Read Zotung Chin 1 SIAPHARAN 18 Bible Online

1 SIAPHARAN 18 - Zotung Chin bible

1 SIAPHARAN 18

¹Ccyh khaw cia ro zah kum thumnaw kum khe, BAWIPAW bya tuh Elijah kalan yn thua zah, “La cceih lah, Ahab kha la muihsakuh; laephi vawlan khuaa ka rawsah cih,” a cipya.

²Tukeiccuze Elijah tuh Ahab kalan muihsahku khylan a cceih. Samaria ram kya ccakan accih.

³Ahab nynh siapharan inn do-oihtu Obadiah kha a ko. (Obadiah tuh BAWIPAW kha myarya saw a tuapaw nynh thua;

⁴Jezebel nynh BAWIPAW profeh hae kha he a theih hae tuh, Obadiah nynh profeh za kheit kha ko hae zah, sung pangaw ccite lungkarung kya thuruh hae zah tui te looh a pya hae.)

⁵Te Ahab nynh Obadiah kha, “Ram lungkhu po lekuh lan, tuidy hae balyn te vaw hae balyn kalan khe la cciatua; sahiin hae abang kha shung leite, marang hae te lann hae a hiin nawlan hae, aening nynh lonua hae kha ah muihpah kho oh,” a cipya.

⁶Tukeiccuze ram kha po lekuh lan ccia khylan neekuh hae zah, Ahab tuh amaw ccangte voikheih lang cceih zah, Obadiah mah amaw ccangte ccanglang a cceih.

⁷Obadiah tuh laanpi kya a ccia lyakhe Elijah nynh amaw kha yn tungku; Obadiah nynh Elijah kha a syntaw, te bakhungpah zah, “Nang hynh ka bawipaw Elijah na thua khaw?” a cipya.

⁸Elijah nynh, “Kamaw nynh ka thua. Na bawipaw kalan la cceih lah, e kya Elijah mang um cite la hopah,” a cipya.

⁹Te Obadiah nynh, “Na ryalahtupaw kae hynh chia khylan Ahab kuih kalan pya lan ciate pawtemou ka sei?

¹⁰BAWIPAW na Pachia tuh a hiin thyhte, nang kha ccung khylan ka bawipaw nynh yn saw leinaw ram te minphuin um vae khyh; minmin nynh, ‘E kya Elijah um khyh,’ cite a ho vae hae ze, nang kha kae muih khyh cite tuh-e ram te minphuin kha thya leih a lawsahku hae.

¹¹Te atu tuh nang nynh, ‘La cceih lah, e kya Elijah mang um cite na bawipaw kha la hopah,’ nae cipya.

¹²Namaw kyate he ka cceih takaw te, BAWIPAW muisaw nynh nang kha ka ny leinaw hmin lang ae cciakhae cih; tukeiccuze Ahab kha ka hopah zah nang kha he ae muih kho khyh te, kae hynh yn theih vae cih, na ryalahtupaw kae tuh ka di lya mawte BAWIPAW kha saw ka tua vae.

¹³Jezebel nynh BAWIPAW profeh hae a chia lya hae ze, pawtemou BAWIPAW profeh hae za kheit kha sung pangaw ccite lungkarung kya ka thuruh hae zah tui te looh ka pya hae cipaw kha ka bawipaw nang hynh ae hopah khyh hae tou?

¹⁴Atu tuh nang nynh, ‘La cceih lah, e kya Elijah mang um cite na bawipaw kha la hopah,’ nae cipya; aning nynh solei yn theih vae cih,” a cipya.

¹⁵Elijah nynh, “Ka beikpaw BAWIPAW tuh a hiin thyhte, atunin Ahab malang ka langkuh ccaccing cih,” a ci.

¹⁶Tukeiccuze Obadiah nynh Ahab kalan cceih zah a hopya; te Ahab tuh Elijah te tungku khylan a cceih.

¹⁷Ahab nynh Elijah kha he a muih te, “Nang hynh Israel kha vawsaw a pyatu na thua tou?” a cipya.

