Read Zotung Chin 1 SIAPHARAN 22 Bible Online

1 SIAPHARAN 22 - Zotung Chin bible

1 SIAPHARAN 22

¹Siria ram te Israel ram tuh kum thum lungkhu rhawtukkuh khyh hae.

²Thuasalama kum thumnaw kyakhe Judah siapharan Jehoshafat tuh Israel siapharan kalan a cceihbung.

³Israel siapharan nynh a ryalahtu hae kha, “Ramoth-gilead tuh aening kya-e nynh thua cipaw na nyh oh tou? Tuhzemah aening nynh Siria siapharan kuih kyate law leite daebabi lan ah umpya oh,” a cipya hae.

⁴Aning nynh Jehoshafat kha, “Ramoth-gilead kha tuk khylan ka kya na cceihbua cih tou?” a cipya. Jehoshafat nynh Israel siapharan kha, “Nang te kae tuh pynkheihpaw nynh ah thua; ka ccungccaw hae tuh na ccungccaw hae thua hae zah, ka marang hae tuh na marang hae nynh thua,” a cipya.

⁵Jehoshafat nynh Israel siapharan kha, “BAWIPAW bya kha khiatua ty hin,” a cipya.

⁶Israel siapharan nynh profeh hae za pali kha pum hae zah, “Ramoth-gilead kha tuk lan ka ccianua cih tou, ka ccianua lan khyh tou?” cite khia hae zah, minmin nynh, “Ccianua thung; pawccecize BAWIPAW nynh siapharan na kuih kalan ae pya cih,” a ci hae.

⁷Thuasalama Jehoshafat nynh, “Aening nynh khia lanpaw ccangpaw BAWIPAW profeh um vae khyh tou?” a cipya.

⁸Israel siapharan nynh Jehoshafat kha, “BAWIPAW kha byakhia nawlan ccangpaw lu kheit, Imlah ccapaw Mikaiah a um ung; tuhzemah aning kha ka hua, pawccecize kamaw konglang bya hoypaw ho boi khyh, ronaw kong cci nynh a ho,” a cipya. Jehoshafat nynh, “Tuhcite siapharan nynh byaho nan,” a cipya.

⁹Te Israel siapharan nynh bawi lu kheit kha ko zah, “Imlah ccapaw Mikaiah kha arangte yn thuakhae,” a cipya.

¹⁰Te Israel siapharan te Judah siapharan Jehoshafat tuh mih angkiccua kikute, Samaria khua koikua teenaw malang huihmin kya umpaw bawitungkhung kya a haung hae; mih malang khe profeh balyn nynh profehbya a ho hae.

¹¹Khenaanah ccapaw Zedekiah nynh sivaw ki hae kha raekuh zah, “BAWIPAW nynh hynhte a ho: Siria hae kha ro athua mawlaezung hae, e sivaw ki hae hynhte na thuing cih oh, a ci,” cite a ho.

¹²Profeh balyn nynh mah tuhcite hobua hae zah, “Ramoth-gilead kha ccianua thung lah, taetua; BAWIPAW nynh siapharan na kuih kya ae pya cih,” a cipya hae.

¹³Mikaiah ko lan a cceihpaw locceihtupaw nynh Mikaiah kha, “Dotua, profeh hae nynh siapharan kyakhe bya hoypaw kha phe lokuh lante a hopya hae; nang nynh mah minmin hawte bya hoypaw kha hopah bua,” a cipya.

¹⁴Thuasalama Mikaiah nynh, “BAWIPAW tuh a hiin thyhte, BAWIPAW nynh yn hopyapaw kyalya kha ka ho cih,” a ci.

¹⁵Mikaiah tuh siapharan kya he a thua te, siapharan nynh, “Mikaiah, Ramoth-gilead kha tuk khylan kae ccianua cih tou, kae ccianua lan khyh tou?” a cipya. Mikaiah nynh, “Ccianua thung lah, taetua; BAWIPAW nynh siapharan na kuih kya ae pya cih,” a cipya.

¹⁶Thuasalama siapharan nynh, “Byaccingpaw laelan ccangpaw bya kha BAWIPAW min te nae hopya khyh nawlan, vae hohzeihmou bya kae kinsakuh cih?” a cipya.

