Read Zotung Chin 2 SAMUEL 11 Bible Online

2 SAMUEL 11 - Zotung Chin bible

2 SAMUEL 11

¹Hawnin yn thua zah siapharan hae nynh rhawtuknaw lang ccia ccyh he yn thua tuh, David nynh Joab te a kuihkaw e bawi hae te Israel hae balyn kha a saw hae; minmin nynh Ammon hae kha roh hae zah Rabbah khua kha a koihlu hae. Thuasalama David tuh Jerusalem khua kya a um.

²Nin kheit tuh zetesang khe David nynh a ikhung kyate thokuh zah siapharan inn innccuvaw kya a ccia bungthung lyakhe, tui singkuhpaw nopinung lu kheit kha innccuvaw kyate a muih; tuh-e nopinung tuh myarya a puithya.

³David nynh tuh-e nopinung kong khiatua khylan ccungccaw saw zah, “Eliam ccanung Bathsheba, Hit minphuinpaw Uriah zu nynh thua,” cite a hopya.

⁴David nynh tuh-e nopinung kha ko khylan locceihtu hae kha a saw hae, te a kalan yn thua zah amaw nynh a ikhae. (Aning tuh nopiny a nyh koute a ccikanku lya nynh thua.) Tukoute nopinung tuh a inn lang a ki.

⁵Tuh-e nopinung tuh ccaaw a poi; te David kalan ccungccaw saw zah, “Ccaaw ka hoi,” cite bya a taw.

⁶Tukeiccuze David nynh Joab kha byataw zah, “Hit minphuinpaw Uriah kha ka kalan yn saw,” a cipya. Te Joab nynh Uriah kha David kalan a saw.

⁷Uriah he yn thua tuh, David nynh Joab te ccungccaw hae konglang te rhawtuk konglang kha a khia.

⁸Te David nynh Uriah kha, “Na inn lang la cceih lah na ccu la singkuh,” a cipya. Uriah tuh siapharan inn kyate pou zah, a nulang te siapharan nynh lasung a pyasah hae.

⁹Thuasalama Uriah tuh a inn lang ki leite a bawipaw a ryalahtu hae balyn ryte siapharan inn thuakaw kyakhe a ryabua.

¹⁰“Uriah tuh a inn lang cceih khyh,” cite David kha he a hopah hae tuh, David nynh Uriah kha, “Pawccemou na inn lang na ccia khyh? Khuaccongnaw langte khaw nae thua?” a cipya.

¹¹Uriah nynh David kha, “Byakin thingkua te Israel hae te Judah hae tuh bu kya nynh a um hae; ka bawipaw Joab te ka bawipaw ryalahtu hae tuh ramkaw kya nynh a rya hae; kae tuh ae lan nia lan te ka zu ryte ikheih khylan ka inn lang ka cceih cih zawtou? Nang tuh na hiin thyhte, na hiinnaw mah a hiin thyhte, tuhcihawpaw tuh ka cyih lan khyh,” a cipya.

¹²Te David nynh Uriah kha, “Atunin mah hein kya um hin, awkhualan kae cciasah cih,” a cipya. Tukeiccuze Uriah tuh tuin nin khe Jerusalem kya a um. Awkhualan tuh,

¹³David nynh ae khylan te nia khylan a kalan ko zah a ruisah; zete tuh a bawipaw ryalahtu hae ryte ryakheih khylan a pou, thuasalama a inn lang tuh cceih khyh.

¹⁴Awkhualan awkhua tuh David nynh Joab kalan ccaw zei zah Uriah kuih kyate a ky.

¹⁵Ccaw kyakhe, “Uriah hynh rhawtuk aso huanaw malang kou khe nung lah, amaw kha tuk hae zah a chi ccaw, nulang na kitaw cih,” cite a zei.

¹⁶Joab nynh khuapi a koihlu lyakhe, mih rawthung hae paw a umnaw hae hmin cite a nynaw kyakhe Uriah kha a nung.

¹⁷Tuh-e khuapi kya-e ccungccaw hae tuh oun pou hae zah Joab te a tukkuh hae; tuh-e hae kya-e David a ryalahtu hae abang tuh a chih hae. Hit minphuinpaw Uriah mah a chihbua.

¹⁸Te Joab nynh ccungccaw saw zah rhawtuknaw konglang thongpang balyn kha David kalan a thaesah;

¹⁹tuh-e locceihtupaw kyakhe, “Rhawtuknaw konglang thongpang balyn kha siapharan kya he na hopah koute,

²⁰siapharan tuh a thinria zah nang kha, ‘Pawccemou khuapi kalan thawte na naeku oh? Khualungrua kyate oun kaw cih hae cipaw na nyh khyh oh tou?

²¹Jerusbbaal ccapaw Abimelek kha hum nynh mou a theih? Nopinung lu kheit nynh sungmia-lung avawlan e khate khualungrua kyate sawphu zah Thebez khua kya chih khyh tou? Pawccemou khualungrua kalan thawte na naeku oh?’ ae cipya ze, nang nynh, ‘Na ryalahtupaw Hit minphuinpaw Uriah mah a chih,’ cite na la hopah cih,” a cipya.

²²Tukeiccuze locceihtupaw tuh cceih zah Joab nynh ho lan a tawpaw bya balyn kha David kya a hopya.

²³Locceihtupaw nynh David kha, “Rhaw hae nynh oun tae hae zah, ramkaw khe oun pounua hae; thuasalama khua koikua teenaw kyacia bua kae dee hae.

²⁴Tetuh thekawthya hae paw nynh na ryalahtupaw kha khualungrua kyate a kaw hae; siapharan na ryalahtu hae abang tuh a chih hae; te na ryalahtupaw, Hit minphuinpaw Uriah mah a chihbua,” a cipya.

²⁵David nynh locceihtupaw kha, “Joab kyakhe, ‘E uccaw keiccuze na lungriathae nan sah, pawccecize thaloi nynh tuh atu lu kheit, tukoute lu kheit cite chia phungpaw nynh thua; khuapi kha thawte tuk oh lah, roh oh,’ a ci cite thawpyanaw bya na la hopah cih,” a cipya.

²⁶Uriah zu nynh a vawpaw a chih vae cipaw kha he a nyh tuh, rawkhuite a um.

²⁷He a rah koute, David nynh ccungccaw sawte a inn lang kosah hae zah a zu lang a tang, te ccapaw lu kheit a saahpya. Thuasalama David a cyisahnaw nynh BAWIPAW kha a lunghoysah khyh.