Read Zotung Chin 2 SAMUEL 1 Bible Online

2 SAMUEL 1 - Zotung Chin bible

2 SAMUEL 1

¹Saul a chih koute, David nynh Amalek hae kha tae hae zah he yn ki te, David tuh Ziklag khua kya nin ning a um.

²Nin thumnaw nin khe, ccungccapaw lu kheit tuh a boeining seiikute, a lu vawlan vuiping phingkute Saul a ryahmin kyate yn thua. David kya he a thua te, laekhu kya bakhung zah sawtuanaw a pya.

³David nynh amaw kha, “Tei langte mou nae thua?” cite a khia. Aning nynh, “Israel hae ryahmin kyate nynh kae ccue,” a cipya.

⁴David nynh amaw kha, “Pawtemou athua? Yn hopya tua!” a cipya. Aning nynh, “Israel rhawkaw hae tuh rhawtuknaw kyate a ccue hae, rhawkaw patae tuh khuliakuh hae zah a chih hae; Saul te a ccapaw Jonathan mah a chih hae,” a cipya.

⁵David nynh a hopahtupaw ccangvaepaw kyakhe, “Saul te a ccapaw Jonathan a chi hae paw tuh pawtemou na ny?” cite a khia.

⁶A hopahtupaw ccangvaepaw nynh, “Gilboa Mua vawlan ka la um lyate tungkuh zah, Saul tuh a ccoi kya a ngeiku lyakhe, marangle hae te marang rhawkaw hae tuh a kalan oun naekuh vae hae.

⁷Saul nynh a nulang he a do tuh, kae kha yn muih zah yn ko. Kae nynh, ‘E kya mang ka um, bawipaw,’ ka cipya.

⁸Aning nynh kae kha, ‘Hummou na thua?’ cite yn khia zah, kae nynh, ‘Amalek paw nynh ka thua,’ cite ka khung.

⁹Saul nynh, ‘Rang, ka pe thadyn lah, yn theih; pawccecize vaemaw myarya ccih lan ka mue zah reih-i-reih-ae phang ka hiin ung,’ yn cipya.

¹⁰Tukeiccuze a pe ka thadyn zah ka chia, pawccecize a khuliakuh koute tuh hiin kho vae lan khyh cipaw ka ny. A lu kya umpaw bawilukhung te a kuihnyng kya umpaw khawccan kha ka lah zah, hynhlang ka bawipaw kalan kae thuakhae,” a cipya.

¹¹Tetuh David nynh amaw boeining kha kyng zah a seiiku; a kya um hae paw balyn nynh tuhcite a cyibua hae.

¹²Saul, a ccapaw Jonathan, BAWIPAW rhawkaw hae te Israel hae tuh thaloi te a chi hae keiccuze minmin elang zete cia rah hae zah looh-ae a sung hae.

¹³David nynh a hopahpaw ccangvaepaw kha, “Tei langte mou nae thua?” cite a khia. Aning nynh, “Kae tuh Amalek paw, ramccangpaw ccapaw nynh ka thua,” a cipya.

¹⁴David nynh amaw kha, “BAWIPAW nynh chitui thuhpaw kha chia khylan na kuih hangnua lanpaw kha na rih khyh tou?” a cipya.

¹⁵Tetuh David nynh ccangvaepaw lu kheit kha ko zah, “Hynhlang yn cceih lah, aning hynh theih,” a cipya. Tukeiccuze aning nynh tuh-e paw tuh theih zah a chih.

¹⁶David nynh, “Na chiise tuh na lu vawlan um sah; pawccecize, ‘BAWIPAW nynh chitui thuhpaw kha ka chia vae,’ cite namaw mung ccaccei nynh ccaekia a khangku vae,” a cipya.

¹⁷David nynh Saul te a ccapaw Jonathan kha hynh-e rawnaw hlaw hynh a phua hae.

¹⁸(Judah hae kyakhe hynh-e hlaw hynh ccangpya athua cih, cite kaw a tho; tuh-e tuh Jashar Ccauh kya zei athua.) David nynh:

¹⁹Pou Israel, na phu-enaw kha ahangpaw na hmin hae vawlan khe chia athua vae! Mih thawsae hae paw tuh phe chih vae hae ccarei!

²⁰Tuh-e kong tuh Gath khua kya ho nan oh, Ashkelon khua laanpi hae kya mah ho nan oh; tuhkhyhze tuh Filistin ccanung hae tuh mih lungpawsei cih, vingdungawkuh lei hae paw mih ccanung hae tuh mih lungtuasei cih.

²¹Pou Gilboa mua hae, nae vawlan kya dangtui ccah nan sah, khuaa mah rah nan sah, looh patae voipaw loo mah um nan sah! Pawccecize tuin kyakhe mih thawsae hae paw kya-e khawriaphua tuh a nungsikuh vae, Saul a khawriaphua tuh chitui thuh thua vae khyh.

²²Chia athuapaw ccungccaw hae chiise kyate thuasah, mih thawsae hae paw tho kyate thuasah, Jonathan li tuh nulang ki hang khyh zah, Saul thaloi tuh a ccakaete ki hang khyh.

²³Saul te Jonathan, sungsakuh hae zah sungsah lan a um hae! Hiinnaw kya thuasah, chinaw kya thuasah phiakuh khyh hae; minmin tuh mosipi laeze ranghua hae zah, chindeih laeze mih thawsaehua.

²⁴Pou Israel ccanung hae, Saul hanlan rawtua oh, aning nynh apuithyapaw boei sepaw kha ae zingsah oh zah, nae boeining kha ccaannawpaw sui te ae ccaanpya oh.

²⁵Mih rawthungpaw rhawkaw hae tuh rhawtukku cciamang lya a khuliakuh vae hae! Jonathan tuh ahangpaw na hmin hae kya a chia vae hae.

²⁶Ka neitaw Jonathan, nang na hanlan ka ngaethah; nang tuh myarya kae sungsahpaw nynh na thua; nae sungsahnaw tuh ngaeangthua lan um zah, nopi hae sungsahnaw po alawe.

²⁷Mih rawthung hae paw tuh a chih vae hae, rhawtuknawpaw zunghe hae tuh aroh vae hae! a ci.