Read Zotung Chin 2 SAMUEL 20 Bible Online

2 SAMUEL 20 - Zotung Chin bible

2 SAMUEL 20

¹Te Benjamin phinpaw Bikhri ccapaw Sheba cikuhpaw acouseikuhpaw lu kheit a um. Aning nynh mungkae tu zah, “Pou Israel hae, kaening tuh David kya ccoupaw kae hoi khyh, Jesse ccapaw kya rho kae hoi khyh! Ccungccaw miakaw nae bu raveih lang cceih oh,” cite a sia.

²Tukeiccuze Israel hae balyn nynh David kyate pou hae zah Bikhri ccapaw Sheba kha a zui hae; thuasalama Judah hae nynh tuh Jordan vaw kyate Jerusalem cia mih siapharan kha tynkaring lan a zui hae.

³David tuh Jerusalem khua e a inn kya a thua; siapharan nynh inn do-oih khylan a cciataw hae paw a lovae hae lu haw kha a ko hae, te rhawviatu a umpaw inn kyakhe nung hae zah a kua hae, thuasalama minmin kha ikhae khyh hae. Tukeiccuze minmin kha mih chi makhia tuin kyakhe khung hae zah nomae hawte a um hae.

⁴Siapharan nynh Amasa kha, “Nin thum lungkhu Judah hae kha ka kalan oun ko hae lah, namaw mah umbua,” a cipya.

⁵Tukeiccuze Amasa tuh Judah hae ko lan a cceih; thuasalama aning tuh accyh khyapyapaw laeze arohua.

⁶David nynh Abishai kha, “Absalom laeze Bikhri ccapaw Sheba nynh aening tungvaw vawsawnaw oun pyahua cih; na bawipaw ryalahtu hae kha hoeikute Sheba kha deehui oh, tuhkhyhze tuh aning nynh akoihkuhpaw khua hae lungkhu lang a tee cih zah, aening kyate a luesei cih,” a cipya.

⁷Abishai kha Joab ccungccaw hae, Khereth hae, Peleth hae te rhawkaw hae balyn nynh a zui hae; Bikhri ccapaw Sheba kha deehui khylan Jerusalem kyate a thokuh hae.

⁸Gibeon kya umpaw lungtungpi myarya lepaw kya he a thua hae tuh, Amasa tuh minmin te tungku khylan yn cceih. Joab tuh rhawkaw boeining kha lawkuh zah tuh-e vawlan khe thaloi kha abu ryte a tae kyakhe taeccia te a cciabiaku; malang a ccia lyakhe tuh-e tuh phe accah.

⁹Joab nynh Amasa kha, “Ka neitaw, na dan tou?” a cipya. Joab nynh Amasa kha myng khylan a ranglang kuih te a khawming kha a kyng.

¹⁰Amasa nynh Joab kuih kya umpaw thaloi kha nyh khyh; tukeiccuze Joab nynh a vue kha thuing zah a ring tuh laekhu lang ccah zah a chih. Aning nynh vae ningnaw thuing chih vae khyh. Te Joab te a neitaw Abishai nynh Bikhri ccapaw Sheba kha a deehui hae.

¹¹Joab ccungccapaw lu kheit tuh Amasa pe khe thadyn zah, “Joab kalan a panpaw miakaw te David kalan a panpaw miakaw nynh Joab kha zui oh,” a cipya hae.

¹²Amasa tuh laanluepi kya a chii kyakhe a huekuh. Laanluepi kya a cceih hae paw balyn nynh amaw kha muih hae zah a thadyn hae; ccungccaw hae balyn nynh a thadyn hae paw kha Joab ccungccapaw nynh a muih keiccuze Amasa kha laanluepi kyate ramkaw lang nue zah boei a bong.

¹³Tuhcite laanluepi kyate a nue koute tuh, Bikhri ccapaw Sheba kha deehui khylan ccungccaw balyn nynh Joab kha a zui hae.

¹⁴Sheba tuh Beth-maakah ram, Abel khua kyacia Israel phin hae balyn kalan po lekuh lan a cceih; Bikhri ccungccaw hae balyn tuh sueluakuh hae zah Joab kha a zui hae.

¹⁵Joab rhawkaw hae nynh oun cceih hae zah Beth-maakah ram, Abel khua umpaw Sheba kha a koih hae; minmin nynh khua kha marung thaenuakuh hae zah rhawlungrua kha a rawse hae. Joab rhawkaw hae nynh khualungrua kha ting khylan lae kha a thae hae.

¹⁶Te ahawpaw nopinung nynh khua lungkhu te, “Ngaetua oh! Ngaetua oh! Joab kha, ‘Hynhlang yn cceih, bya hopya kae ry,’ a ci cite hopah oh,” a cipya hae.

¹⁷Joab tuh a kalan naekuh zah, nopinung nynh, “Joab na thua tou?” cite khia zah, aning nynh, “Ka thua,” cite a khung. Te nopinung nynh Joab kha, “Na ryalahtunung bya hynh yn ngaepya tua,” a cipya. Joab nynh, “Phang ka ngae,” cite a khung.

¹⁸Te nopinung nynh, “Langmawlya tuh, ‘Abel khua kya tuanaw ngiakuh hae sah,’ cite leih a ho hae; tuhcite byathan kha leih a ccawsaku hae.

¹⁹Kae tuh Israel ram kyaze daenaw a rypaw te a lungzipaw lu kheit nynh ka thua; nang nynh Israel ram kyaze nung athuapaw khua kha ro lan na ccung; pawccemou BAWIPAW rho kha na roh cih?” a cipya.

²⁰Joab nynh, “Tuh-e tuh kae te sawkuh vae sah, khua kha ka laang lan khyh, ro mah ka roh lan khyh!

²¹Tuhcite tuh thua khyh! Efraim muaram e ccungccapaw lu kheit a min Sheba cikuhpaw Bikhri ccapaw nynh David Siapharan kha rawsete a kuih a hangnua; amaw makhae kha yn pya lah, khua kyate ka pou cih,” cite a khung. Nopinung nynh Joab kha, “Tuh-e paw a lu kha khualungrua kyate na kalan kae vuapah cih,” a cipya.

²²Te nopinung nynh ahawpaw paccynnaw te ccungccaw balyn kalan a cceih. Bikhri ccapaw Sheba lu kha pae hae zah, Joab kalan khe a vuapya hae. Joab nynh mungkae tu zah khua kyate a pou hae, mih balynte mih inn raveih lang a cceih hae, Joab tuh siapharan kalan Jerusalem lang a ki.

²³Joab tuh Israel rhawkaw balyn a uktu rhawbawi nynh thua; Jehoiada ccapaw Benaiah nynh Khereth hae te Peleth hae kha a uk hae;

²⁴Adoram tuh nangsete ryalawsahnaw kya a uktu nynh thua; Ahilud ccapaw Jehoshafat tuh ccazing kyngtu nynh thua;

²⁵Sheva tuh ryaccinkhan nynh thua; Zadok te Abiathar tuh ranpibawi hae nynh thua hae;

²⁶Jair ccungccaw Ira hynh mah David ranpibawi nynh thua.