Read Zotung Chin 2 SAMUEL 6 Bible Online

2 SAMUEL 6 - Zotung Chin bible

2 SAMUEL 6

¹David nynh Israel hae kya-e popaw ccungccaw hae thong sung thum kha bua a pum hae.

²Cherubim[1] vawlan a umpaw vaaw BAWIPAW min te ko athuapaw Pachia thingkua kha Judah ram Baalah khua kyate cciakhae khylan David te a kya um hae paw balyn tuh thokuh hae zah a cceih hae.

³Pachia thingkua kha vaetuale thawpaw kya khang hae zah mua vawlan umpaw Abinadab inn kyate a poukhae hae. Abinadab ccapaw hae Uzzah te Ahio nynh

⁴Pachia thingkua a umpaw vaetuale thawpaw kha a mawng hae; Ahio tuh thingkua malang khe a cceih.

⁵David te Israel hae balyn tuh hlaw, tintang, tyng, daw te lanchi hae khate mih thawzung balynte BAWIPAW malang khe a law hae.

⁶Nakon huimin kya he a thua hae te, tangnuapaw hae nynh Pachia thingkua kha a thyngbia hae keiccuze Uzzah nynh a kuih dyng zah thingkua kha a kyng.

⁷BAWIPAW tuh Uzzah tungvaw myarya a thinria; thingkua kalan a kuih a dyng keiccuze Pachia nynh detah zah, Pachia thingkua pe khe a chih.

⁸Pachia nynh Uzzah tungvaw a thinria zah de a tah keiccuze David tuh a thinria; tukeiccuze tuh-e hmin tuh atunin cia Perez-uzzah cite a ko hae.

⁹Tuin nin khe David nynh BAWIPAW kha rih zah, “BAWIPAW thingkua hynh pawtemou ka kalan a thua kho cih?” a ci.

¹⁰Tukeiccuze David nynh BAWIPAW thingkua kha David khua lungkhu lang teekhae ry khyh; David nynh Git khuapaw Obed-edom inn langkhe a cciakhae.

¹¹BAWIPAW thingkua tuh Git khuapaw Obed-edom inn kya sawpaw sah thum a um; BAWIPAW nynh Obed-edom te a innbyn hae balyn kha hythua a pya hae.

¹²“Pachia thingkua liate Obed-edom a innbyn hae te a inn um hae paw balyn tuh BAWIPAW nynh hythua a pya hae,” cite David Siapharan kha a hopya hae. Tukeiccuze David nynh cceih zah Pachia thingkua kha Obed-edom inn kyate David khua lang lungpawte a cciakhae;

¹³BAWIPAW thingkua a puihtu hae nynh kaw taruh he a kaw hae te, tangnuapaw sa kheit te sahiin athopaw sa kheit khate si a law.

¹⁴David nynh BAWIPAW malang khe a thawzung balynte a law; David tuh laaw te kuakuhpaw ranpibawi angki a kikuh.

¹⁵Tuhcite David te Israel hae balyn nynh sia biate, mungkae tu biate BAWIPAW thingkua kha a cciakhae hae.

¹⁶BAWIPAW thingkua tuh David khua lungkhu he a thua lyakhe, Saul ccanung Mikhal nynh thanlan-aw kyate do zah, David Siapharan tuh BAWIPAW malang khe thohkute a lawpaw kha muih zah a thinlung kyate a theihrya.

¹⁷BAWIPAW thingkua kha teekhae hae zah, David nynh a sakpyapaw bu lungkhu, amaw hmin kyakhe a nung hae; te David nynh BAWIPAW malang khe maee-ute silawnaw te ccawkunaw silawnaw kha a rae.

¹⁸David nynh maee-ute silawnaw te ccawkunaw silawnaw kha a rae koute, vaaw BAWIPAW min te ccungccaw hae kha hythua a pya hae,

¹⁹te ccungccaw balyn kha looh a nee hae, Israel zapi hae, nopi pise hae balyn kha sanlou phe kheit, saw nge kheit te misu thae aroupaw phe kheit cci kha ccarou a nee hae. Tukoute ccungccaw hae balyn tuh mih inn lang a ki hae.

²⁰David tuh a innbyn hae kha hythuapya khylan a ki. Saul ccanung Mikhal tuh David te tungku khylan yn pou zah, “A thualahpaw ccungccaw nynh maethya ny leite a boeining a kalyngku hawte, atunin a ryalahtu hae kya-e ryalahtunung hae malang khe a boeining kalyngkute Israel siapharan tuh atunin kya hohcih baban mou sawtuanaw a raeku!” a ci.

²¹David nynh Mikhal kha, “Na paaw te a innbyn hae balyn hanpaw kae kha yn po zah, BAWIPAW ccungccaw hae, Israel hae a uktu bawi lang yn nungpaw BAWIPAW malang khaw ka langku, BAWIPAW malang ka law cih.

²²E laeze theihrya lan umpaw kha ka cyih ung cih, kamaw mit kya heize ka thethah cih; thuasalama na ho hae paw ryalahtunung hae liate sawtuanaw ka ccou cih,” a cipya.

²³Te Saul ccanung Mikhal tuh a chi nin cia ccaawsaah khyh.