Read Zotung Chin 1 SIAPHARAN 11 Bible Online

1 SIAPHARAN 11 - Zotung Chin bible

1 SIAPHARAN 11

¹Solomon Siapharan nynh ramccang nopi patae kha a ry: Faro ccanung, Moab hae, Ammon hae, Edom hae, Sidon hae te Hit hae kya-e nopi hae kha a ry hae;

²BAWIPAW nynh Israel hae kha, “Nanning nynh ramccang hae kha zuvaw lang na umkhae lan khyh oh, minmin nynh mah zuvaw lang ae umkhae nan oh sah; pawccecize minmin nynh nae thinlung kha mih pachia hae kalan solei ae maekhaekuh cih oh,” cite a la hopya hae paw minphuin hae kya-e nopi hae kha Solomon nynh ry hae zah a sungsah hae.

³Bawi ccanung athua hae paw zu za sari te lovae za thum kha a hoi; a zu hae nynh a thinlung kha ccanglang a maesaku hae.

⁴Solomon he a taw tuh, a zu hae nynh a thinlung kha ccangpaw pachia hae kalan a maesaku hae; a paaw David thinlung hawte thua leite, BAWIPAW a Pachia tungvaw kya a lungtyn khyh.

⁵Pawccecize Solomon nynh Sidon hae khozinung Astartes te Ammon hae pachia anungsikuhpaw Milkom kha a zui hae.

⁶Tuhcite Solomon nynh BAWIPAW muihnaw kya ahoy leipaw kha rae zah, a paaw David nynh a cyi hawte cyi leite, BAWIPAW kha a thinlung balynte zui khyh.

⁷Solomon nynh Jerusalem nithua lang e mua vawlan khe Moab hae khozi anungsikuhpaw Khemosh hanlan te Ammon hae pachia anungsikuhpaw Molek hanlan ahangpaw hmin kha a rae.

⁸Tuhmaminte ramccang ccungccaw a zu hae balyn hanlan raepah hae zah, minmin nynh mih pachia hae kalan mynkhuhpaw u hae zah si a law hae.

⁹BAWIPAW tuh Solomon tungvaw a thinria, pawccecize amaw kalan vae ning yn langkuh zah,

¹⁰ccangpaw pachia hae kha na zui lan khyh cite kaw a pyatupaw BAWIPAW , Israel Pachia kyate a thinlung tuh ccanglang maekuh zah BAWIPAW nynh kaw a pyapaw kha zui khyh.

¹¹Tukeiccuze BAWIPAW nynh Solomon kha, “E hynh na thinlung kya um zah, kaw kae pyapaw ka byakinnaw te ka phungbya hae kha na zui khyh keiccuze na kyate peenaw hynh ka lah ccaccing cih zah na ryalahtupaw kalan ka pya cih.

¹²Thuasalama na paaw David keiccuze tuh-e tuh na she lungkhu kya ka cyih lan khyh, na ccapaw kuih kyate ram hynh ka lah cih.

¹³Tuhzemah ram hynh abalynte ka lah lan khyh, ka ryalahtu David te ka popaw Jerusalem khua keiccuze minphuin phuin kheit kha na ccapaw kalan ka pya cih,” a cipya.

¹⁴BAWIPAW nynh Solomon a rawsepaw Edom ccungccaw Hadad kha a tuhou; aning tuh Edom ram kya bawi phin nynh thua.

¹⁵Pawccecize David nynh Edom ram a um lyaze a rhawbawipaw Joab nynh a chih hae paw rhua uu khylan he a cceih tuh, Edom ram e pise miakaw kha a chia hae,

¹⁶(pawccecize Joab te Israel hae balyn tuh Edom ram e pise miakaw a chia mawlaezung hae tuin kya sah taruh a um hae);

¹⁷thuasalama Hadad tuh a di lyaze a paaw ryalahtu Edom hae abang ryte Izip ram lang a la ccue hae.

¹⁸Midian ram kyate pou hae zah Paran ram a thua hae; Paran kyate ccungccaw abang hoeikute Izip siapharan Faro kya a thua hae; aning nynh inn te looh kha pya zah laephi kha mah a pya.

¹⁹Hadad nynh Faro kha myarya a lung a tung; tukeiccuze a zu Tahpenes a neitawnung kha zu lang a pya.

²⁰Tahpenes neitawnung nynh ccapaw Genubath kha saah zah, imua tuh Faro inn kyakhe Tahpenes nynh mateitui a phia; Genubath tuh Faro ccaaw hae ryte Faro inn kya a umkheih hae.

²¹David tuh a minpaaw hae kya ihbua vae zah rhawbawipaw Joab tuh a chih vae cipaw kha Hadad nynh he a thae tuh, Hadad nynh Faro kha, “Kamaw ram lang kinaw kaw beih yn pya,” a cipya.

²²Thuasalama Faro nynh, “Namaw ram lang ki ry lan ciate ka kya ahoboupaw pawmou a um?” cite khia zah, Hadad nynh, “Um khyh, kinaw kaw beih yn pya,” a cipya.

