Read Zotung Chin GENESIS 49 Bible Online

GENESIS 49 - Zotung Chin bible

GENESIS 49

¹Oute Jakob nynh a ccaaw hae kha ko hae zah: “Oun sueluakuh oh, malang ccyh kya nae tungvaw yn cyihkuh lanpaw kha kae hopah cih oh.

²Pou Jakob ccapaw hae, sueluakuh oh lah thaetua oh; nae paaw Israel bya kha ngaetua oh.

³Reuben, nang tuh ka ccatawccaw, ka thungnaw, ka thawzung kya-e thaety, sawtua lan um huapaw, huhan a hoi huapaw nynh na thua.

⁴Tuhzemah nang tuh vahungtui hawte atyn leipaw na thua keiccuze byapi huapaw tuh na thua lan khyh, pawccecize na paaw ikhung— ka iphae vawlan na kae zah na thusah vae.

⁵Simeon te Levi tuh uno nynh thua hae, mih thaloi hae kha ahoy leipaw zunghe lang a mang hae.

⁶Aphirute khua a khankunaw hae kalan ka teebua lan khyh; minmin tungkunaw kya ka umbua lan khyh, pawccecize mih thinria vae ze ccungccaw kha theih hae zah, lungpawte taeku nawlan tangnuapaw ccumaria kha a khya hae.

⁷Myarya lepaw mih thinrianaw te rehahan lan mih bungpawnaw tuh thyalawnaw um sah, minmin kha Jakob ciihan kya ka phia cih hae zah Israel minphuin kya phiariphiarae ka nung cih hae.

⁸Judah, na uno hae nynh nang kha ae thehoysah cih hae; na kuih te na rhaw hae nging kha na kyng cih hae; na paaw ccapaw hae nynh na malang a bakhung cih hae.

⁹Ka ccapaw Judah! Nang tuh anopaw chindeih nynh na thua; saw kha na tei zah akarung kalan na ki. Aning tuh chindeih hawte thuasah, chindeih pinung hawte thuasah, tharae leih dyngkuh zah a rya, hum nynh mou amaw kha a laesy ngan cih?

¹⁰Minhoynaw kha a mue makhia tuh siapharan kawhoinaw ccoi thuasah, a ccu laku kya-e uktu hoitang thuasah Judah kyate phiakuh lan khyh, te ccungccaw hae nynh amaw kaw kha a ngae cih hae.

¹¹A lann kha misu ku kya khii zah a lann nopaw kha misu ku ahoy huapaw kyakhe a khii, a boeining kha misutui kyakhe suh zah chii hawte asepaw misutui kyakhe a angkiccuapaw kha a su;

¹²a mit tuh misutui laeze sehua zah a haw tuh mateitui laeze arawhua.

¹³Zebulun tuh rili kin kya khua a sah cih; amaw kya-e rili kin tuh sanphalung hae thadynnaw hmin athua cih. A ram tuh Sidon khua kyacia athua cih.

¹⁴Issakhar tuh a thawsaepaw lann athua cih, a phupaw uccaw tung ning laku khe a rya;

¹⁵a haeungnaw hmin tuh hoy zah a umnaw ram tuh lungrythua lan a um cipaw a muih; tukeiccuze phupaw kha khangku khylan a raw kha tuakuh zah nangsete ryalawsahpaw see lang a tang.

¹⁶Dan tuh Israel minphuin hae kyaze phuin kheit hawte a ccungccaw hae kha byapia cih hae.

¹⁷Dan tuh laanpi kin umpaw hupaw athua cih, marang a ccikuhpaw kha nulang a ccaw nawlan marang ccu a tuhpaw hupaw arepaw athua cih.

¹⁸Pou BAWIPAW , na khumnaw kha phang ka ngaw.

¹⁹Luadetu hae nynh Gad kha a tuk cih hae, thuasalama Gad nynh minmin kha a tukru cih hae zah a dee cih hae.

²⁰Asher ram kyate athuapaw looh apou cih zah siapharan hanlan angaekuhpaw looh athua cih.

²¹Naftali tuh a rythyte a paeepaw sazuh, apuithyapaw ccaaw kha a saahpaw nynh thua.

²²Josef tuh athae te phe beihpaw akaran, tuidy pe umpaw athae te phe beihpaw akaran nynh thua, amaw akaran hae tuh lungrua vawlan po a lo hae.

²³Li a kawthya hae paw nynh amaw kha thawte a tuk hae; amaw kha kaw hae zah thawte a naangbia hae.

²⁴Tuhzemah a li tuh no khyh, a zunghe hae tuh Athungpaw Jakob Pachia kuih te thuasah, Israel Lungpi a thuapaw Tuurinpaw min te thuasah,

²⁵nang ae bawmpaw na paaw a Pachia liate thuasah, nang kha hythua ae pya cih paw Athunghuapaw liate thuasah raepaw nynh thua. Tuh-e Pachia nynh ahangnaw vaawram e hythuanaw, anenaw umpaw akhupaw tui kya-e hythuanaw, matei hythuanaw te vue hythuanaw kha ae pya vae sah.

²⁶Na paaw kya-e hythuanaw tuh zungzae tynpaw mua hae kya-e hythuanaw, zungzae tynpaw mua kya-e ry lan umpaw uccaw hae laeze aphutehua; tuh-e hythuanaw tuh Josef lu vawlan, a uno hae kyate phia a thuapaw kya-e a terui vawlan um vae sah.

²⁷Benjamin tuh saw leih a teipaw suizaw nynh thua, awkhua kya a teipaw kha a ae, phe a tei vae paw kha zete ccyh kya phiariphiarae leih a nung,” a cipya hae.

²⁸E hae hynh Israel phin haw lae ning nynh thua. E bya hynh mah minmin kha lu raveihte angaekuhpaw hythuanaw kha mih paaw nynh a hopya hae paw bya nynh thua.

²⁹Oute Jakob nynh, “Ka ccungccaw hae kalan suelua ka thua vae cih, Hit ccungccapaw Efron loo kya umpaw lungkarung kyakhe ka paaw hae ryte nae la uh cih oh.

³⁰Tuh-e lungkarung tuh Kanaan ram, Mamre te anaekunaw Mekpelah kya umpaw thua zah, Abraham nynh uuku nawlan cite loo ryte Hit ccungccapaw kya-e a repaw nynh thua.

³¹Tuin kyakhe Abraham te a zu Sarah kha a uu hae; Isak te a zu Rebekah kha mah a uu hae; te Leah kha mah tuin kya ka uu.

³²Loo te loo lungkhu umpaw lungkarung tuh Hit ccungccaw hae kya-e repaw nynh thua,” cite bya a tawsya hae.

³³Jakob nynh a ccapaw hae kya bya a tawsya hae paw kha he a thangsah te, a ccu kha ikhung kalan khin zah a hy thang vae, te a ccungccaw hae kalan a sueluabua hae.