Read Zotung Chin 2 SAMUEL 17 Bible Online

2 SAMUEL 17 - Zotung Chin bible

2 SAMUEL 17

¹Tuhpiaze Ahithofel nynh Absalom kyakhe, “Ccungccaw thong haw lae ning kha pote atu khuazi ka la thokuh sah lah, David kha ka la deehui sah.

²A thawbang lya te a lungthang lyakhe ka la phah cih zah ka la siisakuh cih; a kya umpaw ccungccaw balyn tuh a ccue cih hae. Siapharan kyalya kha ka la theih cih zah,

³ccungccaw balyn tuh a vawpaw inn lang a cceihpaw akaenung liaccanung hawte na kalan kae kikhae cih hae. Ccungccapaw lu kheit hiinnaw kyalya kha na ccungpaw thua zah ccungccaw balyn tuh daebabi lan a um cih hae,” a cipya.

⁴Tuh-e tuanaw pyapaw bya nynh Absalom te Israel piccan balyn kha mih lungrythuasah.

⁵Tetuh Absalom nynh, “Arkhi phin Hushai kha mah oun kotua oh, ho lan a hoipaw bya kha thaebua tua oh sih,” a ci.

⁶Hushai tuh Absalom kalan he yn thua tuh, Absalom nynh amaw kha, “Ahithofel nynh hynhte a ho vae; aning nynh tuanaw oun pyapaw hawte ah cyih cih oh tou? Athua khyh ze, nang nynh oun hopya tua,” a cipya.

⁷Hushai nynh Absalom kha, “Ahithofel nynh tuanaw oun pyapaw hynh atu ccyh kya tuh hoy khyh,” a cipya.

⁸Hushai nynh po ho zah, “Na paaw te a ccungccaw hae tuh athungpaw rhawkaw hae nynh athua hae cipaw te ramkaw kya a taw lawpyapaw vong hawte myaryamaw mih thinria cipaw kha phe na ny. Tuhpiaze, na paaw tuh rhawtuk myarya thyapaw thua zah, rhawkaw hae kya khuazi rya lan khyh.

⁹Atumaw heize laekarung sankhakheit kya khyhze ccangpaw hmin sankhakheit kya a rekuh vae cih. Masaty rhawtuknaw kya aening rhawkaw hae beihtaraw a chi hae ze, tuh-e bya a thaepaw miakaw nynh, ‘Absalom a zuipaw rhawkaw hae kha patae a chia vae hae,’ cite a ho cih hae.

¹⁰Tetuh chindeih thinlung alopaw thinlung a hoi hae paw mih rawthungpaw rhawkaw hae heize myarya a rih vae cih hae; pawccecize Israel hae balyn nynh na paaw tuh a thungpaw thua zah a kya um hae paw tuh mih rawthung cipaw kha a ny hae.

¹¹Tukeiccuze hynhte tuanaw kae pya: Israel hae balyn tuh Dan kyate Beersheba kyacia, rili kin e laesia zeih alung hae paw zapi hae kha namaw kalan pum lan hae zah, rhawtuknaw kalan namaw ccaccei phe na cceihbua cih.

¹²Aning kha muih khonaw pawpaw hmin kya zemah ccianua lan zah, dangtui nynh laephi a ccawphu hawte ccawphu lan; amaw thuasah, a kya um hae paw thuasah lu kheit san hiin lan khyh hae.

¹³Khua lungkhu lang yn tee ze, Israel hae balyn nynh khua lungkhu lang liarui ccyngkute khua kya-e lung taraw ccangkheit san a laehy lei lan ciate, tuh-e khua tuh accya langkhe sue lan,” a cipya.

¹⁴Absalom te Israel ccungccaw balyn nynh, “Arkhi phin Hushai tuanaw tuh Ahithofel tuanaw laeze ahoyhua,” a ci hae. Pawccecize BAWIPAW nynh Absalom tungvaw ronaw a thuakhae nawlan, BAWIPAW nynh Ahithofel tuanaw ahoypaw kha ro khylan a paccyn vae.

¹⁵Tetuh Husai nynh ranpibawi Zadok te Abiathar kha, “Ahithofel nynh Absalom te Israel piccan hae kha hynhte khahte tuanaw a pya hae; kae nynh mah hynhte khahte tuanaw ka pya hae.

