Read Zotung Chin GENESIS 43 Bible Online

GENESIS 43 - Zotung Chin bible

GENESIS 43

¹Kanaan ram kya myarya ccakan accih.

²Izip ram kyate a phu hae paw looh phe thang lan a ae hae tuh mih paaw nynh minmin kha, “Bua la cceih oh lah looh beihtaraw oun re oh,” a cipya hae.

³Thuasalama Judah nynh a paaw kha, “Ccungccapaw nynh, ‘Nae neitawpaw kha nae thuakhae khyh oh zetuh ka mitmae nae muih lan khyh oh,’ cite oun cipah zah, ccaerarih lan raeringnaw oun pya.

⁴Kae neitawpaw kha kaening ryte nae sawpya zetuh kae cceihbung cih zah looh kha kae repah cih;

⁵thuasalama amaw kha nae sawpya khyh zetuh kae cceih lan khyh, pawccecize ccungccapaw nynh, ‘Nae neitawpaw yn cciabua khyh zetuh ka mitmae nae muih lan khyh oh,’ cite oun cipya,” a ci.

⁶Israel nynh, “Ccangpaw neitaw kae hoi ung cite ccungccapaw kha hopyate pawcce kae kha lungriathaenaw nae pya oh?” a ci.

⁷Minmin nynh, “Ccungccapaw nynh kaemaw te kae puizia hae kong kha pekite oun khia zah, ‘Nae paaw a hiin ung tou? Ccangpaw neitaw na hoi ung oh tou?’ cite oun ci. Tuhte bya oun khia keiccu nynh amaw kha kae hopya. ‘Nae neitawpaw kha oun thuakhae oh,’ cite oun ci lanpaw kha kae nyh kho cih zawtou?” a ci hae.

⁸Oute Judah nynh a paaw Israel kha, “Imuapaw hynh kamaw kya cciasah bua lah kae la cceih sah; tuhte rou nynh namaw, kaemaw te kae ccaaw hae hynh ah hiin cih oh zah ah chih lan khyh oh.

⁹Kamaw ccaccei hynh amaw hanlan aamahkhan ka thua cih; amaw hanlan ka tungvaw tavuan yn pya. Amaw kha na kalan ngedante hoyrarih lan bua kae thuakhae khyh zetuh seiphusahnaw kha zungzae ka ing sah.

¹⁰Hynhte accyh kae la sung khyh zetuh, atu hynh vae ning kae leihkuh vae cih paw,” a cipya.

¹¹Oute mih paaw Israel nynh, “Tuhte athua zetuh hynhte cyih oh: Kanaan ram e ahoy huapaw thingthae phin, balm thingphi beihtaraw, khoilutui beihtaraw, ehang kya thungpaw mynkhuhpaw, pistakhio thae, akaloh thaawpaw thingthae te almon thae kha nae sungkua kya sangkuh oh lah tuh-e ccungccapaw hanlan lasung lang la phupah oh.

¹²Phua kha leit ning alung lante phu oh. Nae sungkua kya nae kikhae oh paw phua kha bua la phu oh; a mesei hae paw nynh thua cih.

¹³Nae neitawpaw mah ko oh lah tuh-e ccungccapaw kalan bua la cceih oh;

¹⁴tuh-e ccungccapaw nynh nae uno lu kheit te Benjamin kha bua oun kisahnaw lan hae, Alesaepaw Pachia nynh tuh-e ccungccapaw malang thaw ae la ccih vae oh sah, kae tuh ka ccapaw hae hanlan rawkhui lan accan ze ka rah vae cih latu,” a ci.

¹⁵Minmin nynh lasung, phua leit ning ryte Benjamin kha Izip ram lang cciakhae hae zah Josef malang a thuakhae hae.

¹⁶Josef nynh minmin ryte Benjamin kha he a muih tuh, a inn e ryalahtupaw kyakhe, “Minmin kha inn lungkhu lang teekhae hae lah saw sa kheit theih lah aepaw kha la paccyn; pawccecize minmin ryte ninthu kae aekheih cih,” a cipya.

