Read Zotung Chin 2 SAMUEL 12 Bible Online

2 SAMUEL 12 - Zotung Chin bible

2 SAMUEL 12

¹Te BAWIPAW nynh profeh Nathan kha David kalan a saw. Aning nynh David kha, “Khua khuakheit kya ccungccaw lu ning a um hae, lu kheit tuh mihoipaw thua zah ccangpaw lu kheit tuh ryachipaw nynh thua.

²Mihoipaw nynh tuuphu te vaetua phu patae a hoi;

³ryachipaw nynh tuh a rekupaw tuu nopi taraw sa kheit laelan pawpaw mah hoilae vae khyh. Tuh-e tuu nopi taraw tuh ryachipaw nynh kuakuh zah amaw ryte, a ccaaw hae ryte a lethung kheih hae; aning nynh ryachipaw looh kha leih ae zah a banang kya-e kha leih a neih, ryachipaw by vaw kya leih ih zah a ccanung hawte nynh athua.

⁴Te mihoipaw kalan khe mikhia lu kheit yn thua zah mihoipaw nynh a kalan yn thuapaw mikhiapaw tuh aepaw paccynpya khylan amaw tuuphu kya-e te vaetua phu kya-e kha chiapya lan a hysah khyh keiccuze, ryachipaw kya-e tuutaw kha lah zah, a kalan yn thuapaw mikhiapaw kha aepaw a paccynpya,” a cipya.

⁵David nynh tuh-e mihoipaw tungvaw myaryamaw a thinria zah Nathan kha, “BAWIPAW tuh a hiin thyhte, tuhte a cyihtupaw tuh chi lan accan;

⁶tuhte a cyi keiccu thuasah, ngaethya a umsah khyh keiccu thuasah tuutaw tuh leit pali a pyaru cih,” a cipya.

⁷Nathan nynh David kha, “Tuh-e paw tuh namaw nynh na thua! Israel Pachia, BAWIPAW nynh hynhte a ho: Nang kha Israel uktu siapharan lang chitui kae thuh zah Saul kuih kyate kae luesah;

⁸na bawipaw inn te na bawipaw zu hae kha na by kya kae pya, Israel ciihan te Judah ciihan kha kae pya; e hae hynh eih azya ung ze, bua kae pyachih ung cih.

⁹BAWIPAW muihnaw kya hoyleinaw rae khylan pawccemou a bya kha pawlang na ria khyh? Hit ccungccaw Uriah kha thaloi te na theih zah a zu kha na zu lang na lawku, aning kha Ammon hae thaloi te na chia.

¹⁰Kae kha pawlang nae ria khyh zah Hit ccungccaw Uriah zu kha na zu lang na lawku keiccuze na ciihan kyate thaloi tuh papin phiakuh lan khyh.

¹¹BAWIPAW nynh hynhte a ho: Namaw ciihan lungkhu toulou kyate na tungvaw kya vawsawnaw ka langsakuh cih; na zu hae kha na muihnaw kyate ka lah cih hae zah na innpaw kalan ka pya cih, e khuanin nynh a muihnaw ccaccei kyakhe aning nynh minmin kha a ikhae cih hae.

¹²Pawccecize nang nynh e uccaw hynh aruh lante na cyi; thuasalama kae nynh tuh Israel hae balyn malang te khuanin malang khe ka cyih cih,” a ci.

¹³David nynh Nathan kha, “BAWIPAW tungvaw ka sei vae,” a cipya. Nathan nynh David kha, “BAWIPAW nynh na seinaw kha ae vuapya vae, na chih lan khyh.

¹⁴Thuasalama tuhcite na cyisahnaw liate BAWIPAW kha myaryamaw pawlang na ria khyh keiccuze na saahkupaw ccaaw tuh a chih cih,” a cipya.

¹⁵Te Nathan tuh a inn lang a ki. Uriah zu nynh David a saahpyapaw ccaaw tuh BAWIPAW nynh detah zah myarya a ccih.

¹⁶Tukeiccuze David nynh imua hanlan BAWIPAW kalan a ngia; David tuh looh-aesungte alungkhu lang tee zah azi zidae laekhu kya a toukuh.

