Read Zotung Chin 2 SAMUEL 23 Bible Online

2 SAMUEL 23 - Zotung Chin bible

2 SAMUEL 23

¹E hynh David nynh nyathyakou a hopaw bya nynh thua: Jesse ccapaw, Pachia nynh a hangthungpaw, Jakob Pachia nynh chitui a thuhpaw, Israel hae elang hlaw hoypaw a phuapaw David bya tuh:

²BAWIPAW muisaw nynh kae kha mangte bya a ho, a bya tuh ka lae kya a um.

³Israel Pachia nynh a ho vae, Israel lungpi nynh yn hopya vae: Ccungccaw hae kha dingnaw te uk hae zah, Pachia rawrite a uktupaw tuh,

⁴awkhua e awnaw hawte thua zah maeking athyaapaw awkhua ccyh kya yn thuathungpaw khuanin te nynh aloku, khuaa a rah koute laephi vawlan lonua a thosahpaw awnaw te nynh aloku.

⁵Ka innbyn tuh Pachia malang tuh-e hawte thadyn khyh tou? Pawccecize kamaw ryte zungzae tynpaw byakinnaw kha a rae vae, atyn-are kha ccingsah zah a khynsah vae. Kamaw bawmnaw balyn te ka rynaw kha ccingsah leite tou a um cih?

⁶Thuasalama Pachia pawlangria lei hae paw tuh vuapaw hinpaw hawte nynh athua hae; pawccecize minmin kha kuih te law kho thua khyh hae;

⁷khah-e hae kha kyng nawlan sivaw ccong khyhze ccoi kha mang aho. Khah-e hae kha maee te khaleih soi athua hae.

⁸E hae tuh David nynh a hoipaw athungpaw rhawkaw hae nynh thua hae: Takhemon ccungccapaw Josheb-Basshebeth tuh lu thum hae kyaze lupi nynh thua; aning nynh a ccoi ccyngkute ccungccaw za tarya kha ccyh kheit kya a chia hae.

⁹Tuh-e paw koute he a zuipaw tuh Ahohi ccapaw Dodo a ccapaw Eleazar nynh thua. Rhawtuk khylan a sueluakuh hae paw Filistin hae kha minmin nynh a dou lya hae ze, aning tuh David ryte a umkheih hae. Israel hae nynh nulang a ki lya hae ze,

¹⁰aning tuh a umnaw hmin kya phang a thadyn. A kuih tuh bang zah thaloi kya phe a ngeikuh lan cia, Filistin hae kha a chia hae; BAWIPAW nynh tuin nin khe taenaw lepaw kha a rae. Israel hae tuh a chih hae paw kya-e uccaw kha khahku khylan kyalya nynh Eleazar kalan a ki hae.

¹¹Amaw koute he a zuipaw tuh Harar ccungccapaw Agi ccapaw Shammah nynh thua. Filistin hae tuh Lehi kya a sueluakuh hae, Lehi kyakhe bia ku phe abeihpaw loo a um. Israel rhawkaw hae tuh Filistin hae kyate a ccue hae.

¹²Aning nynh loo ngaelung khe thadynnaw hmin lawkuh zah, tuh-e hmin kha thungkhawte Filistin hae kha a chia hae; te BAWIPAW nynh taenaw lepaw kha a rae.

¹³Loohrue ccyh azaw takaw lyakhe mih cciakhaetu hae sung thum kya-e lu thum tuh Adullam lungkarung kya umpaw David kalan a cceih hae, tuh ccyh lyakhe Filistin hae phu kheit tuh Refaim accya kya a rya hae.

¹⁴David tuh rhawlungrua lungkhu um zah, Filistin rhawviatu rhawkaw hae tuh Bethlehem khua kya a um hae.

¹⁵David nynh a lawleih zah, “Lukhakheit nynh koikua pe umpaw Bethlehem tuisung kya-e tui kha ka nia lan yn pya ravo nyn!” a ci.

