Read Zotung Chin GENESIS 42 Bible Online

GENESIS 42 - Zotung Chin bible

GENESIS 42

¹Jakob nynh Izip ram kya looh a um cipaw he thae tuh a ccapaw hae kha, “Pawcce lu kheit te lu kheit phang na doku oh?

²Izip ram kya looh a um cite ka thae; ah hiin nawlan oh, te ah chi khyh nawlan oh, la cceih oh lah looh la re oh,” a cipya hae.

³Tukeiccuze Josef a upaw hae lu haw tuh Izip ram e looh re lan a cceih hae.

⁴Thuasalama Jakob nynh Josef a neitaw Benjamin kha a upaw hae kya cciasah bua khyh, pawccecize Benjamin nynh vawsawnaw a tungsei cih cipaw a thinphang.

⁵Kanaan ram kya ccakancci keiccuze Israel a ccapaw hae tuh looh re lan cceih hae paw mingccang hae ryte oun thuabua hae.

⁶Josef tuh ram uktu thua zah ram lungkhu e ccungccaw balyn elang looh a zuapahtu nynh thua. Te Josef a upaw hae tuh oun thua hae zah Josef malang a bakhung hae.

⁷Josef nynh a upaw hae kha a muih hae tuh phe syntaw hae, thuasalama a nyh leipaw hawte umsakuh zah byarepaw te beih hae zah, “Teitemou nae thua oh?” a ci hae. Minmin nynh, “Looh re lan Kanaan ram te nynh kae thua,” a ci hae.

⁸Josef nynh a upaw hae kha syntaw hae salamah a upaw hae nynh amaw kha syntaw vae khyh hae.

⁹Josef nynh a upaw hae konglang maansahpaw kha liathui zah, “Nanning hynh dophitu hae nynh na thua oh, ram a nyaanawpaw do khylan nae thua oh paw nynh thua,” a cipya hae.

¹⁰Minmin nynh Josef kha, “Thua khyh, kae bawipaw; na see hae hynh looh re lan kae cceihpaw nynh thua.

¹¹Kaening tuh lu kheit ccaaw hae, u te neitaw hae nynh kae thua; a ding hae paw nynh kae thua; na see hae hynh dophitu hae papin kae thua khyh,” a ci hae.

¹²Thuasalama Josef nynh minmin kha, “Thua khyh, nanning hynh ram a ryachinawpaw kha nae do oh paw nynh thua,” a ci.

¹³Minmin nynh, “Na see hae kaening hynh Kanaan ram e lu kheit ccaaw hae, u te neitaw hae kae thua zah uno lu haw lae ning kae cih; asoi huapaw tuh kae paaw te nynh atu a um hae, lu kheit tuh um vae khyh,” a ci hae.

¹⁴Thuasalama Josef nynh minmin kha, “Ka ho vae hawte nynh thua, nanning tuh dophitu hae nynh na thua oh.

¹⁵Nanning kha pawtemou kae syntawtua cih oh ci zetuh: Faro min te bya ka kinku, nae neitaw asoi huapaw kha hein kya yn thua khyh zetuh e hmin kyate na pou lan khyh oh.

¹⁶Nae bya hynh ahme hme khyh cipaw ny nawlan nanning laku e lu kheit nynh cceihsah lah nae neitaw kha yn thuakhae sah, tuhlaepaw tuh thonginn kya na um cih oh; tuhkhyhze tuh Faro min te bya ka kinku, dophitu hae nynh na thua ccaccing oh,” a ci.

¹⁷Te minmin kha thonginn kya nin thum cia pynkheihlan a nung hae.

¹⁸Nin thumnaw nin kya Josef nynh minmin kha, “E hynh cyih oh lah na hiin cih oh, pawccecize Pachia kha ka rih:

¹⁹nanning hynh a dingpaw na thua oh zetuh nanning lakuze lu kheit kha na umnaw oh thonginn kya umsah. Tuhlaepaw tuh nae innbyn kya ccakancci keiccuze looh kha phukute cceih oh lah

²⁰nae neitaw asoi huapaw kha kamaw kalan oun cciakhae oh. Tuhte na cyi oh zetuh nae bya tuh ahmepaw athua cih zah na hiin cih oh,” a cipya hae. Te minmin nynh tuhte cyi lan mih naw a ccah.

²¹Minmin nynh lu kheit te lu kheit kha, “Aening nynh ah neitawpaw tungvaw ah la cyi oh paw hanlan detahnaw ah tung vae oh; aning nynh oun soihbia zah a vawsawnaw mang ah muih oh pite ah ngaepah khyh oh. Tukeiccuze e vawsawnaw hynh ah tungvaw a ccah vae,” a ciku hae.

