Read Zotung Chin GENESIS 46 Bible Online

GENESIS 46 - Zotung Chin bible

GENESIS 46

¹Israel nynh a hoipaw balyn ryte cceih zah Beersheba kya he a thua tuh, a paaw Isak Pachia kalan silawnaw a rae.

²Pachia nynh Israel kha khuazi vizin kyate, “Jakob, Jakob,” cite ko zah Jakob nynh, “Hein kya mang ka um,” a ci.

³Oute Pachia nynh, “Kae tuh Pachia nynh ka thua, na paaw a Pachia nynh ka thua; Izip ram lang ccia lanpaw kha rih nan, pawccecize tuin kya nang kha minphuin alepaw lang kae rae cih.

⁴Kamaw ccaccei nynh nang kha Izip ram lang kae cciakhae bung cih, te nang kha bua kae kikhae thung cih; Josef nynh a kuih te na mit kha ae masisah cih,” a cipya.

⁵Jakob tuh Beersheba kyate a cceih; te Israel ccapaw hae nynh mih paaw Jakob, mih ccaaw hae te mih zu hae kha Jakob nynh a cciku lan cite Faro nynh a kypaw marangle khate a cciakhae hae.

⁶Minmin nynh Kanaan ram kya a mue hae paw mih sahiin hae te mih uccaw hae ryte Izip ram lang a cceih hae, Jakob nynh a ciihan balyn kha a cciakhae hae:

⁷a ccapaw hae, a ccapaw hae mih ccapaw hae, a ccanung hae, a ccapaw hae mih ccanung hae kha Izip ram lang pong a cciakhae hae.

⁸Izip ram lang a cceih hae paw Israel ciihan hae mih min tuh hynhte nynh thua. Jakob te a ccaaw hae: Jakob a ccatawccaw tuh Reuben,

⁹te Reuben ccapaw hae tuh: Hanok, Pallu, Hezron te Karmi.

¹⁰Simeon ccapaw hae tuh: Jemuel, Jamin, Ohad, Jakhin, Zohar, te Kanaan minphuinnung a ccapaw Shaul.

¹¹Levi ccaaw hae tuh: Gershon, Kohath te Merari.

¹²Judah ccaaw hae tuh: Er, Onan, Shelah, Perez te Zerah (Er te Onan tuh Kanaan ram kya a chih hae). Perez ccaaw hae tuh Hezron te Hamul nynh thua hae.

¹³Isakhar ccaaw hae tuh: Tola, Puvah, Jashub te Shimron.

¹⁴Zebulun ccaaw hae tuh: Sered, Elon, te Jahleel.

¹⁵(E hae hynh a ccanung Dinah ryte Paddan-aram kya Leah nynh Jakob a saahpya hae paw nynh thua; a ccapaw hae te a ccanung hae mih balyn te sung thum lu thum acih hae).

¹⁶Gad ccaaw hae tuh: Zefon, Haggi, Shuni, Ezbon, Eri, Arodi, te Areli.

¹⁷Asher ccaaw hae tuh: Imnah, Ishvah, Ishvi, Beriah, te mih ccianung Serah. Beriah ccaaw hae tuh Heber te Malkhiel

¹⁸(E hae tuh Laban nynh a ccanung Leah a pyapaw Zilpah a ccaaw hae nynh thua; e hae hynh Zilpah nynh Jakob a saahpya hae paw thua zah mih balyn te lu haw lae taruh acih hae).

¹⁹Jakob zu Rachel a ccaaw hae tuh: Josef te Benjamin nynh thua hae.

²⁰Izip ram umpaw On khua e ranpibawi Potifera ccanung Asenath nynh Izip ram kya Josef hanlan Manasseh te Efraim kha a saahpya hae.

²¹Benjamin ccaaw hae tuh: Bela, Bekher, Ashbel, Gera, Naaman, Ehi, Rosh, Muppim, Huppim, te Ard.

²²(E hae hynh Rachel nynh Jakob a saahpya hae paw thua zah mih balynte lu haw lae pali acih hae).

²³Dan ccapaw tuh Hushim nynh thua.

²⁴Naftali ccaaw hae tuh: Jahzeel, Guni, Jezer, te Shillem.

²⁵(E hae tuh Laban nynh a ccanung Rachel a pyapaw Bilhah ccaaw hae nynh thua; e hae hynh Bilhah nynh Jakob a saahpya hae paw thua zah mih balynte lu sari acih hae).

²⁶Jakob monung hae hobia leite, Jakob ryte Izip ram lang cceih hae paw Jakob ciihan hae tuh mih balynte sung taruh lu taruh acih hae.

²⁷Josef nynh Izip ram kya ccapaw lu ning a saah hae; tukeiccuze Izip ram lang cceih hae paw Jakob innbyn hae tuh mih balynte sung sari acih hae.

²⁸Jakob nynh Judah kha Josef kalan Goshen ram lang laanpi do ty khylan malang a saw. Goshen ram kya he a thua hae tuh,

²⁹Josef nynh a marangle kha paccynsah hae zah a paaw Israel kha Goshen ram kya tungku khylan a cceih. A paaw malang he a thua tuh, a paaw kha kui zah khaw cia a rah.

³⁰Israel nynh Josef kha, “Na mitmae kha phe ka muih vae zah na hiin ung cipaw ka ny vae keiccuze atu ka chi zemah pawtua-ung vae khyh,” a ci.

³¹Josef nynh a uno hae te a paaw innbyn hae kha, “Faro kalan ka cceih cih zah, ‘Kanaan ram umpaw ka uno hae te ka paaw innbyn hae tuh kamaw kya oun thua vae hae.

³²Minmin tuh tuurin hae thua hae zah sahiin a kua hae paw nynh thua hae; te mih tuuphu, mih sahiin phu te mih hoipaw balyn kha oun thuakhae hae,’ cite ka hopah cih.

³³Faro nynh he ae ko oh zah, ‘Paw rya mou na law oh?’ cite ae khia oh ze

³⁴‘Na see hae kaening tuh kae minpaaw hae kyate tho zah kae ditaraw lyate atu cia sahiin a kua hae paw nynh kae thua,’ cite na hopah cih oh. Tuhteze tuh Goshen ram kya na um kho cih oh, pawccecize Izip hae tuh tuurin hae paw miakaw kha a hua hae paw nynh thua hae,” a cipya hae.