Read Zotung Chin 2 SAMUEL 10 Bible Online

2 SAMUEL 10 - Zotung Chin bible

2 SAMUEL 10

¹Tukoute Ammon hae siapharan tuh chih zah, amaw ccelang a ccapaw Hanun tuh siapharan lang a tang.

²David nynh, “Hanun paaw Nahash nynh ka tungvaw a lungzi hawte, a ccapaw Hanun tungvaw kya lungzite ka ccuepe cih,” a ci. Tukeiccuze David nynh a paaw te asekuh lante lungtangnaw pya khylan locceihtu hae kha a saw hae. David a locceihtu hae tuh Ammon hae ram kya he a thua hae te,

³Ammon ccungccaw hae bawi hae nynh mih bawipaw Hanun kyakhe, “David nynh nang kha lungtangnaw pya khylan locceihtu hae yn saw hae paw hynh na paaw kha sawtuanaw a pyapaw nynh thua cite na tua ccaccing tou? Khua hynh akaw-aleih dote dophi khylan te ro khylan David nynh a locceihtu hae hynh yn saw khyh hae tou?” a cipya hae.

⁴Tukeiccuze Hanun nynh David locceihtu hae kha kyngte mih khawming angankuh kha ccarou ngo hae zah, mih boeining kha angaelung ccepahthua te awpah hae zah ccaring a cciasah hae.

⁵Tuh-e tuh David kya he a hopah hae te, minmin tuh myaryamaw mih maethya keiccuze minmin kha cciadue khylan ccungccaw a saw hae. Te siapharan nynh, “Nae khawming asae mawlaezung Jeriko khua kya la um oh, tukoute nae ki cih oh,” a cipya hae.

⁶Ammon hae nynh David kya kae cceikhah vae cipaw he a nyh hae te, Ammon hae nynh ccungccaw saw hae zah Beth-rehob e Siria hae te Zobah e Siria hae, ccu rhawkaw thong kuin, Maakah ram siapharan te a ccungccaw hae thong kheit, Tob ram e ccungccaw thong haw lae ning kha a hoh hae.

⁷Tuh-e tuh David nynh he a thae te, Joab te athungpaw rhawkaw hae balyn kha a saw hae.

⁸Ammon hae tuh oun pou hae zah koikua teenaw kyakhe rhawtuk lan a um hae; Zobah te Rehob e Siria hae te Tob te Maakah e ccungccaw hae tuh ramkaw khe taekhiate a um hae.

⁹Joab nynh malang te thuasah, nulang te thuasah rhaw yn tuk vae cih hae cipaw he a nyh tuh, Israel hae lungkhu e athung huaccepaw ccungccaw abang kha po hae zah, Siria hae kha tuk khylan a nung hae;

¹⁰tuhlaepaw a ccungccaw hae kha tuh Ammon hae kha tuk khylan a neitawpaw Abishai kuihkaw khe a nung hae.

¹¹Joab nynh, “Siria hae tuh ka hanlan myaryasankae a thung hae ze, nang nynh nae bawm cih; te Ammon hae tuh na hanlan myaryasankae a thung hae ze, kae ccianua cih zah kae bawm cih.

¹²Rawthungte um lah, ah ccungccaw hae hanlan te ah Pachia khua hae hanlan rawhoyte um oh sih; BAWIPAW nynh ahoy a ci thyhte cyih vae sah,” a cipya.

¹³Tetuh Joab te a kya um hae paw tuh Siria hae kha tuk khylan naenuakuh hae zah, mih malang te Siria hae tuh a ccue hae.

¹⁴Siria hae a ccue vae hae cipaw kha Ammon hae nynh he a muih hae tuh, minmin mah tuhmaminte Abishai malang te ccue hae zah khua lungkhu lang a tee hae. Te Joab tuh Ammon hae a tuknaw hae kyate yn ki zah Jerusalem yn thua.

¹⁵Thuasalama Israel hae nynh oun tae vae hae cipaw kha Siria hae nynh he a muih hae tuh, pynkheihlan bua a pumkuh hae.

¹⁶Hadadezer nynh ccungccaw saw hae zah Zufrates khuraw lang um hae paw Siria hae kha yn thuakhae hae; Hadadezer a rhawkaw hae kya-e rhawbawipaw Shobak nynh ukte cciakhae hae zah Helam kya a thua hae.

¹⁷Tuh-e tuh David kya he a hopah hae tuh, aning nynh Israel hae balyn kha pynkheihlan pumte Jordan vaw kha zua hae zah Helam a thua hae. Siria hae tuh David kha rawsete taekhiate um hae zah aning te rhaw a tukkuh hae.

¹⁸Siria hae tuh Israel hae malang a ccue hae; David nynh Siria hae marangle a ccikuh hae paw za sari te marang rhawkaw thong sung pali kha a chia hae, mih rhawbawipaw Shobak kha tuk zah tuin kya a chih.

¹⁹Hadadezer a ryalahtu siapharan hae balyn nynh Israel hae nynh oun tae vae hae cipaw he a muih hae tuh, Israel te ccawkunaw rae hae zah mih kuihkaw um hae paw lang a tang hae. Tukeiccuze Siria hae tuh rih hae zah Ammon hae kha bua bawm ngan vae khyh hae.