Read Zotung Chin GENESIS 6 Bible Online

GENESIS 6 - Zotung Chin bible

GENESIS 6

¹Laephi vawlan ccungccaw hae tuh pungzae hae zah ccanopi hae kha he a saah hae tuh,

²Pachia ccapaw hae nynh tuh-e ccanopi hae mih puithyanaw kha a muih hae; a ry hae paw kha pokuh hae zah zu lang a dyku hae.

³Oute BAWIPAW nynh, “Ka muisaw tuh a chihthyapaw ccungccaw hae kya zungzae um lan ccan khyh, pawccecize minmin tuh ngesaw nynh thua hae; ccungccaw she tuh za kheit kum kuin thua sah,” a ci.

⁴Tuh-e she kya laephi vawlan mih pyn lepaw Nefilim ccungccaw hae la um hae, tuh-e she koute mah Pachia ccapaw hae nynh ccungccaw ccanung hae te ihkheih hae zah ccaaw a saah hae. Tuh-e ccaaw hae tuh langmawlya mawte rawhoy hae paw te minthaan hae paw nynh thua hae.

⁵Laephi kya ccungccaw hoyleinaw tuh myarya le zah mih thinlung nynh a tuapaw miakaw kya ahoy leipaw cci nynh zungzae a um cipaw kha BAWIPAW nynh a muih.

⁶BAWIPAW nynh laephi vawlan ccungccaw a la raepaw kha a ngaesikuh, te tuh-e a raepaw nynh a thinlung kha myarya a ccisah.

⁷Tukeiccuze BAWIPAW nynh, “Ka raepaw ccungccaw hae, sarangpaw hae, a vawthya hae paw te vaawlang e pavaw hae kha laephi kyate ka roh cih, pawccecize minmin ka raepaw hynh ka ngaesikuh,” a ci.

⁸Thuasalama Noah tuh BAWIPAW mitmuihnaw kya maehoynaw a mue.

⁹Hynh-e hae tuh Noah konglang nynh thua hae. Noah tuh midingpaw, tuh-e she lyaze ccaenaw um leipaw thua zah Pachia ryte a mungkuh hae paw nynh thua.

¹⁰Te Noah nynh ccapaw lu thum a saah, Shem, Ham te Jafeth nynh thua hae.

¹¹Laephi tuh Pachia mitmuihnaw kya ahoy leipaw hiinzia te um zah puathonaw te phe a beih.

¹²Te Pachia nynh laephi hynh hoy khyh cite a muih; pawccecize ccungccaw balyn tuh laephi vawlan ahoy leipaw hiinzia te a hiin vae hae.

¹³Te Pachia nynh Noah kha, “Ccungccaw balyn kha phe maemih lan ka tuaku vae, pawccecize laephi tuh minmin keiccuze puathonaw te nynh phe a bia vae; atu laephi te minmin kha ka roh vae cih.

¹⁴Kawparah thing te sanphalung ccangkheit kha namaw hanlan raekuh; a lungkhu kya akhaan hae kha rae lah sanphalung a lungkhu lang te atolang kha thingphi te pong na thuh cih.

¹⁵Sanphalung kha hynhcite na rae cih: asaepaw dong za thum, akopaw dong sung pangaw te ahangpaw dong sung thum athua cih.

¹⁶Sanphalung avawlan kha na daw cih, tuh-e na dawpaw te pang laku khe dong kheit na uasah cih. Sanphalung akin langkhe thuakaw ccangkheit na rae cih zah akaw khang, angaelung khang te avaw khang cite khang thum lante na sak cih.

¹⁷Vaawlui kaw um zah ahiinpaw ahysuepaw balyn kha ro khylan laephi vawlan tui ka ynsakuh cih. Laephi vawlan umpaw atyn-are a chih cih hae.

¹⁸Thuasalama namaw kya tuh ka byakin kha ka tynsah cih; te nang tuh na ccapaw hae, na zu te na ccapaw hae zu hae ryte sanphalung lungkhu lang na tee cih oh.

¹⁹Ahiinpaw sarangpaw aphuinphuin kya-e nopi te pise bua kheit cci kha na lah cih zah namaw ryte mih hiinnaw kha khynsah khylan sanphalung lungkhu lang na teekhae cih hae.

²⁰Pavaw hae kha mimaw phuin thathyhte, te sarangpaw hae kha mimaw phuin thathyhte, a vawthyapaw miakaw kha amaw phuin thathyhte, a phuin takyh kya-e sa ning cci kha mih hiinnaw khynsah khylan namaw kalan oun tee cih hae.

²¹Aepaw looh phuin miakaw kha mah namaw ryte na cciakhae cih zah na ccakhung cih; te tuh-e tuh namaw te sarangpaw hae aepaw lang a tang cih,” a ci.

²²Pachia nynh kaw a pya thyhte Noah nynh pong a cyi.