Read Zotung Chin GENESIS 50 Bible Online

GENESIS 50 - Zotung Chin bible

GENESIS 50

¹Oute Josef nynh a paaw mae kha bakhungnua zah thawte rah zah a myng.

²Josef nynh a paaw rhua kha mynkhuhpaw te ccaan khylan a kuihkaw ryalahpaw sibawi hae kha kaw a pya hae. Tukeiccuze sibawi hae nynh Israel kha mynkhuhpaw te ccaan hae zah

³nin sung pali a rokhaekuh hae, pawccecize tuh-e accyh tuh mynkhuhpaw te ccaan nawlan ahopaw ccyh nynh thua. Te Izip hae tuh Jakob hanlan nin sung sari a rah hae.

⁴Jakob hanlan rawnaw nin he athang te, Josef nynh Faro innbyn hae kyakhe, “Nae kyate maehoynaw ka mue zetuh, Faro kha akawlan thyhte beih la hopah oh:

⁵Ka paaw nynh bya yn kinsakuh zah hynhte a ho, ‘Ka chih vae cih. Kanaan ram kya kamaw hanlan ka karynkupaw shawku kya nae la uh cih oh,’ a ci. Tukeiccuze atu ka paaw kha uu khylan ka la cceih sah; te bua kae ki cih,” a cipya hae.

⁶Faro nynh Josef kha, “Na paaw nynh bya ae kinsaku hawte na paaw kha la uh,” a cipya.

⁷Josef tuh a paaw uu lan a cceihthung, amaw ryte Faro see hae balyn, a inn kya ryalah hae paw piccan hae, Izip ram e piccan hae balyn a cceihthung bua hae.

⁸Josef a innbyn hae, a upaw hae te a paaw innbyn mah a cceihbua hae. Mih ccaaw hae, mih tuu hae, mih miaa hae te mih vaetua hae kyalya kha Goshen kya a cciataw hae.

⁹Marangle hae te marang rhawkaw hae mah Josef kya a cceihbua hae. Tuh-e phu tuh myarya lepaw phu nynh thua.

¹⁰Jordan nithua lang umpaw ccatan tinnaw hmin Atad kya he a thua hae tuh myarya alepaw te ngaethya lan kou umpaw rawkhuinaw kha a rae hae; Josef tuh a paaw hanlan nin sari rawkhuite a um.

¹¹Ccatan tinnaw hmin Atad kya-e rawkhuinaw kha tuh-e ram kya umpaw Kanaan hae nynh he a muih hae tuh, “E hynh Izip hae kya-e myarya thinlungcci lan umpaw rawkhuinaw nynh thua,” a ci hae. Tukeiccuze Jordan vaw nithua lang umpaw tuh-e hmin kha Abel-mizraim cite min a phu hae.

¹²Jakob nynh a tawsya hae hawte a ccapaw hae nynh a cyipya hae.

¹³Minmin nynh Jakob kha Kanaan ram lang cciakhae hae zah Abraham nynh uuku nawlan cite Hit ccungccapaw Efron kya-e a repaw, Mamre te anaenaw Makpelah loo kya umpaw lungkarung kyakhe a uu hae.

¹⁴Josef nynh a paaw kha a uh koute a uno hae te a paaw uu khylan a cceihthung kheih hae paw balyn ryte Izip ram lang a ki hae.

¹⁵Mih paaw he a chih tuh, Josef a upaw hae nynh, “Josef nynh aening kha palei lung-ung yn la tungpah zah a tungvaw kya ah la cyi oh paw hoyleinaw keiccuze oun liaru lanze pawte athua cih?” a ciku hae.

¹⁶Tukeiccuze minmin nynh Josef kalan hynhte bya a taw hae: “Na paaw nynh a chi mawze bya oun tawsya zah,

¹⁷‘Josef kha hynhte la hopah oh: Na upaw hae nynh seinaw a rae hae paw te na tungvaw vawsawnaw pyate a sei hae paw kha beih la ngaethya hae cite kae ngia,’ cite yn hopya. Tukeiccuze na paaw a Pachia see hae nynh seinaw kae la raepaw kha beih oun ngaethya,” a cipya hae. Minmin nynh tuhte he a ho hae tuh Josef tuh a rah.

¹⁸Oute a upaw hae mah a rah hae, te Josef malang bakhung hae zah, “Kaening tuh na see hae nynh kae thua,” a cipya hae.

¹⁹Thuasalama Josef nynh, “Rih nan oh, kae tuh Pachia umnaw kya zawtou ka um?

²⁰Nanning nynh ka tungvaw vawsawnaw pya lan na la tuaku oh zemah Pachia nynh khah-e kha ahoypaw lante paccyn zah, atunin acyiku vae hawte ccungccaw patae kha khum khylan a la paccyn.

²¹Tukeiccuze rih nan oh, naemaw te nae ccaaw hae kha kamaw ccaccei nynh kae bawm cih oh,” a cipya hae. Tuhcite minmin kha lungtangnaw pya hae zah nebaleih lante a hopya hae.

²²Josef tuh a paaw innbyn hae ryte Izip ram kya um zah za kheit kum haw a hiin.

²³Josef tuh Efraim ccaaw hae te Efraim mintaw hae kha a muihsya ung hae; Manasseh ccapaw Makhir ccaaw hae kha mah Josef nynh a innbyn kya a umsah bua hae.

²⁴Oute Josef nynh a uno hae kha, “Ka chih vae cih, thuasalama Pachia tuh nanning kalan yn thua ccaccing cih zah Abraham, Isak te Jakob kya bya a kinkupaw ram langkhe e ram kyate ae cciakhae thung cih oh,” a cipya hae.

²⁵Te Josef nynh Israel ccapaw hae kha, “Nae kalan Pachia he yn thua te, ka ru kha e kyate nae la cciakhae thung cih oh,” cite hopah hae zah bya a kinsaku hae.

²⁶Te Josef tuh za kheit kum haw acih te a chih, mynkhuhpaw kha thuh hae zah Izip ram kya thingkua lungkhu khe a nung hae.