Read Zotung Chin 1 SIAPHARAN 8 Bible Online

1 SIAPHARAN 8 - Zotung Chin bible

1 SIAPHARAN 8

¹Te BAWIPAW byakin thingkua kha Zion cikuhpaw David khua kyate cciakhae khylan, Solomon nynh Israel piccan hae balyn, mih phin raveih kya-e lu hae balyn, Israel ciihan cciakhaetu hae balyn kha Jerusalem khua, Solomon Siapharan malang a pum hae.

²Israel ccungccaw balyn tuh sawpaw sah sarinaw Ethanim saw lungkhu poi kyakhe Solomon Siapharan malang a sueluakuh hae.

³Israel piccan hae balyn tuh oun cceih hae zah, ranpibawi hae nynh thingkua kha a puih hae.

⁴BAWIPAW thingkua, tungkunaw bu te bu kya umpaw athyaapaw angphe hae balyn kha ranpibawi hae te Levi phin hae nynh a cciakhae hae.

⁵Solomon Siapharan te a malang pumkuh hae paw Israel zapi hae balyn nynh amaw ryte thingkua malang khe myarya lungpaw tuu hae te tangnuapaw hae riatae um leipaw khate si a law hae.

⁶Ranpibawi hae nynh BAWIPAW byakin thingkua kha beikinn alungkhu lang e hminthyaa kya, hmin thyaa huaccepaw kya, cherubim sake hae zakaw, amaw hmin kyakhe a nung hae.

⁷Pawccecize cherubim hae nynh mih sake hae kha thingkua umnaw luki khe daw hae zah, thingkua te puihnawpaw ccong hae kha a dawpya hae.

⁸Puihnawpaw ccong hae tuh eih asae keiccuze adung kha alungkhu lang e hminthyaa malang, hminthyaa kyate muih kho athua; thuasalama atolang te muih kho thua khyh; atunin cia tuin kya a um hae.

⁹Israel hae nynh Izip ram kyate a pou lya hae ze, BAWIPAW nynh minmin ryte byakinnaw a raenaw Horeb mua kya Moses nynh a la sangpaw lungphe phe ning laelan, thingkua lungkhu kya ccangpaw pawpaw mah um khyh.

¹⁰Ranpibawi hae nynh hminthyaa kyate he a pou hae tuh, BAWIPAW inn tuh maeking phe abeih,

¹¹maeking keiccuze ranpibawi hae tuh ryalaw lan thadyn kho khyh hae; pawccecize BAWIPAW phu-enaw tuh BAWIPAW inn kya phe abeih.

¹²Te Solomon nynh, “Varyng zipingpaw mohnaw kya ka um cih cite BAWIPAW nynh a ci.

¹³A sung-epaw inn, zungzae na umnaw lanpaw hmin kha kae sakpya vae,” a ci.

¹⁴Te Israel zapi hae balyn a thadyn lya hae khe, siapharan nynh a nulang maeleihkuh zah Israel zapi hae balyn kha hythua a pya hae.

¹⁵Solomon nynh, “BAWIPAW , Israel Pachia tuh thehoyte um sah, pawccecize ka paaw David kyakhe a mung te byakinpakuh zah,

¹⁶‘Ka ccungccaw Israel hae kha Izip ram kyate ka poukhae nin hae kyate tho zah, ka min a umnaw lanpaw inn kha sak nawlan, Israel phin hae kya-e pawpaw khua kha mah ka po khyh; thuasalama ka ccungccaw Israel hae a uktu lang David kha ka po,’ cite a hopaw kha a kuih te a ccingsah vae.

¹⁷BAWIPAW , Israel Pachia min hanlan inn sak lanpaw kha ka paaw David thinlung kya a la um.

¹⁸Thuasalama BAWIPAW nynh ka paaw David kha, ‘Ka min hanlan inn sak lan na tuaku keiccuze ahoypaw kha na cyi vae;

¹⁹thuasalama nang nynh inn kha na sak lan khyh, na saahkuh cih paw na ccapaw nynh ka min hanlan inn kha a sak cih,’ a cipya.