¹⁸Elijah nynh, “Kae nynh Israel kha vawsaw ka pya khyh; nang te na paaw ciihan hae nynh khaw na pya oh, pawccecize BAWIPAW kawbya hae kha na vua oh zah Baal hae kha na zui oh.

¹⁹Tukeiccuze Israel balyn, Baal profeh hae za pali sung pangaw te Jezebel ccaboi kya a ae hae paw Asherah profeh hae za pali kha kamaw kalan Karmel Mua kya oun pum oh,” a cipya hae.

²⁰Tukeiccuze Ahab nynh Israel hae balyn kalan ccungccaw saw zah, profeh hae tuh Karmel Mua kya a sueluakuh hae.

²¹Elijah tuh ccungccaw balyn kalan yn naekuh zah, “Alokuh leipaw tuanaw ccangning khate hohseciamou ccubae te na cceih ung cih oh? BAWIPAW tuh Pachia athua ze, amaw kha zui oh; thuasalama Baal tuh Pachia athua ze, amaw kha zui oh,” a cipya hae. Te ccungccaw hae nynh bya kaw kheit san khung khyh hae.

²²Tetuh Elijah nynh ccungccaw hae kha, “BAWIPAW profeh tuh kamaw kyalya nynh ka um vae; thuasalama Baal profeh hae tuh za pali sung pangaw a um hae.

²³Tangnuapaw sa ning kha kaening kalan oun cciakhae oh; minmin nynh tangnuapaw sa kheit kha pokuh hae sah, ditaraw lan pong be hae sah lah, thing vawlan khe nung hae sah, maee tyh nan hae sah; te kae nynh mah ccangpaw tangnuapaw sa kheit kha ka be cih zah thing vawlan khe ka nung cih, maee ka tyh lan khyh.

²⁴Te nanning nynh nae pachia min kha na ko cih oh zah kae nynh BAWIPAW min kha ka ko cih; maee te oun leihrupaw pachia tuh Pachia ccaccing nynh thua,” a cipya hae. Ccungccaw hae balyn nynh, “Na hopaw tuh ahoy!” a ci hae.

²⁵Te Elijah nynh Baal profeh hae kha, “Nanning tuh na lung oh keiccuze tangnuapaw sa kheit kha pokuh ty oh lah paccyn oh, te maee tyh leite nae pachia min kha ko oh,” a cipya hae.

²⁶A pya hae paw tangnuapaw kha minmin nynh lah hae zah a paccyn hae, te Baal min kha awkhua te ninthu cia ko hae zah, “Pou Baal, kaening hynh beih oun leihtua!” a ci hae. Thuasalama pawpaw roi mah ccae khyh zah leih mah leihru khyh hae. Mimaw nynh a rae hae paw silawhang pepan khe a law hae.

²⁷Ninthu khe Elijah nynh sarya hae zah, “Thawte sia oh! Aning tuh pachia ccaccing nynh thua; ccangpaw kha tah a tua cciamang, tuhkhyhze ccanglang tah a khiavuiku, tuhkhyhze khycce lang tah a ccia, tuhkhyhze a i keiccuze tho aho ccamah,” a cipya hae.

²⁸Te minmin nynh thawte sia hae zah, mimaw phung thyhte mih chii alua mawlaezung tangpaw te thaloi khate mimaw toulou kha a awku hae.

²⁹Ninthu laeleih zah zetesang silaw ccyh cia a sia a rua hae zemah, pawpaw roi mah ccae khyh, khungrupaw bya te leihrupaw bya um khyh.

³⁰Tetuh Elijah nynh ccungccaw balyn kha, “Ka kalan oun naekuh oh,” cipah hae zah ccungccaw balyn tuh amaw kalan a naekuh hae. Te aning nynh a ro vae hae paw BAWIPAW silawhang kha masaty a raethui;

³¹BAWIPAW bya tuh amaw kalan yn thua zah, “Na min tuh Israel acikuh cih,” cite a cipyapaw Jakob a ccapaw hae mih phin zeihte, Elijah nynh lung ccanghaw lae ning kha a law;

³²tuh-e lung hae khate BAWIPAW min te silawhang kha a rae. Te ccacii tounawpaw te kaw ning accawng lante tuh-e silawhang po voilu lan tuizy a zy.