²²Te Reuben nynh minmin kha, “Imuapaw tungvaw sei nan oh sih cite kae hopah khyh oh tou? Thuasalama na ngae khyh oh. Tukeiccuze amaw a chii keiccuze e vawsawnaw nynh oun thuanua vae,” a ci.

²³A hoku hae paw kha Josef nynh phe a ny cipaw minmin nynh nyh khyh hae, pawccecize Josef nynh byaleihtu kha mang zah bya a hopya hae.

²⁴Josef nynh minmin kyate toikuh zah a rah; tukoute bua yn ki zah minmin kha bya a beih hae. Te Simeon kha ko zah mih malang khe phang a he.

²⁵Josef nynh, “Mih sungkua kya looh kha phe beih lan ruinpah oh, mih phua kha mih lathin sungkua raveih kya na sangpah cih oh zah laanryng hanlan vaelooh kha na pya cih oh,” cite kaw a pya hae. Tuhcite minmin hanlan a cyipya hae.

²⁶Minmin nynh mih lann hae kha looh phusah hae zah a cceih vae hae.

²⁷Khuazi ryanaw hmin kyakhe minmin laku e lu kheit nynh a lann kha aepaw pya lan cite a lathin sungkua kha he phou tuh a phua kha lathin sungkua kyakhe a muih.

²⁸A uno hae kyakhe, “Ka phua kha bua oun nungpya hae; ka sungkua kya phua phang um rei!” a cipya hae. Minmin nynh mih bungzou zah mih rikaw phe thua lante lu kheit te lu kheit kha, “Pachia nynh aening tungvaw a cyipaw hynh paw a rynaw mou thua?” a ciku hae.

²⁹Minmin nynh Kanaan ram e mih paaw Jakob kya he thua hae tuh, mih tungvaw a cyihkuhpaw balyn kha a hopya hae;

³⁰“Ram uktu bawi nynh byarepaw te oun beih zah, ram kya dophitu hae nynh na thua oh, oun ci.

³¹Thuasalama kaening nynh, ‘Kaening tuh a ding hae paw kae thua zah aphirute thongpang lahtu hae kae thua khyh.

³²Kae paaw nynh oun saahkheih paw uno lu haw lae ning nynh kae thua; lu kheit tuh um vae khyh, asoi huapaw tuh kae paaw te Kanaan ram kya nynh atu a umkheih hae,’ kae cipya.

³³Te ram uktu bawi nynh kaening kha, ‘Nanning tuh a ding hae paw nynh na thua oh cipaw ka ny nawlan, nae uno lukhakheit kha kamaw kya cciataw oh, nae innbyn kya ccakancci keiccuze looh kha phukuh oh lah cceih oh.

³⁴Nae neitaw asoi huapaw kha kamaw kalan nae cciakhae cih oh, tetuh nanning hynh a ding hae paw na thua oh zah dophitu hae na thua khyh oh cipaw ka nyh vae cih. Te nae unopaw kha naemaw kalan bua kae sawpah cih oh zah, e ram kya kung na ku cih oh,’ oun cipya,” cite a hopya hae.

³⁵Mih lathin sungkua kya-e looh kha he a boh hae tuh mih phuabu raveih tuh mih lathin sungkua raveih kya ccarou a la um. Minmin te mih paaw nynh mih phuabu hae kha he a muih hae tuh mih rikawthua.

³⁶Te mih paaw Jakob nynh minmin kha, “Nanning nynh kae kha ccaaw leite nae nung vae oh: Josef mah um vae khyh zah Simeon mah um vae khyh, te atu Benjamin mah bua na cciakhae vae cih oh. Hynh-e balyn hynh ka tungvaw acyihkuh vae,” a ci.

³⁷Oute Reuben nynh a paaw kha, “Namaw kalan Benjamin kha bua kae thuakhae khyh zetuh ka ccapaw hae lu ning kha na theih cih hae. Amaw kha ka kuih kya yn ap lah namaw kalan bua kae thuakhae cih,” a cipya.

³⁸Thuasalama a paaw nynh, “Ka ccapaw kha namaw kya cceihbua lan khyh, pawccecize a upaw tuh phe chih vae zah, amaw makhae nynh a um vae. Na ccianaw oh laanryng khe a chisei zetuh nanning nynh ka sang phe paw vae paw hynh ngaethyanaw te michi khua lang nae cciasah sei cih oh,” a ci.