¹⁷A innbyn kya-e piccan hae nynh laekhu kyate a thoku nawlan soihbia hae zah a pe a thadynnua hae; thuasalama tho ry khyh, minmin ryte looh mah ae ry khyh.

¹⁸Nin sarinaw nin khe imua tuh a chih. David a ryalahtu hae nynh imua a chih vae cipaw hopya lan a rih hae; pawccecize minmin nynh, “Imua a hiin lya heize ah hopah oh zah oun ngaepah khyh; atu imua a chih vae cipaw kha pawtemou ah hopah ngan cih oh? Amaw toulou kha vawsawnaw a pyakuh sei cih,” a ci hae.

¹⁹Thuasalama a ryalahtu hae nynh tarytary a hoku hae paw kha David nynh he a thae tuh, imua a chih vae cipaw a ny; te David nynh a ryalahtu hae kha, “Imua tuh a chih vae tou?” cite khia hae zah, minmin nynh, “A chih vae,” a cipya hae.

²⁰Tetuh David tuh laekhu kyate thokuh zah tui a singkuh, chitui thuhkuh zah a boeining a liakuh. BAWIPAW inn lang cceih zah a beik; te a inn lang cciate aepaw ngiakuh hae zah aepaw kha paccynpah hae zah a ae.

²¹Te a ryalahtu hae nynh amaw kha, “Na cyipaw hynh pawtemou athua? Imua a hiin lya tuh imua hanlan looh-ae na sung zah na rah; imua he a chih tuh, na thokuh zah looh na ae,” a cipya hae.

²²David nynh, “Imua a hiin lya tuh looh-ae ka sung zah ka rah; pawccecize, ‘BAWIPAW nynh thaw yn ccih zah imua tuh a hiin kho ung khaw, hummou a nyh?’ ka ci.

²³Thuasalama atu imua tuh a chih vae; pawccemou looh-ae ka sung ung cih? Bua ka hiinsah kho ung cih zawtou? Kae tuh a kalan ka cceih cih, thuasalama aning tuh ka kalan yn ki vae lan khyh,” a ci.

²⁴Te David nynh a zu Bathsheba kha lungtangnaw a pya, a kalan cceih zah a ikhae; te Bathsheba nynh ccapaw saah zah David nynh Solomon cite min a phu. BAWIPAW nynh amaw kha sungsah zah,

²⁵profeh Nathan kyate bya a taw; BAWIPAW nynh a sungsah keiccuze Jedidiah[2] cite min a phu.

²⁶Joab nynh Ammon hae khua Rabbah kha tuk zah siapharan khuapi kha a law.

²⁷Joab nynh David kalan locceihtu hae kha saw hae zah, “Rabbah khua kha ka tuk vae; tuhpiaze tui alungnaw khua kha ka law vae.

²⁸Tukeiccuze atu tuhlaepaw ccungccaw hae kha pumte khua kha ryahmin tahnuakuh lah, lawtua; tuhkhyhze tuh kamaw nynh khuapi kha ka lah cih zah, ka min te khua kha ko athua vae cih,” a cipya.

²⁹Tukeiccuze David nynh ccungccaw balyn kha pynkheihlan pumte Rabbah khua lang cceih zah khua kha tuk zah a law.

³⁰Mih siapharan kya-e bawilukhung kha a lu kyate poh a khyh; tuh-e lukhung tuh sui talent ccangkheit ri zah, a lungkhu khe aphutepaw lung a um; tuh-e tuh David lu kya a khungsah hae. Aning nynh khua lungkhu e luadepaw uccaw kha mah myarya lung lan a law.

³¹Khua lungkhu um hae paw ccungccaw hae kha poukhae hae zah thing-aw, sivaw muinzung te sivaw hae khate rya a lawsah hae, ohkhe ruanaw kya mah rya a lawsah hae. Tuhcite Ammon hae kya-e khua hae balyn tungvaw kya a cyi hae. Te David te a ccungccaw hae balyn tuh Jerusalem lang a ki hae.