²³Pachia nynh Solomon a rawsetu lang mingccangpaw, Eliada ccapaw Rezon kha a tuhou, aning tuh a bawipaw Zobah siapharan Hadadezer kyate a ccuepaw nynh thua.

²⁴David nynh Zobah khuapaw kha a theih koute, aning nynh zuitu hae kha amaw kalan pum hae zah, luadetu phu kya lu lang a tang; minmin tuh Damaskas khua lang cceih hae zah tuin kya a um hae, te amaw kha Damaskas khua kya siapharan lang a khang hae.

²⁵Solomon she balyn kya Rezon tuh Israel rhaw lang tang zah, Hadad nynh a cyi hawte vawsawnaw kha a rae; Siria ram kha uk zah Israel kha a hua.

²⁶Solomon ryalahtu lu kheit, Efraim phin, Zeredah khuapaw, Nebah ccapaw Jeroboam nynh mah siapharan kha a dou, a nung tuh Zeruah cikuhpaw nomaenung nynh thua.

²⁷Aning nynh siapharan a rawsenaw kong tuh akawlan thyhte nynh thua. Solomon nynh Millo khua kha rae zah, a paaw David khua kya-e khualungrua a uanaw kha a ping.

²⁸Jeroboam tuh rya a lah khopaw nynh thua, ryalaw a zuakuhpaw ccangvae nynh thua cipaw kha Solomon nynh he a muih tuh, Josef ciihan hae nynh a law hae paw nangsepaw ryalaw balyn kyakhe a do-oihtu lang a nung.

²⁹Tuh lya loukaw khe, Jeroboam tuh Jerusalem lang a ccia lyakhe Shilon khuapaw profeh Ahijah nynh laanpi kya a muih. Ahijah tuh boeining thawpaw a lawkuh. Mih lu ning kyalya te ramkaw a um lya hae khe,

³⁰Ahijah nynh a lawkupaw boeining thawpaw kha kyng zah ccanghaw lae ning lang a seii.

³¹Aning nynh Jeroboam kha: E aseiikuhpaw ccanghaw hynh lawkuh; pawccecize BAWIPAW , Israel Pachia nynh, “Dotua, peenaw hynh Solomon kuih kyate ka seii cih zah, minphuin phuin haw kha nang kae pya cih.

³²Ka ryalahtu David te Israel phin hae balyn kyate ka popaw Jerusalem khua keiccuze phin phinkheit hynh tuh Solomon nynh a ccou cih.

³³Aning nynh kae kha yn vua zah Sidon hae khozinung Astartes, Moab hae pachia Khemosh te Ammon hae pachia Milkom kha beik zah ka laanpi kha zui khyh, a paaw David nynh ka muihnaw kya ahmepaw a cyi hawte aning nynh cyi khyh zah, ka phungbya hae te ka phungzae hae kha a paaw nynh a zui hawte zui khyh.

³⁴Tuhzemah a kuih kyate peenaw kha abalynte ka lah lan khyh; ka po zah ka kawbya hae te ka phungbya hae a zuipaw ka ryalahtu David keiccuze Solomon tuh a she lungkhu balyn uktu lang ka nung cih;

³⁵thuasalama a ccapaw kuih kyate peenaw kha ka lah cih zah nang kha kae pya cih—minphuin phuin haw kha kae pya cih.

³⁶Thuasalama ka min nung nawlan ka popaw Jerusalem khua kya ka malang khe ka ryalahtu David nynh maeekhua zungzae a hoi nawlan, a ccapaw kha minphuin phuin kheit ka pya cih.

³⁷Nang kha kae po cih zah na rypaw balyn kha na uk cih; nang tuh Israel hae a uktu siapharan lang na tang cih.

³⁸Nang nynh kaw kae pyapaw balyn kha na ngae zah, ka ryalahtu David hawte ka laanpi kya zuite, ka phungbya hae te ka kawbya hae kha na zui zah ka muihnaw kya ahmepaw kha na cyi zetuh, na kya ka um cih zah David elang ka sak hawte atynpaw inn kae sakpah cih zah Israel kha kae pya cih.

³⁹E keiccuze David ciihan hae kha de ka tah cih hae, thuasalama zungzae tuh thua lan khyh,” a cipya.

⁴⁰Tukeiccuze Solomon nynh Jeroboam kha chia lan a zuaku; thuasalama Jeroboam tuh Izip ram lang, Izip siapharan Shishak kalan palou ccue zah Solomon a chi mawlaezung Izip ram kya a um.

⁴¹Solomon nynh a cyipaw tuhlaepaw balyn te a hawnaw tuh Solomon Ryalawnaw Ccauh kyakhe a zei hae.

⁴²Solomon nynh Jerusalem khua kya um zah Israel ram balyn kha kum sung pali a uk.

⁴³Solomon tuh a minpaaw hae kya ihbua zah a paaw David khua kya a uu hae; a ccapaw Rehoboam tuh amaw koute siapharan lang a tang.