²⁰BAWIPAW nynh bya a kinkupaw kha a ccingsah vae; pawccecize ka paaw David umnaw kya ka um vae; BAWIPAW nynh bya a kinku thyhte, Israel bawitungkhung kya ka haung zah, BAWIPAW , Israel Pachia min hanlan inn kha ka sak vae.

²¹Ah minpaaw hae kha Izip ram kyate a poukhae lya hae ze, BAWIPAW nynh minmin ryte a raepaw a byakinnaw a umnahpaw thingkua elang hmin kha ka paccyn vae,” a ci.

²²Solomon tuh BAWIPAW silawhang malang, Israel zapi hae balyn muihnaw khe thadyn zah, vaawlang khe a kuih kha daw zah,

²³“Pou BAWIPAW , Israel Pachia, ahangnaw vaawram te anenaw laephi kya nang ae lopaw Pachia um khyh, mih thinlung balynte namaw malang a cceih hae paw na ryalahtu hae hanlan byakinnaw te atynpaw sungsahnaw kha na langsah vae,

²⁴na ryalahtu ka paaw David hanlan na tynsahpaw byakinnaw kha na hopya thyhte na zui; na mung te bya na kinpakuh zah na kuih te atunin na ccingsah vae.

²⁵Tukeiccuze, pou BAWIPAW , Israel Pachia, na ryalahtu ka paaw David kyaze, ‘Nang nynh ka malang na ccia hawte, na ccaaw hae nynh ka malang ccia lan mih laanpi kha a raeringku hae zetuh, Israel bawitungkhung kya kamaw malang a haung cih paw na ciihan tuh dae lan khyh,’ cite na kinpyakupaw bya kha beih tynsah tua.

²⁶Tukeiccuze, pou Israel Pachia, na ryalahtu ka paaw David kya na kinpyakupaw na bya kha beih tynsah tua.

²⁷“Thuasalama Pachia tuh laephi vawlan um ccaccing vema? Vaawram te ahang huaccepaw vaawram nynh heize nang kha ae ccawng khyh, kae nynh ka sakpaw e inn thathy tuh hosyn um vae khyh!

²⁸Thuasalama, pou BAWIPAW ka Pachia, na ryalahtupaw nynh saw ka sangpaw te kae ngiapaw hynh yn ngaepya tua, na ryalahtupaw nynh atunin namaw malang ka siapaw te saw ka sangpaw hynh yn thaepya tua;

²⁹‘Hein kya ka min a um cih,’ na cinaw hmin, e inn kalan hin khuazi khuadae yn do lah, na ryalahtupaw nynh hynh-e hmin kalan hawite saw ka sangpaw hynh beih yn thaepya tua.

³⁰Na ryalahtupaw te na ccungccaw Israel hae nynh e hmin kalan hawite saw kae sang vae ze, kae ngiapaw kha yn thaepya tua; na umnaw vaawram te yn thaepah lah, kae seinaw kha oun ngaethya.

³¹“Lukhakheit nynh a innpaw tungvaw a sei keiccuze thyalawsaku thua zah, e inn kya na silawhang malang poute thya a lawku ze,

³²nang nynh vaawram te thae lah, rya yn lah lah, na ryalahtu hae hynh bya oun piatua, a seitupaw tuh a cyisahnaw kha amaw lu vawlan ccah sah lah, a dingpaw tuh a dingnaw thyhte thanenaw pya khylan thyaccousah tua.

³³“Na ccungccaw Israel hae nynh na tungvaw a sei hae keiccuze mih rhaw hae malang he a shung hae te, namaw kalan bua oun maekuh hae zah na min kha sawtuate, e inn kyahin namaw kalan sawsangte ae ngiaku hae ze,

³⁴vaawram te thaepah hae lah, na ccungccaw Israel hae seinaw kha ngaethya hae, te mih minpaaw hae na pya hae paw ram langkhe bua kikhae hae.

³⁵“Na tungvaw a sei hae keiccuze vaaw kha na khawsung zah khuaa kansah te de he na tah hae te, minmin nynh e hmin kalan hawite sawsang hae zah, na min kha sawtuate, mih seinaw kyate a maeleihku hae ze,

³⁶vaawram te la thae lah, na ryalahtu hae te na ccungccaw Israel hae seinaw kha ngaethya hae; a zui lan hae paw laanpi hoypaw kha ccangpah hae lah, na ccungccaw hae elang rho lang na pya hae paw na ram kya khuaarawsah tua.

