Read Zotung Chin 2 SAMUEL 5 Bible Online

2 SAMUEL 5 - Zotung Chin bible

2 SAMUEL 5

¹Israel phin hae balyn nynh Hebron khua umpaw David kalan oun thua hae zah, “Dotua, kaening tuh na ru te na saw nynh kae thua.

²Anuhlang lya, Saul nynh siapharan lang oun tangpya lyaze, Israel hae oun poukhaetu te oun teekhaetu tuh namaw nynh na thua. BAWIPAW nynh nang kha ae hopah zah: ‘Nang tuh ka ccungccaw Israel hae tuurin na thua cih zah, Israel hae uktu na thua cih,’ ae cipya,” cite a hopya hae.

³Tuhcite Israel piccan hae balyn tuh Hebron khua umpaw David kalan a thua hae; David siapharan tuh Hebron khua BAWIPAW malang khe minmin ryte byakinnaw rae zah, David kha Israel siapharan lang chitui a thuh hae.

⁴David nynh siapharan lang a tang takaw lya tuh kum sung thum acih vae, kum sung pali lungkhu siapharan lang a tang.

⁵Hebron khua kya Judah ram kha kum sari sah taruh a uk; Jerusalem khua kya Israel ram balyn te Judah ram kha sung thum kum thum a uk.

⁶Siapharan te a ccungccaw hae tuh Jebus hae kha dou khylan Jerusalem lang a cceih hae, ram lungkhu um hae paw nynh David kha, “Hynhlang nae tee lan khyh, mitzu hae te ccukhou hae nynh heize nang kha ae khee kho cih hae,” a cipya hae—minmin nynh, “David nynh hynhlang tee kho lan khyh,” cite a tua hae.

⁷Thuasalama atu David khua a ci hae paw Zion rhawlungrua kha David nynh a law.

⁸David nynh tuin nin khe, “Jebus hae kha chia a rypaw miakaw nynh, David nynh a hua hae paw mitzu hae te ccukhou hae kha tuk khylan, tuizypi kha po kae hae sah,” a ci. Tukeiccu nynh tuh-e tuh, “Mitzu hae te ccukhou hae nynh BAWIPAW inn lungkhu lang tee lan khyh hae,” cite a honaw hae paw athua.

⁹David tuh rhawlungrua lungkhu khe um zah, tuh-e tuh David khua cite min a phu. David nynh khua kha Millo kyate alungkhu lang cia po voilu lan a koih.

¹⁰BAWIPAW , vaaw Pachia tuh David kya a um keiccuze aning tuh houhouh a lesae.

¹¹Tair siapharan Hiram nynh locceihtu hae kha sidar thing hae, lehccama hae te pazan thya hae paw ryte David kalan saw hae zah, minmin nynh David kha inn a sakpya hae.

¹²BAWIPAW nynh David kha Israel siapharan lang a khangpaw te a ccungccaw Israel hae hanlan a peenaw a hangthungpaw kha David nynh a ny.

¹³David tuh Hebron khua te a nuekuh koute, Jerusalem khua khe zupi hae te lovae hae kha hoikuh chih zah, David nynh ccanung ccapaw hae kha a saahku hae.

¹⁴Jerusalem kya a saah hae paw a ccapaw hae min tuh: Shammua, Shobab, Nathan, Solomon,

¹⁵Ibhar, Elishua, Nefeg, Jafia,

¹⁶Elishama, Eliada te Elifelet nynh thua hae.

¹⁷David tuh Israel siapharan lang chitui a thuh vae hae cipaw kha Filistin hae nynh he a thae hae te, Filistin hae balyn nynh David kha ccung khylan a cceih hae; tuh-e konglang tuh David nynh thae zah rhawlungrua kalan a cceih.

¹⁸Filistin hae tuh oun cceih hae zah Refaim accya khe pong pazaekuh lante a um hae.

¹⁹David nynh BAWIPAW kha khia zah, “Filistin hae kha tuk lan ka ccianua thung cih hae tou? Minmin kha ka kuih kalan nae pya cih hae tou?” a cipya. BAWIPAW nynh David kha, “Ccianua thung hae; pawccecize Filistin hae kha na kuih kalan kae pya ccaccing cih,” a cipya.

²⁰Tukeiccuze David tuh Baal-perazim lang cceih zah, tuin kyakhe minmin kha a tae hae. David nynh, “BAWIPAW nynh ka rhaw hae kha avuakuhpaw tuileih hawte ka malang khe a vuasaku vae hae,” a ci. Tukeiccuze tuh-e hmin tuh Baal-perazim cite a ko hae.

²¹Filistin hae nynh mih zohtuh hae kha tuin kya vuasya hae zah, David te a ccungccaw hae nynh a law hae.

²²Filistin hae tuh bua oun cceih hae zah, Refaim accya khe pong pazaekuh lante a um hae.

²³David nynh BAWIPAW kha he a khia tuh, “Na cceihthung lan khyh; mih nulang te koihlu hae lah, balsam thing hae te arawsekunaw kyakhate na naangbia cih hae.

²⁴Balsam thing dung hae kyakhe ccu cciapaw siho kha he na thae te, na naangbia vae cih hae; pawccecize Filistin rhawkaw hae kha chia khylan BAWIPAW tuh na malang a cceih lalo vae,” a cipya.

²⁵BAWIPAW nynh kaw a pya thyhte David nynh cyih zah, Filistin hae kha Geba kyate Gezer kyacia po a chia hae.