Read Zotung Chin 2 SAMUEL 24 Bible Online

2 SAMUEL 24 - Zotung Chin bible

2 SAMUEL 24

¹Israel hae tungvaw kya BAWIPAW thinrianaw tuh maee lang rua zah, minmin kha rawsete aning nynh David kha tuhou zah, “La cceih lah, Israel te Judah ccungccaw hae kha milu ria hae,” a cipya.

²Tukeiccuze siapharan nynh Joab te a kya umpaw rhawbawi hae kha, “Israel phin hae balyn kalan khe, Dan kyate Beersheba kyacia, po lekuh lan la cceih oh lah, ccungccaw hae kha la ria oh, ccungccaw hohzeihmou a um hae cipaw ny ka ry,” a cipya hae.

³Thuasalama Joab nynh siapharan kha, “BAWIPAW na Pachia nynh ccungccaw hae kha aleit za kheit pungzaesah hae sah lah, tuh-e tuh siapharan ka bawipaw nynh a mit te muih kho hin vae sah! Thuasalama siapharan ka bawipaw nynh pawccemou hynh-e ryalaw hynh law na ry?” a cipya.

⁴Thuasalama siapharan bya nynh Joab te rhawbawi hae kha a tae hae. Tukeiccuze Joab te rhawbawi hae tuh Israel ccungccaw hae kha milu ria khylan siapharan malang te a cceih hae.

⁵Jordan vaw kha zuate Aroer khua te accya ngaelung umpaw khua kyate Gad langkhe thokuh hae zah, Jazer khua lang po a cceih hae.

⁶Te Gilead te Hit hae ram kya umpaw Kadesh kya a thua hae; te Dan a thua hae, Dan kyate Sidon ram lang kouleih hae zah,

⁷Tair rhawlungrua te Hiv hae te Kanaan hae khua miakaw kya a thua hae; te Judah ram Neged langkhe cceih hae zah Beersheba kyacia a thua hae.

⁸Tuhcite ram pynpi balyn cceih hae zah sawpaw sah takua te nin kuin aro kou hae te Jerusalem bua a thua hae.

⁹Joab nynh milu ccazing a law hae paw kha siapharan a pya: Israel ram kya thaloi kyng khopaw milu cciing tarya um zah, Judah ram kya milu cciing pangaw a um.

¹⁰Thuasalama David nynh ccungccaw milu a ria koute a lungvaw asaw. David nynh BAWIPAW kha, “Ka cyipaw kya myaryamaw ka sei vae. Pou BAWIPAW , na kalan saw ka sang, na ryalahtupaw ka cyiseinaw hynh beih yn vuapah; pawccecize myarya lepaw ngaeenaw rya kha ka lawsei vae,” a cipya.

¹¹David nynh awkhualan awkhua he a tho te, BAWIPAW bya tuh David a profehpaw Gad kalan yn thua zah,

¹²“La cceih lah, David kha la hopah: BAWIPAW nynh hynhte a ho: Uccaw ccangthum kae pya, tuin kya-e ccangkheit kha pokuh lah, tuh-e tuh na tungvaw ka cyih cih, a ci cite la hopah,” a cipya.

¹³Tukeiccuze Gad nynh David kalan cceih zah, “Na ram kya kum thum lungkhu ccakanccinaw pui tou? Tuhkhyhze sawpaw sah thum lungkhu rhaw hae nynh deekute na rhaw hae kyate ccue tou? Tuhkhyhze na ram kya nin thum lungkhu shethya thua tou? Yn sawtupaw kalan ka kikhaepya lanpaw aphi kha hoyte tua lah, byapaeku tua,” a cipya.

¹⁴David nynh Gad kha, “Myarya lepaw lungriathaenaw kya nynh ka um; BAWIPAW kuih kya ccah oh sih, pawccecize a thawccinaw tuh myarya ale; thuasalama ccungccaw kuih kya tuh ka ccah nan sah,” a cipya.

¹⁵Tukeiccuze BAWIPAW nynh awkhua te accyh khyapaw kyacia Israel hae tungvaw kya shethya thuasah zah, Dan kyate Beersheba kyacia ccungccaw thong sung sari achih.

¹⁶Vaawpaw nynh Jerusalem kha ro khylan a kuih he a dyngnua tuh, tuh-e hoyleinaw konglang te BAWIPAW tuh ngaesikuh zah, ccungccaw hae kalan ronaw a thuakhaepaw vaawpaw kha, “Azaw vae; na kuih kha khin ccavae,” a cipya. Te BAWIPAW vaawpaw tuh Jebus ccungccaw Araunah kya-e huimin pe khe a um.

¹⁷Ccungccaw hae a theihpaw vaawpaw kha David nynh he a muih tuh, aning nynh BAWIPAW kha, “Ka makhae kyalya nynh ka sei, ka makhae kyalya nynh hoyleinaw kha ka rae; e tuu hae nynh pawmou a cyi hae? Na kuih tuh kae te ka paaw innbyn tungvaw kya um vae sah, cite ka ngiaku,” a cipya.

¹⁸Tuin nin khe Gad nynh David kalan yn cceih zah, “Cceih lah, Jebus ccungccaw Araunah kya-e huimin kyakhe BAWIPAW hanlan silawhang kha raepah,” a cipya.

¹⁹Gad bya thyhte, David tuh BAWIPAW nynh kaw a pya hawte a cceihthung.

²⁰Araunah nynh he a do tuh, siapharan te a ryalahtu hae nynh amaw kalan oun ccia hae paw kha a muih; te Araunah nynh pou zah siapharan malang laekhu kya a bakhung.

²¹Araunah nynh, “Siapharan ka bawipaw nynh pawccemou na ryalahtupaw kalan nae ccia?” a cipya. David nynh, “Ccungccaw hae kya shethya hynh adae ccaw cite, BAWIPAW hanlan silawhang raepya nawlan na huimin hynh re khylan nynh kae ccia,” a cipya.

²²Araunah nynh David kha, “Siapharan ka bawipaw nynh ahoy na ci hawte lawkuh lah, silawtua; maee-ute silawnaw lanpaw tangnuapaw hae a um; maeething lanpaw tuh looh tinnawpaw thing te tangnuapaw taphu hae a um.

²³Pou siapharan, e hae balyn hynh Araunah kae nynh siapharan kha kae pya,” a cipya. Te Araunah nynh siapharan kha, “BAWIPAW na Pachia nynh ae ccoupah vae sah,” a cipya.

²⁴Thuasalama siapharan nynh Araunah kha, “Thua khyh, amee pyate kae re cih; BAWIPAW ka Pachia hanlan amee pya leipaw maee-ute silawnaw kha ka rae lan khyh,” a cipya. Tukeiccuze David nynh huimin te tangnuapaw hae kha ngunphua shekel sung pangaw te a re.

²⁵David nynh tuin kyakhe BAWIPAW elang silawhang kha rae zah, maee-ute silawnaw te ccawkunaw silawnaw kha a rae. Tukeiccuze ram hanlan a ngiapaw kha BAWIPAW nynh thaepah zah, Israel ram kyate shethya tuh a daesah.