¹⁶Tetuh athungpaw rhawkaw lu thum hae nynh Filistin hae ryahmin kha roh hae zah koikua pe umpaw Bethlehem tuisung kya-e tui kha the hae zah David kalan a cciakhae hae. Thuasalama David nynh nia leite BAWIPAW malang khe moh lae zah,

¹⁷“Pou BAWIPAW , e tui hynh nia leite ka um sah. Ka chi ze ka chih cite a cceih hae paw chiise kha ka neih kho cih zawtou?” a ci. Tukeiccuze aning nynh neih khyh. Tuh-e rhawkaw hae lu thum nynh tuhcite rya a law hae.

¹⁸Joab neitaw Zeruiah a ccapaw Abishai tuh Ccungccaw Sung Thum hae kyaze lupi nynh thua. A ccoi te ccungccaw za thum kha tuk hae zah a chia hae keiccuze Lu Thum hae kya a minthaanbua.

¹⁹Aning tuh Ccungccaw Sung Thum hae kyaze a minthaan huaccepaw thua zah mih rhawbawipaw lang a tang; thuasalama Lu Thum hae hawte tuh a minthaan khyh.

²⁰Kabzeel khuapaw Jehoiada ccapaw Benaiah tuh arawthungpaw rhawkaw thua zah, ryalaw lepaw a lahtupaw nynh thua; Moab ccungccaw Ariel ccapaw hae lu ning kha a chia hae. Vuiraw accaw nin khe cceih zah laekarung lungkhu umpaw chindeih kha a chia.

²¹Izip ccungccaw apuithyapaw lu kheit kha a chia. Izip paw tuh a kuih kya ccoi a hoi; thuasalama Benaiah nynh hoitang ccyngkute ccianua zah, Izip paw kuih kya-e ccoi kha a lua koute tuh-e ccoi maw te amaw kha a chia.

²²Jehoiada ccapaw Benaiah nynh tuh-e ryalaw hae tuh lah zah athungpaw rhawkaw hae lu thum kya a minthaanbua.

²³Aning tuh ccungccaw Sung Thum hae kya a minthaanbua, thuasalama Lu Thum hae hawte tuh a minthaan khyh. David nynh a pyn rhawviatu hae lupi lang a nung.

²⁴Joab neitaw Asahel tuh ccungccaw Sung Thum hae kya a umbua; Bethlehem khuapaw Dodo ccapaw Elhanan,

²⁵Harod khuapaw Shammah, Harod khuapaw Elika,

²⁶Palti ccungccaw Helez, Tekoa khuapaw Ikkesh a ccapaw Ira;

²⁷Anathoth khuapaw Abeizer, Hushath ccungccaw Mebunnai;

²⁸Ahohi ccungccaw Zalmon, Netofah ccungccaw Maharai,

²⁹Netofah ccungccaw Baanah ccapaw Heled, Benjamin phin hae khua Gibeah ccungccaw Ribai a ccapaw Ittai,

³⁰Pirathon ccungccaw Benaiah, Gaash pe umpaw accya e ccungccaw Hiddai,

³¹Arbath ccungccaw Abialbon, Bahurim ccungccaw Azmaveth,

³²Shaalbon ccungccaw Eliahba, Jashen ccapaw hae: Jonathan,

³³Harar ccungccaw Sharar ccapaw Ahiam,

³⁴Maakah ccungccaw Ahasbai ccapaw Elifelet, Gilon ccungccaw Ahithofel ccapaw Eliam,

³⁵Karmel ccungccaw Hezro, Arbi ccungccaw Paarai,

³⁶Zobah ccungccaw Nathan ccapaw Igal, Gad ccungccaw Bani,

³⁷Ammon ccungccaw Zalek, Zeruiah ccapaw Joab a rhawtuk-zunghe ccyngtu Beeroth khuapaw Naharai,

³⁸Ithri ccungccaw Ira, Ithri ccungccaw Gareb,

³⁹Hit ccungccaw Uriah: mih balynte sung thum lu sari acih hae.