¹⁷Mikaiah nynh, “Israel hae balyn tuh tuurin a hoi leipaw tuu hae hawte mua vawlan phiariphiarae a um hae paw kha ka muih; BAWIPAW nynh, ‘E hae tuh bawi hoi khyh hae; mimaw inn raveih lang daebabi lan ki hae sah,’ a ci,” cite a ho.

¹⁸Israel siapharan nynh Jehoshafat kha, “Aning tuh kae ka konglang hynh ahoypaw profehbya ho boi khyh, ronaw kong cci nynh a ho, cite kae hopah khyh tou?” a cipya.

¹⁹Te Mikaiah nynh, “Tukeiccuze BAWIPAW bya hynh thaetua: BAWIPAW tuh a bawitungkhung kya haung zah, vaaw rhawkaw hae balyn tuh a voi a rang te a pe khe a thadyn hae.

²⁰Te BAWIPAW nynh, ‘Ahab tuh cceihthung zah Ramoth-gilead kya a chi nawlan, hum nynh mou a tuhou cih?’ a ci. Lu kheit nynh ccangte ho zah, ccangpaw lu kheit nynh ccangte a ho,

²¹muisaw lu kheit yn thua zah BAWIPAW malang thadyn zah, ‘Kamaw ka tuhou cih,’ a ci.

²²BAWIPAW nynh, ‘Pawtemou na tuhou cih?’ cipah zah, aning nynh, ‘Ka cceih cih zah profeh hae munglae kyakhe ahynthyapaw muisaw lang ka tang cih,’ a ci. Te BAWIPAW nynh, ‘Aning kha na la tuhou cih, phe na tuhou kho cih; la cceih lah tuhcite la cyih,’ a cipya.

²³Tukeiccuze BAWIPAW nynh ahynthyapaw muisaw kha e na profeh hae balyn munglae kya a nung vae; BAWIPAW nynh nang na hanlan ronaw kaw a tho vae,” a cipya.

²⁴Tetuh Khenaanah ccapaw Zedekiah nynh Mikaiah kha ccianua thung zah a mae kha bia zah, “BAWIPAW muisaw tuh nang kha bya hopya khylan ka kyate paw laanpi te mou a pou?” a cipya.

²⁵Mikaiah nynh, “Nang nynh alungkhu lang e akhaan lungkhu lang reku khylan he na tee nin khe na muih cih,” a cipya.

²⁶Israel siapharan nynh, “Mikaiah kha kyng oh lah, khua uktu Amon te siapharan ccapaw Joash kalan cciakhae oh lah,

²⁷‘Siapharan nynh hynhte kaw a tho: E ccungccaw hynh thonginn kya nung oh, daenaw te kae thua mawlaezung tui te looh beihtaraw kyalya la pya oh, a ci,’ cite la hopah oh,” a cipya hae.

²⁸Mikaiah nynh, “Daenaw te bua nae ki zetuh, BAWIPAW nynh ka kyate bya a ho khyhpaw nynh athua cih. Pou ccungccaw hae, nae balynte thaetua oh!” a ci.

²⁹Israel siapharan te Judah siapharan Jehoshafat tuh Ramoth-gilead khua lang a cceihthung hae.

³⁰Israel siapharan nynh Jehoshafat kha, “Ka muinsan rulaekute rhawtuknaw lang ka cceihbua cih, thuasalama nang tuh na angkiccua kha kikuh,” a cipya. Tuhcite Israel siapharan tuh a muinsan rulaekuh zah rhawtuknaw lang a cceih.

³¹Siria siapharan nynh a marangle rhawbawi hae sung thum lu ning kha, “Ccangpaw ccungccaw adihpaw thuasah, alepaw thuasah tuk leite, Israel siapharan kyalya kha tuk oh,” cite kaw a pya hae.

³²Marangle rhawbawi hae nynh Jehoshafat kha he a muih hae te, “Aning hynh Israel siapharan ccaccing nynh thua,” a ci hae. Tukeiccuze aning kha tuk khylan a maenuaku hae; te Jehoshafat nynh a sia.

³³Israel siapharan thua khyh cipaw kha marangle rhawbawi hae nynh he a nyh hae te, aning kha deehui vae leite a kitaw hae.

³⁴Lukheitpaw nynh ee tutae leite a li te kaw huataw zah, Israel siapharan kha a rhawtuk-uccaw te a bykhaw laku khe a tungsah; tukeiccuze a marangle a mawngtupaw kha, “Vaemaw phe ka mue, tukeiccuze maeleihkuh lah, rhawtuknaw kyate yn poukhae,” a cipya.

