Read Zotung Chin 1 SIAPHARAN 21 Bible Online

1 SIAPHARAN 21 - Zotung Chin bible

1 SIAPHARAN 21

¹Tukoute akawlan e hynh acyihkuh: Jezreel khuapaw Naboth nynh Jezreel khua kya Samaria siapharan Ahab inn pe khe misu khokhu a hoi.

²Ahab nynh Naboth kha, “Na misu khokhu tuh ka inn pe a um keiccuze enaw-rohnaw khokhu lang ka mang ccaw, kamaw yn pya; ahoy huapaw misu khokhu kae pyaru cih; tuhkhyhze na ry ze, amee tuh phua lante kae pya cih,” a cipya.

³Thuasalama Naboth nynh Ahab kha, “Ka minpaaw hae rho kha nang kae pya lanpaw tuh BAWIPAW nynh yn khee vae sah,” a cipya.

⁴Naboth nynh Ahab kha, “Ka minpaaw hae rho tuh kae pya lan khyh,” a cipya keiccuze Ahab tuh thinria maesuerote a inn lang a cceih. A ikhung kya ih zah a mae kha ccanglang hawi zah looh mah ae khyh.

⁵A zu Jezebel nynh a kalan yn cceih zah, “Looh ae lei lan ciate pawccemou hynhcih baban na lunghoy khyh?” a cipya.

⁶Ahab nynh, “Jezreel khuapaw Naboth kyakhe, ‘Na misu khokhu kha phua te kae re; tuhkhyhze na ryhua ze, ccangpaw misu khokhu mah kae pyaru cih,’ cite ka hopah zah, aning nynh, ‘Ka misu khokhu kha kae pya lan khyh,’ cite yn khung keiccu nynh thua,” a cipya.

⁷A zu Jezebel nynh, “Atu lya Israel hynh nang nynh na uk khaw? Thokuh, looh beihtaraw ae lah, na lungpawsaku tua; Jezreel khuapaw Naboth misu khokhu kha kae pya cih,” a cipya.

⁸Tukeiccuze Ahab min te ccaw zei zah a tazeih khate tazeih a khia; te tuh-e ccaw tuh Naboth te a khua kya umkheih hae paw piccan hae te bawi hae kalan a ky.

⁹Aning nynh ccaw lungkhu khe, “Looh-aesungnaw kha thaesah oh lah, ccungccaw zapi malang khe Naboth kha haungsah oh;

¹⁰a ccouseikuh hae paw lu ning kha a malang khe nung oh lah, tuh-e hae nynh, ‘Nang nynh Pachia te siapharan kha thya na law hae,’ cite seibe hae sah. Te aning kha poukhae oh lah, lung te phe chih lan deih oh,” a cipya hae.

¹¹A khuaccaaw hae, a khua kya umpaw piccan hae te bawi hae nynh Jezebel nynh bya a taw hae thyhte a cyi hae. Aning nynh a ky hae paw ccaw kya azeiku thyhte,

¹²minmin nynh looh-aesungnaw kha thaesah hae zah ccungccaw zapi malang khe Naboth kha a haungsah hae.

¹³A ccouseikuh hae paw lu ning tuh oun cceih hae zah a malang khe a haung hae; tuh-e ccousei hae lu ning nynh ccungccaw hae malang khe Naboth kha seibe hae zah, “Naboth nynh Pachia te siapharan kha thya a law hae,” a ci hae. Tukeiccuze khua atolang cciakhae hae zah lung te phe chih lan a deih hae.

¹⁴Tetuh Jezebel kalan ccungccaw saw hae zah, “Naboth tuh lung te deih thua zah a chih vae,” a cipya hae.

¹⁵Naboth tuh lung te deih hae zah a chih vae cipaw kha Jezebel nynh he a thae takaw te, Ahab kha, “Cceih lah, Jezreel khuapaw Naboth nynh phua te ae zuapya ry leipaw a misu khokhu kha lawkuh ccavae; pawccecize Naboth tuh hiin vae khyh, phe chih vae,” a cipya.

¹⁶Ahab nynh Naboth a chih vae cipaw he a thae takaw te, Jezreel khuapaw Naboth misu khokhu kha lawku lan a cceihbung.

¹⁷BAWIPAW bya tuh Tishbe ccungccaw Elijah kalan yn thua zah:

¹⁸Samaria khua umpaw Israel siapharan Ahab kha tungku khylan la cceihbung; aning tuh lawku lan a ccianuapaw Naboth misu khokhu kya nynh atu a um.

¹⁹Nang nynh amaw kha, “BAWIPAW nynh hynhte a ho: Na theih zah a uccaw kha na lawku vae tou? a ci,” cite hopah. Te nang nynh amaw kha, “BAWIPAW nynh hynhte a ho: Ui hae nynh Naboth chii a lyanaw hae hmin kyakhe na chii kha mah ui hae nynh a lya cih hae, a ci,” cite hopah, a cipya.

²⁰Ahab nynh Elijah kha, “Pou ka rhawpaw, phe nae muih vae tou?” a cipya. Elijah nynh, “BAWIPAW muihnaw kya ahoy leipaw cyi khylan namaw toulou na zuaku vae keiccuze phe kae muih vae;

²¹na tungvaw hoyleinaw ka thuasah cih; nang kha kae maemih cih zah, Israel ram kya Ahab kya-e pise miakaw tuh a luepaw thuasah, a lue leipaw thuasah marya ka roh cih hae;

²²ka thin nae riasah keiccu thuasah, Israel kha seinaw na raesah keiccu thuasah na ciihan hae kha Nebat ccapaw Jeroboam ciihan te Ahijah ccapaw Baasha ciihan hawte ka thuasah cih hae.

²³Jezebel te asekuh lante BAWIPAW nynh, ‘Jezreel khua akoihkuhpaw lungkhu khe ui hae nynh Jezebel kha a ae cih hae,’ a ci.

²⁴Ahab te asekuhpaw ccungccaw miakaw tuh khualae lungkhu a chihpaw kha ui nynh a ae cih; ramkaw kya a chihpaw miakaw kha azouthyapaw pavaw nynh a ae cih,” a ci.

²⁵(Ahab tahawpaw humhung mah um khyh, aning tuh a zu nynh a tou keiccuze BAWIPAW muihnaw kya ahoy leipaw rae khylan amaw toulou a zuakuhpaw nynh thua.

²⁶BAWIPAW nynh Israel hae malang te a dee hae paw Amor hae nynh a cyi hae hawte, zohtuh hae nulang zuikute anungsikuh huaccepaw kha Ahab nynh a rae.)

²⁷Ahab nynh tuh-e bya he a thae tuh, a boeining kha seii zah a ngesaw ccakaepaw vawlan khe buriboei kha a zingku; looh-aesung zah buriboei kyakhe a ih, te lungrote a cceih bungthung.

²⁸Te BAWIPAW bya tuh Tishbe ccungccaw Elijah kalan yn thua zah:

²⁹“Ahab nynh ka malang zakaw a sangsakupaw kha na muih vae tou? Aning nynh ka malang zakaw a sangsaku keiccuze a she lungkhu kya ronaw ka thuasah lan khyh; thuasalama a ccapaw she kya a ciihan tungvaw ronaw ka thuasah cih,” a ci.