³⁷“Ram lungkhu kya ccakan acci ze thuasah, shethya a thua ze thuasah, looh aphi poute ronaw, khivae keiccu looh ronaw, tungkhipaw te khung-angroh keiccu looh ronaw thuasah, rhaw nynh mih khua khuakhakheit kha a koihku ze thuasah, shethya ccangkhakheit, ccinaw ccangkhakheit a um ze thuasah,

³⁸na ccungccaw Israel hae nynh mih balynte thuasah, humhung nynh mah lukhakheit te thuasah mih thinlung raveih kya a teing hae paw kha nykute, e inn kalan hin mih kuih dawte pawpaw sawsangnaw thuasah, pawpaw ngianaw thuasah oun rae hae ze,

³⁹na umnaw vaawram te la thaepah hae, mih seinaw ngaethya hae lah bawmtua hae, mih thinlung na ny hae paw balyn kha a zui hae paw mih laanpi thyhte pyaru hae, pawccecize ccungccaw miakaw thinlung kya pawmou a um cipaw kha nang rou nynh na nyh;

⁴⁰tuhteze nynh kae minpaaw hae na la pya hae paw ram kya um hae zah a hiin lungkhu hae balyn nang kha ae rih cih hae.

⁴¹“Tuhawte, na ccungccaw Israel athua leipaw ramccangpaw nynh alesaepaw na min, athungpaw na kuih te na dyngpaw na kuih konglang kha a thae keiccuze na min liate laansawpi te yn thua zah,

⁴²tuh-e ramccangpaw nynh e inn kalan hawite saw a sang ze,

⁴³na umnaw vaawram te thaepah lah, ramccangpaw nynh ae ngiapaw balyn thyhte cyipya tua; tuhteze nynh laephi ccungccaw balyn nynh na ccungccaw Israel hae hawte na min kha a nyh cih hae zah nang kha ae rih cih hae; te ka sakpaw e inn kyahin na min kha ko athua cipaw a nyh cih hae.

⁴⁴“Na ccungccaw hae nynh mih rhaw hae kha tuk khylan a ccia vae hae ze, pawpaw laanpi na zuisah hae zemah, na popaw khua kalan te na min hanlan ka sakpaw inn kalan hawite BAWIPAW kalan saw a sang hae ze,

⁴⁵mih sawsangnaw te mih ngiakunaw kha vaawram te thaepah hae lah, mih ryalaw kya pankhae hae.

⁴⁶“A sei leipaw lu kheit san a um khyh keiccuze—minmin nynh na tungvaw sei hae zah minmin elang na thinria keiccuze rhaw hae kuih kalan na pya hae zah minmin kha asawnaw khyhze anaenaw umpaw mih rhaw hae ram lang kyngte cciakhae athua hae ze thuasah,

⁴⁷a cciakhaenaw hae ram kyakhe minmin nynh mih thinlung kya oun nyhthui hae zah ngaesikute a kyngtu hae ram kyakhe nang kha, ‘Kae sei vae, kae cyisei vae, ahoy leipaw rya kae lawsei vae,’ cite ae ngiaku hae ze thuasah,

⁴⁸kyngte a cciakhaetu hae mih rhaw hae ram kyakhe mih thinlung te mih tuanaw balyn te ngaesikuh hae zah, mih minpaaw hae na pya hae paw mih ram, na popaw khua te na min hanlan ka sakpaw inn kalan hawite namaw kalan saw oun sang hae ze thuasah,

⁴⁹na umnaw vaawram kyate mih sawsangnaw te mih ngiakunaw kha thaepah hae, mih ryalaw kya pankhae hae lah,

⁵⁰na tungvaw a sei hae paw na ccungccaw hae kha ngaethya hae lah, na tungvaw a cyiseinaw hae balyn kha ngaethya hae; minmin kha kyngte a cciakhaetu hae nynh mih tungvaw ngaethya a umsah nawlan hae, a cciakhaetu hae kya ngaethyaumsahnaw thinlung kha hoisah hae,

⁵¹(pawccecize minmin tuh sivaw somaee laku, Izip ram kyate na poukhae hae paw na ccungccaw hae te na rho nynh thua hae).

