ccung.

⁴⁷Kum sari loohvoi lungkhu laephi nynh looh myarya lung lan a pousah.

⁴⁸Izip ram kya looh patae he avoi tuh Josef nynh kum sari lungkhu e looh balyn kha suelua zah khua hae kya a ccakhung; khua pepan umpaw loo hae kya-e looh hae kha khua takyh kya a ccakhung.

⁴⁹Josef nynh looh kha rili kya-e laesia hawte myarya alung lan ccakhung zah tou kho um lei lan alung keiccuze tou mah tou vae khyh.

⁵⁰Ccakanccinaw a thua mawkhe Josef nynh On khua e ranpibawi Potifera ccanung Asenath te ccapaw lu ning a saah hae.

⁵¹Josef nynh atawccaw kha Manasseh[48] cite min a phu, “Pawccecize Pachia nynh ka vawsawnaw balyn te ka paaw inn balyn kha phe yn ningsah vae,” a ci.

⁵²Ccapaw lu ningnaw kha Efraim[49] cite min a phu. “Pawccecize vawsaw ka tungnaw ram kyakhe Pachia nynh yn pungzaesah vae,” a ci.

⁵³Izip ram kya loohvoi kum kumsari tuh yn thang vae;

⁵⁴Josef nynh a la ho hawte ccakanccinaw kum sari tuh yn thua vae. Ram takyh kya ccakan accih, thuasalama Izip ram balyn kya tuh looh a um.

⁵⁵Izip ram balyn kya ccakan he yn ccih tuh ccungccaw hae nynh looh mue khylan Faro kalan a sia hae. Faro nynh Izip hae kha, “Josef kalan cceih oh lah ae hopya oh paw kha cyih oh,” a cipya hae.

⁵⁶Te ccakannaw nynh ram balyn kya pong alekuh tuh Josef nynh looh a ccakhungnawpaw ccunginn balyn kha pong hungpah hae zah Izip hae kha a zuapya hae, pawccecize Izip ram kya myarya ccakanccih.

⁵⁷Tuhpiaze laephi vawlan e ccungccaw balyn nynh looh re lan Izip ram e Josef kalan a cceih hae.