Read Zotung Chin GENESIS 9 Bible Online

GENESIS 9 - Zotung Chin bible

GENESIS 9

¹Pachia nynh Noah te a ccaaw hae kha hythuapya hae zah, “Pungzae oh lah lungthung oh, laephi kya phe beih oh.

²Laephi vawlan sarangpaw miakaw, vaawlang e pavaw miakaw, laephi vawlan avawpaw atyn-are, te rili lungkhu e ngasaw balyn nynh nanning kha ae rih cih oh zah a thyngkuh cih hae; minmin kha nae kuih kya pya athua hae.

³Ahinpaw thingku-ruaku hae kha nanning kae pya oh hawte hiin zah apiathyapaw miakaw tuh nanning hanlan looh athua cih, atyn-are kha nanning kae pya oh.

⁴Thuasalama saw kha achii te na aede lan khyh oh, pawccecize hiinnaw tuh chii kya nynh a um.

⁵Pawccecize nae hiinnaw athuapaw nae chii kha kae ngiaru cih oh, sarangpaw balyn kyate tuh-e kha ka ngiaru cih, te ccangpaw lu kheit chii hanlan ka ngiaru cih.

⁶Humhung zemah ccungccaw lukhakheit chii kha a luasahpaw tuh, lukhakheit nynh a chii kha a luasah ru cih; pawccecize amaw muinsan alo lante Pachia nynh ccungccaw kha a rae.

⁷Te nanning tuh pungzae oh lah lungthung oh, laephi vawlan ccaaw patae saah oh lah pungzae oh,” a cipya hae.

⁸Te Pachia nynh Noah te a ccaaw hae kyakhe,

⁹“Nanning te naemaw koute nae ciihan hae kya thuasah,

¹⁰te nanning ryte a um hae paw hiin zah mih hysue hae paw (ahiinpaw ahysuepaw athua hae paw) pavaw hae, sahiin-awvaw hae, ramsaw miakaw—sanphalung kyate a pou hae paw kya thuasah ka byakin kha ka tynsah cih.

¹¹Tuipayn keiccuze ahysuepaw balyn hynh papin buachih vae lan khyh, te laephi ro khylan tuipayn hynh mazi bua ynkuh vae lan khyh, nanning kya ka byakin kha ka tynsah,” a ci.

¹²Pachia nynh, “Kamaw te naemaw, nanning ryte a um hae paw ahiinpaw ahysuepaw miakaw laku, malang she balyn hanlan ka raepaw byakin kya-e muihsahnaw tuh hynh-e nynh athua:

¹³Ka sawdoih kha maeking kya ka nung vae, tuh-e tuh kamaw te laephi laku byakin muihsahnaw ccangkheit athua cih.

¹⁴Maeking kha laephi luki ka umsah vae ze sawdoih tuh maeking kya a langkuh,

¹⁵Kamaw te naemaw te nanning ryte a um hae paw ahiinpaw ahysuepaw balyn laku a umpaw ka byakin kha ka ning lan khyh zah ahysuepaw balyn kha tuipayn nynh mazi bua roh vae lan khyh.

¹⁶Maeking kya sawdoih a umpaw kha he ka muih vae ze, Pachia te laephi vawlan umpaw ahiinpaw ahysuepaw balyn laku a umpaw zungzae tynpaw byakin kha ka ning lan khyh,” a ci.

¹⁷Pachia nynh Noah kha, “E hynh kamaw te laephi vawlan umpaw ahysuepaw balyn laku ka tynsahpaw byakin muihsahnaw nynh thua,” a cipya.

¹⁸Sanphalung atolang a pou hae paw Noah ccapaw hae tuh Shem, Ham, te Jafeth nynh thua hae. Ham tuh Kanaan a paaw nynh thua.

¹⁹Hynh-e lu thum tuh Noah ccapaw hae thua zah hynh-e hae kyate laephi pynpi ccungccaw a pazaekuh.

²⁰Noah tuh loophopaw thua zah misu khokhu masaty a raetupaw nynh thua.

²¹te Noah nynh misutui kha neih zah a rui keiccuze a bu kya a ccakaete a ih.

²²Kanaan a paaw Ham nynh a ccakaete umpaw a paaw kha muih zah atolang umpaw a uno hae lu ning kha a hopya hae.

²³Te Shem te Jafeth nynh boeining zung kheit kha lah hae zah mih raw kya a khangkuh kou hae te, mih nulangte sihnuakuh hae zah a ccakaete umpaw mih paaw kha a bong hae; mih mae kha ccanglang a hawi keiccu hae ze, mih paaw nynh a ccakaete a umpaw kha muih vae khyh hae.

²⁴Noah nynh misutui a ruinaw kyate a lung yn cci zah he yn thaekuh tuh, a ccasoi nynh a tungvaw a cyipaw kha nyh zah,

²⁵“Kanaan tungvaw thyalawnaw um sah; a upaw hae see hae kyaze anyaa huapaw see lang tang sah,” a ci.

²⁶Tukoute Noah nynh, “Ka Pachia BAWIPAW nynh Shem kha hythuapya vae sah, Kanaan tuh Shem see lang tangsah.

²⁷Pachia nynh Jafeth kha pungzaesah sah lah, a ciihan tuh Shem a bu hae kya khuasah hae sah; Kanaan tuh Jafeth see lang tang sah,” cite bua a ho.

²⁸Tuipayn koute Noah tuh kum za thum sung pangaw hiin zah

²⁹kum za takua sung pangaw acih te a chih.