³³Thing kha po nung zah, tangnuapaw kha pong a be koute tuh-e thing vawlan khe a khang. Te aning nynh, “Ang ccangpali kha tui phe biasah oh lah, maee-ute silawnawpaw te thing kha tui bu oh,” a cipya hae.

³⁴Te aning nynh, “Vae ningnaw tui bu oh,” cipah hae zah minmin nynh vae ningnaw tui a bu hae. Te aning nynh, “Vae thumnaw tui bu oh,” bua cipah hae zah minmin nynh vae thumnaw tui a bu hae,

³⁵te tui tuh silawhang po voilu lan lua zah tuizy kya tui phe abeih.

³⁶Zetesang silawnaw rae ccyh kyakhe, profeh Elijah tuh silawhang kalan yn naekuh zah, “Pou BAWIPAW , Abraham, Isak te Israel Pachia, nang tuh Israel hae kya Pachia na thuapaw kha thuasah, kae tuh na ryalahtu ka thua zah hynh-e uccaw balyn hynh namaw bya thyhte nynh ka cyi cipaw kha thuasah atunin nyh hae sah.

³⁷Pou BAWIPAW , e ccungccaw hae nynh nang tuh Pachia na thuapaw kha ae ny nawlan hae te mih thinlung kha na paleih nawlan hae, ka bya hynh beih yn thaepya tua, pou BAWIPAW , beih yn thaepya tua,” cite saw a sang.

³⁸Tetuh BAWIPAW maee tuh yn ccah zah, maee-ute silawnawpaw, thing, lung te laenoi kha u zah, tuizy kya-e tui kha heize phe a rousah.

³⁹Ccungccaw balyn nynh tuh-e tuh he a muih hae te, bakhung hae zah, “BAWIPAW tuh Pachia athua ccaccing; BAWIPAW tuh Pachia athua ccaccing,” a ci hae.

⁴⁰Elijah nynh minmin kha, “Baal profeh hae kha kyng oh; lu kheit sanmah zuasah nan oh,” a cipya hae. Te minmin nynh tuh-e profeh hae kha a kyng hae; Elijah nynh minmin kha Kishon Vaw kalan cciakhae bung hae zah a chia hae.

⁴¹Elijah nynh Ahab kha, “Cceihthung lah, la ae lah la neih, pawccecize khuaa myarya ccanpaw roi accae,” a cipya.

⁴²Tukeiccuze Ahab tuh ae lan te nia lan a cceihthung. Elijah tuh Karmel mua dung lang a kaethung, tuin kyakhe laephi kya bakhung zah a mae kha a ccukharu hae laku kya a nung.

⁴³Te a ryalahtupaw kha, “Cceihthung lah, rili kalan khe dotua,” a cipya. Aning nynh cciathungte do zah, “Pawpaw mah um khyh,” a cipya. Te Elijah nynh, “Vae sari cia buabua cciatua,” a cipya.

⁴⁴Vaesarinaw kyakhe, “Dotua, ccungccaw kuih ciapaw maeking taraw tuh rili lungkhu te yn kaethung,” a cipya. Te Elijah nynh, “La cceih lah, Ahab kha, ‘Khuaa nynh phang ae khaw mawkhe na marangle kha paccynkuh lah, cceihbung ccavae,’ cite la hopah,” a cipya.

⁴⁵Sosoh aro te vaawlui tuh maeking te khisan te pong yn moh zah khuaa myarya accan. Ahab tuh marangle ccikuh zah Jezreel khua lang a cceih.

⁴⁶BAWIPAW kuih tuh Elijah tungvaw um zah, a taevoiboei kha voikuh zah Ahab malang khe Jezreel teenaw kalan a ccue.