Read Zotung Chin 2 SAMUEL 16 Bible Online

2 SAMUEL 16 - Zotung Chin bible

2 SAMUEL 16

¹David nynh mua dung kha hary he a lawe tuh, Mefibosheth a ryalahtupaw Ziba nynh khungnin dekuhpaw lann sa ning ryte sanlou aphe za ning, misu thae aroupaw ange za kheit, hawnin thingthae za kheit te misutui saving tui-ung ccangkheit kha phu zah David kha a cciadue.

²Siapharan nynh Ziba kha, “E hae hynh pawccemou nae phu?” cite khia zah, Ziba nynh, “Lann hae hynh siapharan innbyn hae a cciku lan hae thua zah, sanlou te hawnin thingthae hynh ccangvae hae nynh a ae lan hae, te misutui hynh ramkaw kya mih thawbangpaw nynh a nia lan hae paw nynh thua,” cite a khung.

³Siapharan nynh, “Na bawipaw ccapaw teimou a um?” cite khia zah, Ziba nynh siapharan kha, “Jerusalem kya nynh a um, pawccecize aning nynh, ‘Atunin Israel hae nynh ka paaw peenaw kha yn pyathui cih hae,’ a ci,” cite a hopya.

⁴Siapharan nynh Ziba kha, “Mefibosheth kya-e balyn tuh na kya-e nynh athua vae,” a cipya. Ziba nynh, “Sawtuanaw kae pya; siapharan ka bawipaw, na malang maehoynaw ka mue vae sah,” a cipya.

⁵David Siapharan tuh Bahurim kya he a thua te, Saul puizia athuapaw Gera ccapaw, a min Shimei cikuhpaw tuh thya a lawbia lalia lante yn pou.

⁶Aning nynh David Siapharan te a ryalahtu hae balyn kha lung te a deih hae; ccungccaw balyn te athungpaw ccungccaw hae balyn tuh a voilang te a ranglang khe a um hae.

⁷Thya a law lalia lante Shimei nynh, “Pou! Pou! Ccungccaw theihpaw! Ccungccaw thyapaw!

⁸A peenaw na luapaw Saul ciihan chiise balyn tuh BAWIPAW nynh namaw tungvaw a ccawsah vae; BAWIPAW nynh peenaw kha na ccapaw Absalom kuih kya a pya vae. Dotua, nang tuh chiise luasahtu na thua keiccuze na ronaw tuh na tungvaw accah vae,” a cipya.

⁹Tetuh Zeruiah ccapaw Abishai nynh siapharan kha, “E ui chihpaw nynh siapharan ka bawipaw kha pawccemou thya a law cih? Kae ccianua sah lah, a lu khuh thoh kae pae,” a cipya.

¹⁰Thuasalama siapharan nynh, “Nanning Zeruiah ccapaw hae, nanning tuh kae te pawmou asekuh? BAWIPAW nynh aning tuh, ‘David kha thyalaw,’ a cipya keiccuze aning nynh kae kha thya yn lawpaw a la thua lanze, hum nynh mou amaw kha, ‘Pawccemou hynhte na cyi?’ cite a hopah kho cih?” a cipya.

¹¹David nynh Abishai te a ryalahtu hae balyn kha, “Ka ccapaw toulou nynh ka hiinnaw hynh yn ccung; e Benjamin phin hae thathy nynh tuh houh yn ccung hae ngawrei! Amaw um lan um sah lah, thya yn law ccaleih sah; pawccecize BAWIPAW nynh a nawpaw nynh thua.

¹²BAWIPAW nynh ka riathaenaw kha yn muihpah cih zah, atunin thya yn lawnaw hanlan hynh BAWIPAW nynh hoynaw kha poh yn pyaru kho,” a cipya hae.

¹³Tukeiccuze David te a ccungccaw hae tuh laanpi kya cceih hae zah, Shimei tuh David te arawsekunaw mua azoubungnaw kya a cceih lalia lante David kha thya a lawbia, lung te a deih bia, vuiping te mah a hei bia.

¹⁴Siapharan te a kya umpaw ccungccaw balyn tuh thawbangte Jordan vaw a thua hae; tuin kyakhe David tuh a thaw bua a umsakuh.

¹⁵Absalom te Israel hae balyn tuh Jerusalem thua hae zah, Ahithofel tuh amaw kya a umbua.

¹⁶Arki phin Hushai, David a banpaw nynh Absalom kya he a thua te, Hushai nynh Absalom kha, “Siapharan tuh a hiinshe sae vae sah! Siapharan tuh a hiinshe sae vae sah!” a cipya.

¹⁷Absalom nynh Hushai kha, “E hynh na banpaw tungvaw lungzinaw na hoipaw tou athua? Pawccemou na banpaw kya na cciabua khyh?” a cipya.

¹⁸Hushai nynh Absalom kha, “Thua khyh; BAWIPAW te e ccungccaw hae te Israel hae balyn nynh a po vae hae paw ccungccapaw kya-e ka thua cih zah, amaw kya ka umbua cih.

¹⁹Tuhpiaze, hum rya mou ka lah cih? A ccapaw rya kha thua khyh tou? Na paaw rya kha ka la law hawte namaw rya kha ka lah cih,” a cipya.

²⁰Te Absalom nynh Ahithofel kha, “Na tuanaw kha kaening oun pyatua; pawtemou ah cyih cih oh?” a cipya.

²¹Ahithofel nynh Absalom kha, “Inn ngawtu lang na paaw nynh a nungsya hae paw a lovaenung hae kha la ikhae hae; te na paaw nynh nang kha ae hua vae cipaw tuh Israel hae balyn nynh a thae cih hae zah, na kya um hae paw balyn tuh mih thaw houh asae vae cih,” a cipya hae.

²²Tukeiccuze innccuvaw khe Absalom elang bu kha a dawpya hae; te Israel hae balyn nynh a muihnaw hae khe Absalom nynh a paaw lovaenung hae kha a ikhae hae.

²³Tuh ccyh lya tuh Ahithofel nynh a pyapaw tuanaw kha Pachia bya ccaccei hawmawte a tua hae; tuhcite Ahithofel kya-e tuanaw pyanaw kha David te Absalom nynh saw a tua hae.