Read Zotung Chin GENESIS 47 Bible Online

GENESIS 47 - Zotung Chin bible

GENESIS 47

¹Tukeiccuze Josef nynh cceih zah Faro kha, “Ka paaw te ka uno hae tuh mih tuuphu hae te mih vaetua phu hae, a hoi hae paw uccaw balyn ryte Kanaan ram kyate oun thua vae hae; atu Goshen ram kya nynh a um hae,” a cipya.

²A upaw hae laku e lu pangaw kha ko hae zah Faro kalan a cciakhae hae.

³Faro nynh a upaw kha, “Paw ryalaw mou leih na law oh?” cite khia hae zah minmin nynh, “Na see hae kaening tuh kae minpaaw hae hawte tuurin hae nynh kae thua,” a ci hae.

⁴Minmin nynh Faro kha, “E ram kya ramccang ccungccaw hae hawte um khylan kae thua vae; pawccecize Kanaan ram kya myarya ccakancci keiccuze kae sahiin phu hae hanlan ram um vae khyh. Tukeiccuze na see hae kaening hynh Goshen ram kya nae umsah nawlan kae ngiaku,” a cipya hae.

⁵Oute Faro nynh Josef kha, “Na paaw te na uno hae tuh namaw kalan oun thua vae hae.

⁶Izip ram tuh na kuih kya nynh a um; na paaw te na uno hae tuh ram kyaze ahoy huapaw hmin kya khuasah sah hae; Goshen ram kya um hae sah; te minmin lakuze cyi khonaw a hoi hae paw na ny zetuh ka sahiin kuanaw kya uktu hae lang na nung cih hae,” a cipya.

⁷Oute Josef nynh a paaw Jakob kha teekhae zah Faro malang a thuakhae, te Jakob nynh Faro kha hythua a pya.

⁸Faro nynh Jakob kha, “Kum hohzeihmou na cih vae?” cite a khia.

⁹Jakob nynh, “Ka khiavuikunaw hynh za kheit kum sung thum acih vae; ka hiinnaw kum tuh zya salamah kou maw aru. A khiavuikuh hae paw ka minpaaw hae kum asaepaw te touse khinpaw thua khyh,” a cipya.

¹⁰Oute Jakob nynh Faro kha hythuapya zah Faro umnaw kyate a cceih vae.

¹¹Faro nynh kawpya thyhte Josef nynh a paaw te a uno hae kha umnaw pya hae zah Izip ram kyaze ahoy huanaw Rameses ram kha a pya hae.

¹²Te Josef nynh a paaw, a uno hae te a paaw innbyn hae balyn kha milu alung azya thyhte looh a pya hae.

¹³Ccakan myarya acci keiccuze ram balyn kya looh um vae khyh. Ccakan keiccuze Izip ram te Kanaan ram tuh mih thaw azya.

¹⁴Josef nynh Izip ram te Kanaan ram kya-e looh a renaw hae paw phua balyn kha suelua zah Faro siapharan inn lang a cciakhae.

¹⁵Izip ram te Kanaan ram kya-e phua kha pong a mang hae tuh Izip hae balyn nynh Josef kalan cceih hae zah, “Looh oun pyatua! Pawcce na muihnaw kya kae chih cih? Pawccecize kae phua phe thang vae,” a cipya hae.

¹⁶Te Josef nynh, “Nae phua athang vae ze, nae sahiin hae kha oun pya oh, nae sahiin hae khate looh kha oun rulaekuh oh,” a cipya hae.

¹⁷Tukeiccuze minmin nynh mih sahiin hae kha Josef kalan a cciakhae hae; Josef nynh minmin kya-e marang hae, tuu hae, miaa hae, vaetua hae te lann hae khate looh kha a rulaesakuh hae. Tuh-e kum kya Josef nynh mih sahiin balyn khate looh kha a rulaesakuh hae.

¹⁸Tuh-e kum thang zah khuavae he thua tuh, minmin nynh Josef kalan cceih hae zah, “Kae phua kha pong kae mang vae cipaw kae bawipaw namaw kha kae phei kho lan khyh, kae sahiin hae tuh namaw kya-e nynh athua vae. Namaw malang kae pyn te kae laephi laelan tuh pawpaw mah umlae vae khyh.

¹⁹Kaemaw te kae laephi parouhte na muihnaw kya kae chih vae cih tou? Kaemaw te kae laephi hynh looh te oun re. Kaening nynh kae laephi ryte Faro see lang kae tang cih; chi leite kae hiin nawlan te ram hynh ccungccaw adae khyh nawlan ccacii oun pya,” a ci hae.

²⁰Josef nynh Faro hanlan Izip ram balyn kha a re. Izip hae nynh myarya ccakancci keiccuze mih loo kha zua hae zah Faro loo lang a tang vae.

²¹Josef nynh Izip ram voikheit langte voikheih lang kyacia ccungccaw hae kha see lang a tangsah hae.

²²Aning nynh ranpibawi hae laephi kyalya kha nynh rebia khyh; pawccecize minmin tuh Faro kyate tyty a mue hae paw nethungpaw looh te Faro nynh a pya hae paw looh kha nynh a ae hae; tukeiccuze minmin nynh mih laephi kha zua khyh hae.

²³Oute Josef nynh ccungccaw hae kha, “Atunin naemaw te nae laephi kha Faro hanlan phe ka re vae, hein kya nanning hanlan ccacii mang um; lawkuh oh lah nae loo kya ccou oh.

²⁴Te looh na rue vae oh ze pum pangaw pum kheit kha Faro na pya cih oh, pum pangaw pum pali kha nae looh lang a tang cih zah ccacii lang thuasah, naemaw te nae innbyn hae ae lan thuasah, nae ccaaw hae ae lan thuasah na lawkuh cih oh,” a cipya hae.

²⁵Minmin nynh, “Kae bawipaw, kae hiinnaw kha nae khum vae; ngaethya oun um sah; Faro see lang kae tang cih,” a ci hae.

²⁶Tuhcite Josef nynh Izip ram kya upadi ccangkheit a rae, tuh-e upadi tuh Faro nynh pum pangaw pum kheit kha a lawkuh cih cipaw thua zah atunin cia atyn. Ranpibawi hae laephi kyalya nynh Faro laephi lang tang khyh.

²⁷Israel tuh Izip ram, Goshen pee kya khua a sah; minmin nynh tuin kya a hoirum hae, te myarya lungthung hae zah a pungzae hae.

²⁸Jakob tuh Izip ram kya kum haw lae sari a hiin; tukeiccuze a hiinnaw she tuh za kheit sung pali kum sari acih vae.

²⁹Israel a chinaw ccyh he anae tuh a ccapaw Josef kha ko zah, “Na malang maehoynaw ka mue zetuh na kuih kha ka phae kaw nung lah lungzite, hmerarih lan bya yn kinpyaku tua; Izip ram kya yn uh nan.

³⁰Ka minpaaw hae kya he ka ihbua te, Izip ram kyate nae cciakhae cih zah mih shawku kyakhe nae uhbua cih,” a cipya. Josef nynh, “Na ho hawte ka la cyih cih,” cite a cipya.

³¹Te Israel nynh, “Bya yn kinpakuh,” ci zah Josef nynh bya a kinpyaku. Tukoute Israel tuh a ikhung vawlan lu nungnaw langkhe a bakhung.