³⁵Tuin nin tuh thawte rhaw a tukkuh hae, siapharan tuh zete a chih cia, a marangle lungkhu khe ngeikuh zah Siria hae kalan khe a hawi; a vaemaw kyate a chii tuh marangle lungkhu khe alua.

³⁶Khuanin he ccah tuh, “Nae khua raveih lang, nae ram raveih lang ki ccavae oh!” cite rhawkaw hae balyn kya roi accae.

³⁷Tuhcite siapharan Ahab tuh chih zah Samaria khua lang a cciakhae hae; siapharan tuh Samaria khua kya a uu hae.

³⁸A marangle kha Samaria tuili pe khe a sing hae, BAWIPAW nynh a la hopaw bya thyhte, ui hae nynh a chii kha lya hae zah, ohhuanung hae nynh tuin kya tui a singku hae.

³⁹Tuhlaepaw Ahab nynh rya a lawpaw te a cyipaw balyn, saepanua te a sakpaw inn te a raepaw khua hae balyn tuh Israel Siapharan hae Phungpaw Ccauh kya a zei hae.

⁴⁰Tuhcite Ahab tuh a minpaaw hae ryte a ih hae; te a ccapaw Ahaziah tuh amaw ccelang siapharan lang a tang.

⁴¹Israel siapharan Ahab nynh ram a uknaw kum palinaw kum khe Jehoshafat nynh Judah ram kha a uk takaw.

⁴²Jehoshafat tuh sung thum kum pangaw he acih te, ram kha uk takaw zah, Jerusalem khua kya kum kuin lae pangaw a uk. A nung min tuh Azubah cikuh zah Shilhi ccanung nynh thua.

⁴³Aning nynh a paaw Asa laanpi miakaw kha a zui; tuh-e laanpi kyate cciasei leite, BAWIPAW muihnaw kya ahmepaw kha a rae; tuhzemah hmin hangpaw hae kha roh khyh hae, ccungccaw hae nynh tuh-e hmin hangpaw hae kyakhe palei silaw hae zah mynkhuhpaw kha leih a u hae.

⁴⁴Jehoshafat nynh Israel siapharan te mah ccawkunaw a rae.

⁴⁵Tuhlaepaw Jehoshafat nynh rya a lawpaw, a thungnaw a langsahkupaw te rhaw a tukpaw kha Judah Siapharan hae Phungpaw Ccauh kya a zei hae.

⁴⁶A paaw Asa she lya-e a laehy hae paw beikinn kya a ohhuakuhpaw pise hae kha ram kyate a maemih hae.

⁴⁷Edom ram kya tuh siapharan um khyh; Judah siapharan nynh a khangpaw siapharan a bawmtu nynh ram kha a uk.

⁴⁸Jehoshafat nynh Ofir ram lang cceih zah sui a phu lanpaw Tarshish sanphalung hae kha a rae hae; thuasalama cceih khyh hae; pawccecize sanphalung hae tuh Eziongeber kya aroh hae.

⁴⁹Tetuh Ahab ccapaw Ahaziah nynh Jehoshafat kha, “Ka ryalahtu hae tuh na ryalahtu hae ryte sanphalung kya cceihkheih hae sah,” a cipya, thuasalama Jehoshafat nynh ry khyh.

⁵⁰Jehoshafat tuh a minpaaw hae ryte ih hae zah, a minpaaw David khua khe a minpaaw hae ryte a uukheih hae; a ccapaw Jehoram nynh amaw ccelang siapharan lang a tang.

⁵¹Judah siapharan Jehoshafat nynh ram a uknaw kum haw lae sarinaw kum khe Ahab ccapaw Ahaziah nynh Israel kha Samaria khua kyate a uk takaw; aning nynh Israel kha kum ning a uk.

⁵²Aning nynh BAWIPAW muihnaw kya hoyleinaw kha rae zah, a paaw te a nung laanpi kha thuasah, Israel hae kha seinaw a raesah hae paw Nebat ccapaw Jeroboam laanpi kha thuasah a zui.

⁵³Aning nynh Baal kha ryalawpah zah a beik; a paaw nynh a cyi hawte BAWIPAW , Israel Pachia kha a thin a riasah.