Read Zotung Chin GENESIS 8 Bible Online

GENESIS 8 - Zotung Chin bible

GENESIS 8

¹Thuasalama Pachia nynh Noah te sanphalung kya umkheih hae paw sarangpaw balyn te sahiin-awvaw balyn kha ning khyh hae. Te Pachia nynh laephi vawlan khivae zawsah zah tui tuh akybung;

²myarya khunaw kya umpaw tuinaw hae te vaawlui kya-e thanlan-aw hae kha oun khawkuh zah vaawlui kya-e khuaa tuh akan vae,

³te tui tuh laephi kyate byabyate akybung. Te nin za kheit sung pangaw aro tuh tui tuh aky vae;

⁴te sawpaw sah sarinaw[6], nin haw lae sari nin kyakhe sanphalung tuh Ararat mua kya a tinkuh.

⁵Tui tuh sawpaw sah hawnaw[7], cia po akybung; sawpaw sah hawnaw, masaty nin kya mua dung hae tuh oun langkuh hae.

⁶Nin sung pali aro te Noah nynh a raepaw sanphalung kya-e thanlan-aw kha hung zah,

⁷va-aw sa kheit kha a saw; tuh-e va-aw nynh laephi vawlan tui arou makhia a khiakuh.

⁸Oute Noah nynh laephi vawlan tui aky vae tah cipaw ny khylan vahu sa kheit kha a saw;

⁹thuasalama vahu nynh ccunaw kha muihkuh khyh zah Noah umnaw sanphalung kalan phe a ki, pawccecize laephi vawlan balyn tui a um ung. Tukeiccuze Noah nynh a kuih kha dyngte vahu kha kyng zah amaw umnaw sanphalung lungkhu lang a nung.

¹⁰Noah nynh nin sari a ngaw koute vahu kha sanphalung kyate bua a saw;

¹¹zete khe vahu tuh Noah kalan yn ki zah a mung te a teipaw hinlalyhpaw oliv naw kha yn thuakhae; tukeiccuze Noah nynh laephi vawlan tui aky vae cipaw a ny.

¹²Oute Noah nynh nin sari a ngaw koute vahu kha bua a saw; vahu tuh Noah kalan yn ki vae khyh.

¹³Noah za taruh kum kheit a ci kum, sawpaw sah kheitnaw[8], kyaze masaty nin kyakhe laephi vawlan tui tuh karae aky vae; te Noah nynh sanphalung adawkuhpaw kha phou zah he a do tuh, arou takawpaw laephi kha a muih.

¹⁴Sawpaw sah ningnaw kya nin kuin lae sari nin khe laephi tuh arou vae.

¹⁵Oute Pachia nynh Noah kha,

¹⁶“Namaw ryte na zu, na ccapaw hae te na ccapaw hae zu hae ryte sanphalung kyate pou ccavae oh.

¹⁷Laephi vawlan pungthung khylan te pungzae khylan namaw ryte a um hae paw ahiinpaw miakaw, pavaw hae te sarangpaw hae te laephi vawlan a vawthyapaw miakaw kha namaw ryte poukhae hae,” a cipya.

¹⁸Tukeiccuze Noah tuh a zu, a ccapaw hae te a ccapaw hae zu hae ryte a pou hae.

¹⁹Te sarangpaw miakaw, avawpaw miakaw, te pavaw miakaw, laephi vawlan apiathyapaw miakaw tuh mimaw phuin thathyhte aphuphute sanphalung kyate a pou vae hae.

²⁰Oute Noah nynh BAWIPAW hanlan silawhang ccangkheit kha rae zah athyaapaw sarangpaw te athyaapaw pavaw phuin takyh kya-e sa kheit cci kha lah zah silawhang vawlan khe maee-ute silawnaw kha a rae.

²¹Te BAWIPAW nynh lungrythuasah paw amynkhuhpaw kha he a thae tuh, BAWIPAW nynh, “Ccungccaw keiccuze laephi hynh mazi thya bua ka law vae lan khyh, pawccecize ccungccaw thinlung tuh a di lya mawte hoy khyh; vaekheit ka la cyi vae hawkhate ahiinpaw ahysuepaw miakaw kha kharouh bua ka roh vae lan khyh.

²²Laephi she athang makhia, ccou ccyh te rue ccyh, akyaapaw ccyh te asopaw ccyh, hawnin te khuaccih, khuadae te khuazi, thang boi vae lan khyh,” cite a thinlung kya bua a ciku.