⁵²Na ryalahtupaw nynh kae ngianaw te na ccungccaw Israel hae nynh ae ngianaw hae kalan hin na mit kha beih dotua, minmin nynh ae ko takyh hae te beih ngaepah hae.

⁵³Pawccecize pou Bawipaw PACHIA, kae minpaaw hae kha Izip ram kyate na poukhae lya hae ze, na ryalahtu Moses kyate bya na kinpyaku hae thyhte, Israel hae kha namaw rho lang tang khylan, laephi ccungccaw hae balyn laku kyate minmin kha na phia vae hae,” a ci.

⁵⁴Solomon nynh BAWIPAW kalan hynh-e sawsangnaw te ngianaw balyn kha he a thangsah tuh, a ccukharutungte vaawlang khe a kuih a dawnaw BAWIPAW silawhang malang te a thokuh;

⁵⁵te thadyn zah Israel zapi hae balyn kha roi myarya ccae lante hythua a pya hae:

⁵⁶“Bya a kinkupaw balyn thyhte a ccungccaw Israel hae kha daenaw a pyatu BAWIPAW tuh thehoysah oh; a ryalahtu Moses kyate a hopaw a byakin hoypaw balyn kha ccangkheit san roh khyh.

⁵⁷BAWIPAW ah Pachia tuh ah minpaaw hae kya a um hawte, aening kya mah um vae sah; aning nynh aening hynh oun cciataw nan sah lah, oun vua nan sah,

⁵⁸a laanpi hae balyn kha ah zui nawlan oh thuasah, aning nynh ah minpaaw hae kaw a la pya hae paw a kawbya hae, a phungbya hae te a phungzae hae kha ah zui nawlan oh thuasah ah thinlung kha amaw kalan oun mae vae sah.

⁵⁹BAWIPAW malang ka ngianawpaw ka bya hae hynh BAWIPAW ah Pachia pe khe khuazi khuadae um vae sah; a ryalahtupaw kae ka ryalaw te a ccungccaw Israel hae ryalaw hynh nin takyh aho thyhte oun pankhae vae sah;

⁶⁰tuhteze nynh laephi ccungccaw balyn nynh BAWIPAW tuh Pachia thua zah ccangpaw Pachia um khyh cipaw a nyh cih hae.

⁶¹Tukeiccuze a kawbya hae te a phungbya hae kha zuite, atunin na cyi oh hawte, BAWIPAW ah Pachia kalan nae thinlung kha khaleih pyakuh oh,” a ci.

⁶²Te siapharan te a kya umpaw Israel hae balyn nynh BAWIPAW malang khe silawnaw a rae hae.

⁶³Solomon nynh tangnuapaw thong kuin lae ning te tuu cciing kheit thong kuin khate BAWIPAW kalan ccawkunaw silawnaw kha a rae. Tuhcite siapharan te Israel ccungccaw hae balyn nynh BAWIPAW inn kha a ap hae.

⁶⁴Tuin nin khe siapharan nynh BAWIPAW inn malang a umpaw voidu angaelung kha a thyaasah; pawccecize tuin kyakhe maee-ute silawnaw, ccathae silawnaw te ccawkunaw silawnawpaw kya-e satho kha a pya, pawccecize BAWIPAW malang umpaw sohin silawhang tuh maee-ute silawnaw, ccathae silawnaw te ccawkunaw silawnawpaw kya-e satho kha pya nawlan myaryamaw adi keiccu nynh thua.

⁶⁵Tuhcite Solomon te a kya umpaw Israel hae balyn, Lebo-hamath khua kyate Izip Vaw kyacia um hae paw myarya lungpaw zapi hae nynh BAWIPAW ah Pachia malang khe nin sari lungkhu poi a tua hae.

⁶⁶Nin taryanaw nin khe ccungccaw hae kha a cciasah hae; minmin nynh siapharan kha hythuapya hae zah, BAWIPAW nynh a ryalahtu David te a ccungccaw Israel hae tungvaw a langsahkupaw hoynaw balyn keiccuze lungtua lungpawte mih inn raveih lang a ki hae.