¹⁶Tukeiccuze arangte ccungccaw saw oh lah, David kha, ‘Atu khuazi ramkaw e vaw zuanaw kya la um nan, pawpawte athua zemah vaw kha po la zua; tuhkhyhze tuh siapharan te a kya umpaw ccungccaw balyn tuh maemih na thua vae cih oh,’ cite la hopah oh,” a cipya hae.

¹⁷Jonathan te Ahimaaz tuh Enrogel kya a ngaw hae; ryalahtunung lu kheit nynh leih cceih zah minmin kha a hopya hae, te minmin nynh leih cceih hae zah David Siapharan kha a hopya hae; pawccecize khua lungkhu lang a tee hae paw kha muihsakuh ry khyh hae.

¹⁸Thuasalama imuapaw lu kheit nynh minmin kha muih hae zah Absalom kha a hopya; tukeiccuze parouh mawte arangte ccue hae zah, Bahurim khua e ccungccapaw inn kya a thua hae, tuh-e paw nynh a voidu lungkhu khe tuisung ccangkheit hoi zah, tuh-e lungkhu langkhe a rungbung hae.

¹⁹Tuh-e ccungccapaw zu nynh tuisung akhu kha ahu hu zah, a vawlan khe looh a rei; tuh-e kong tuh humhung nynh mah nyh khyh.

²⁰Absalom a ryalahtu hae nynh inn kya umpaw nopinung kya he a thua hae te, “Ahimaaz te Jonathan teimou a um hae?” cite a khia hae. Nopinung nynh, “Khuraw lang phe zua vae hae,” a cipya hae. Minmin nynh ccung hae zah a muih khyh hae keiccuze Jerusalem lang a ki hae.

²¹Minmin a ki kou hae te, Ahimaaz te Jonathan tuh tuisung lungkhu te oun pou hae, te cceih hae zah David Siapharan kha a hopya hae. Minmin nynh David kha, “Thokuh lah, khuraw lang arangte zua; pawccecize Ahithofel nynh nang kha rawsete hynhte khahte tuanaw kha a pya vae,” a cipya hae.

²²Tukeiccuze David te a kya um hae paw balyn tuh thokuh hae zah Jordan vaw a zua hae; khua yn dae tuh Jordan vaw a zua leipaw lu kheit san um vae khyh.

²³Ahithofel nynh tuanaw a pya hae paw kha zui khyh hae cipaw he a muih tuh, a lann kha khungnin de zah amaw khua lang a inn lang a cceih. Innbyn khuasahkunaw kha a hopah kou hae te, amaw toulou kha a nging saekuh zah a chih; te a paaw shawku kya a uu hae.

²⁴Absalom te Israel hae balyn nynh Jordan vaw he a zua kou hae tuh, David tuh Mahanaim khua a thua vae.

²⁵Absalom nynh Amasa kha Joab ccelang rhawkaw hae uktu lang a khang. Amasa tuh Ishmael ccungccaw a min Ithra cikuhpaw ccapaw nynh thua; Ithra nynh Abigail kha zu lang a umkhae, Abigail tuh Joab nung Zeruiah a neitawnung Nahash ccanung nynh thua.

²⁶Absalom te Israel hae tuh Gilead ram kya ryahmin a tahku hae.

²⁷David tuh Mahanaim khua he a thua te, Ammon hae ram e Rabbah khuapaw Nahash ccapaw Shobi, Lodebar khuapaw Ammiel ccapaw Makhir te Gilead ccungccaw Rogelim khuapaw Barzillai nynh

²⁸ikhung hae, pakepi hae, laephi ang hae, chanvuih, barli, aepaw, thoupaw ccathae, pei hae, bia hae,

²⁹khoitui, samateitui ahaawpaw, tuu, vaetua zaw kya-e mateitui haawsahpaw kha David te a kya um hae paw nynh a ae lan hae cite a ccyngpya hae; pawccecize minmin nynh, “Rhawkaw hae tuh ramkaw kya mih vuelaw zah thawbangte tui a haw hae,” a ci hae.