Read Zotung Chin GENESIS 7 Bible Online

GENESIS 7 - Zotung Chin bible

GENESIS 7

¹Oute BAWIPAW nynh Noah kha, “Nang te na innbyn balyn sanphalung lungkhu lang tee oh, pawccecize hynh-e she kya nang rou nynh ka malang na ding cipaw ka muih.

²Athyaapaw sarangpaw hae balyn kya-e nopi te pise bua sari cci, te athyaa leipaw sarangpaw hae kya-e nopi te pise bua kheit cci,

³te vaawlang e pavaw hae nopi te pise bua sari cci kha mah laephi vawlan balyn mih phuin raveihte hiinsah khylan namaw ryte sanphalung lungkhu lang teekhae hae.

⁴Pawccecize atunin kyate nin sari he aro te, laephi vawlan nin sung pali te zi sung pali khua ka rawsah cih; te ka raepaw ahiinpaw miakaw kha laephi kyate ka roh cih,” a ci.

⁵Te Pachia nynh kaw a pyapaw balyn kha Noah nynh pong a cyi.

⁶Laephi vawlan tuipayn he a ynku lyakhe Noah tuh kum za taruh acih vae.

⁷Te Noah tuh a ccapaw hae, a zu te a ccapaw hae zu hae ryte tuipayn kyate lue khylan sanphalung lungkhu lang a tee hae.

⁸Athyaapaw sarangpaw hae, te athyaa leipaw sarangpaw hae, pavaw hae te laephi vawlan avawthya hae paw kya-e,

⁹nopi te pise bua kheit cci tuh Pachia nynh Noah kya kaw a pya thyhte Noah ryte sanphalung lungkhu lang a tee hae.

¹⁰Te nin sari he aro te, laephi vawlan tuipayn tuh yn yhkuh vae.

¹¹Noah kum za taruh a ci kum, sawpaw sah ningnaw[5], nin haw lae sari nin kya, myarya khupaw tuinaw hae balyn tuh phae koi zah vaawlui e thanlan-aw hae tuh oun hungkuh vae.

¹²Te laephi vawlan nin sung pali te zi sung pali khua a rah.

¹³Tuh-e nin ccaccei kyatuin Noah te a ccapaw hae, Shem, Ham te Jafeth, te Noah a zu te a ccapaw hae zu lu thum tuh sanphalung lungkhu lang a tee hae.

¹⁴Minmin ryte ramsaw phuin miakaw, te sahiin-awvaw phuin miakaw balyn, te laephi vawlan a vawthyapaw miakaw, te pavaw phuin miakaw, sake hoipaw ahysuepaw miakaw mah a teebua hae.

¹⁵Hiinnaw hy a hoipaw miakaw kya-e bua kheit cci tuh Noah ryte sanphalung lungkhu lang a tee hae.

¹⁶Pachia nynh Noah kha kaw a pya thyhte alungkhu lang a tee hae paw tuh sarangpaw balyn kya-e nopi te pise nynh thua hae; te BAWIPAW nynh Noah kha a lungkhu kya a khawsung vae.

¹⁷Tuipayn tuh nin sung pali lungkhu laephi vawlan a ynkuh thung; te tui tuh lungthung zah sanphalung kha hangthung zah laephi luki kyacia a hangsah vae.

¹⁸Laephi vawlan tui tuh kaethung zah myarya a lungthung; te sanphalung kha tui vawlan a phaly.

¹⁹Tui tuh laephi vawlan myarya a thawsae lante kaethung zah vaawlui zakaw umpaw ahangpaw mua hae balyn kha pong a vu hae.

²⁰Tui tuh mua hae luki cia kaethung zah dong haw lae pangaw akhu lan a vu.

²¹Te laephi vawlan apiathyapaw ahysuepaw hae, pavaw hae, sahiin-awvaw hae, ramsaw hae, laephi vawlan avawpaw ahysuepaw balyn, te ccungccaw balyn tuh pong a chih hae;

²²Aroupaw laelung kya umpaw, naduh te hysue zah ahiinpaw atyn-are pong a chih hae.

²³Laephi vawlan umpaw ahiinpaw miakaw, ccungccaw hae te sarangpaw hae te a vawthyapaw hae, te vaawlang e pavaw hae kha Pachia nynh marya a ro; minmin kha laephi kyate ro athua hae. Noah amaw te sanphalung kya a umkheih hae paw rou nynh a lae hae.

²⁴Te tui tuh laephi vawlan nin za kheit sung pangaw lungkhu a kaethung.