¹⁷Josef nynh a ho hawte tuh-e ccungccapaw nynh minmin kha Josef inn lang a cciakhae hae.

¹⁸Josef inn lang he cciakhae hae tuh, minmin nynh rih hae zah, “Anuhlang lyaze ah sungkua kya oun kisahkhaeku paw phua keiccu nynh oun teekhae hae. Aening kha seinaw ccungpyate see lang oun tangsah cih zah lann hae kha oun lua cih,” a ciku hae.

¹⁹Tukeiccuze Josef inn kya ryalahtupaw kalan cceih hae zah thuakaw zung kyakhe,

²⁰“Bawipaw, anulang lya looh re lan vaekheit kae thua boi vae,

²¹khuazi ryanaw kya kae thua zah kae sungkua kha he kae phou tuh, kae lathin sungkua kya kae phua raveih kha phe ccing lan a la um. Tuh-e tuh atu bua kae phubia.

²²Tuhpiaze looh re nawlan phua kha alae lante kae phubia. Kae phua kha kae sungkua kya hum nynh mah oun sangpah cipaw kae nyh khyh,” cite a hopya hae.

²³Aning nynh, “Nae lungdaesah, nae thinphang nan sah, nae Pachia te nae paaw a Pachia nynh nae sungkua kya sisua kha ae sangpya oh paw nynh athua cih; nae phua kha phe ka mue,” a ci. Oute Simeon kha minmin kalan khe a thuakhaepya hae.

²⁴Tuh-e paw nynh minmin kha Josef inn lang a cciakhae hae, tui kha pya hae zah mih ccu kha a singku hae, mih lann hae kha mah aepaw a pya hae,

²⁵minmin nynh ninthu ccyh kya yn thua cih paw Josef hanlan lasung kha phe a paccyn ty vae hae, pawccecize minmin nynh tuh-e inn kya ae lan cipaw phe a thae vae hae.

²⁶Josef nynh innvaw he a thua tuh minmin nynh inn lungkhu lang a teekhae hae paw lasung kha ccyngpah hae zah amaw malang khe laekhu kya a bakhung hae.

²⁷Josef nynh minmin kha bya a beih kou hae te, “Na ho oh paw a taw vae paw nae paaw so a dan tou? A hiin ung tou?” cite khia hae zah

²⁸minmin nynh, “Na seepaw kae paaw tuh mang a dan; mang a hiin ung,” a cipya hae. Te minmin nynh mih lu baling hae zah sawtuanaw kha a pya hae.

²⁹Oute Josef nynh ngawdo zah a nung ccapaw, a neitaw Benjamin kha he a muih tuh, “E hynh nae hopya oh paw, nae neitaw asoi huapaw tuh athua tou? Ka ccapaw, Pachia nynh thaw ae ccih vae sah,” a cipya.

³⁰Josef nynh a neitaw kha muih zah myaryamaw a sungsah keiccuze a rawthua zah arangte a toikuh. Te amaw khaan lungkhu lang tee zah a rah.

³¹Oute a maelahkuh koute bua yn pou; te aning nynh phang yhkuh zah, “Aepaw tuh yn paccynpah oh,” a cipya hae.

³²Josef hanlan ccaboi ccangkheit, a upaw hae hanlan ccaboi ccangkheit, te Josef te a aekheih hae paw Izip hae hanlan ccaboi ccangkheit khate aepaw kha a paccyn hae, pawccecize tuh-e tuh Izip hae nynh Hebru hae kha a zawpuinaw hae paw nynh thua.

³³Josef a uno hae kha Josef malang khe atawccaw tahyhte alepaw kyate adihpaw kyacia po a haungsah hae. Tukeiccuze Josef a uno hae nynh mimaw te mimaw kha dokuh hae zah mih ngaeangthua.

³⁴Josef ccaboi kyate minmin kha aepaw a pya hae. Benjamin tuh a upaw hae laeze leit pangaw alunghua lante looh kha a mue. Tuhcite minmin nynh neih hae zah Josef ryte a hoysah hae.