Read Zotung Chin GENESIS 48 Bible Online

GENESIS 48 - Zotung Chin bible

GENESIS 48

¹Tukoute Josef kha, “Na paaw dan khyh,” cite a hopya hae. Tukeiccuze a ccapaw hae lu ning Manasseh te Efraim kha ko hae zah a cceih hae.

²“Na ccapaw Josef tuh na kya yn thua vae,” cite Jakob kha he hopah hae tuh, thawte e-iasawkuh zah ikhung kya a haung.

³Te Jakob nynh Josef kha, “Athunghuapaw Pachia nynh Kanaan ram Luz khua khe ka kya langkute hythua yn pya zah,

⁴‘Nang kha kae pungzaesah cih zah kae lungthungsah cih; ccungccaw patae lang kae rae cih, e ram hynh namaw koute na ciihan hae kalan zungzae hanlan ka pya cih hae,’ yn cipya.

⁵Tukeiccuze na umnaw Izip ram kae thua maw, Izip ram kya na saah hae paw na ccapaw hae lu ning tuh ka ccapaw hae nynh thua hae; Efraim te Manasseh tuh Reuben te Simeon hawte ka ccapaw hae athua cih hae.

⁶Minmin koute na saah hae paw tuh na ccaaw hae athua cih hae zah rhoccounaw kya tuh mih upaw hae min kya riabia athua cih hae.

⁷Kae tuh Paddan ram kyate kae ki lya, Efrath khua kae thua maw taraw, Kanaan ram laanryng khe Rachel tuh a chih; te Efrath khua lang ccianaw laanryng khe Rachel kha ka uu,” (Efrath tuh Bethlehem nynh thua).

⁸Israel nynh Josef ccapaw hae kha he a muih hae tuh, “E hae hynh hum hae mou?” cite khia zah

⁹Josef nynh, “Pachia nynh hein kya yn pyapaw ka ccapaw hae nynh thua hae,” a ci. Te Jakob nynh, “Minmin kha kamaw kalan beih yn cciakhae hae, hythua ka pya cih hae,” a ci.

¹⁰Israel tuh a kum tang vae zah a mitmohbia vae keiccuze hoyte ngawmuih kho vae khyh. Tukeiccuze Josef nynh minmin kha amaw kalan a naesaku hae; te Jakob nynh minmin kha myng hae zah a pom hae.

¹¹Israel nynh Josef kha, “Na mitmae muih lante ka la ngaehoi vae khyh; thuasalama Pachia nynh na ccaaw hae kha mah hein kya yn muihsah vae hae,” a ci.

¹²Oute Josef nynh minmin kha a paaw ccukharu kyate a hoei hae, te Josef tuh a paaw malang khe a bakhung.

¹³Josef nynh a ccapaw hae kha parouhte cciakhae hae zah, Efraim kha a ranglang kuih khate kyng zah Israel a voilang kuih kalan khe a cciakhae, te Manasseh kha a voilang kuih khate kyng zah Israel a ranglang kuih kalan khe a cciakhae.

¹⁴Thuasalama Israel nynh a ranglang kuih kha avoikekuh lante dyng zah asoi huapaw Efraim a lu vawlan khe a khang, te a voilang kuih kha a tawccaw huapaw Manasseh a lu vawlan khe a khang.

¹⁵Israel nynh Josef kha hythuapya zah, “Ka minpaaw Abraham te ka paaw Isak kha amaw malang a la cciasah hae paw Pachia, ka hiin lungkhu atunin cia kamaw hanlan tuurintu a thuapaw Pachia,

¹⁶vawsawnaw balyn kyate yn khumtupaw vaawpaw nynh e imua hae kha hythuapya vae hae sah; te ka min, ka minpaaw Abraham min, ka paaw Isak min tuh minmin tungvaw zungzae la tyn vae sah; te laephi vawlan la pungzae vae hae sah,” a ci.

¹⁷A paaw Jakob nynh a ranglang kuih kha Efraim lu vawlan a khangpaw kha Josef nynh he a muih tuh a lunghoy khyh; tukeiccuze Josef nynh a paaw kuih kha lah zah Efraim lu kyate Manasseh lu kalan a khang sah.

¹⁸Josef nynh a paaw kha, “Apang, hynhte thua khyh! Hynh-e paw hynh a tawccaw athua keiccuze na ranglang kuih kha hynh-e paw lu vawlan khang,” a cipya.

¹⁹Thuasalama a paaw nynh phe ei zah, “Phang ka nyh, ka ccapaw, mang ka nyh; Manasseh hynh mah a phuin lepaw ccungccaw lang a tang cih. Tuhzemah a neitawpaw tuh amaw laeze a phuin lehuapaw lang a tang cih zah a ciihan tuh minphuin patae lang a tang cih,” a ci.

²⁰Tukeiccuze tuh-e nin khe minmin kha hythuapya hae zah, “ ‘Pachia nynh nang kha Efraim hawte thuasah, Manasseh hawte thuasah ae rae vae sah,’ cite Israel hae nynh naemaw min te hythua a pya cih hae,” a ci. Tuhcite Jakob nynh Efraim kha Manasseh malang a nung.

²¹Oute Israel nynh Josef kha, “Ka chih vae cih, thuasalama Pachia nynh nanning kha ae umkhae cih oh zah nae minpaaw hae ram lang bua ae cciakhae cih oh.

²²Na upaw hae laeze nang kha alunghua lante kae pyapaw tuh, ka thaloi te ka li te Amor ccungccaw hae kuih kya-e ka lawpaw Shekhem nynh thua,” a ci.