Read Zotung Chin 2 SIAPHARAN 14 Bible Online

2 SIAPHARAN 14 - Zotung Chin bible

2 SIAPHARAN 14

¹Joahaz ccapaw Joash nynh Israel siapharan lang a tangnaw kum ningnaw kum khe, Joash ccapaw Amaziah tuh Judah siapharan lang a tang takaw.

²Ram a uk takaw lya tuh kum kuin lae pangaw acih vae, Jerusalem khua kya kum kuin lae takua a uk. A nung min tuh Jehoaddin cikuh zah Jerusalem khuanung nynh thua.

³Aning nynh BAWIPAW muihnaw kya ahmepaw kha a cyi, tuhzemah a minpaaw David hawte tuh thua khyh; atyn-are kya a paaw Joash nynh a cyi hawte a cyi.

⁴Thuasalama ahangpaw hmin hae kha tuh roh khyh; ccungccaw hae nynh ahangpaw hmin hae vawlan khe silawnaw po rae hae zah mynkhuhpaw kha a u mamin hae.

⁵Siapharan kawhoinaw kha a kuih kya tynkaring lan he a um takaw te, a paaw, siapharan a la theihtu hae a ryalahtu hae kha a chia hae.

⁶Thuasalama Moses phungbya ccauh kyaze, “Ccaaw hae hanlan nungpaaw hae kha chia thua lan khyh hae, nungpaaw hae hanlan ccaaw hae kha chia thua lan khyh hae; mimaw seinaw hanlan rou nynh chia athua cih hae,” cite BAWIPAW nynh kaw a pya thyhte, a theihtu hae paw mih ccaaw hae kha tuh theih khyh hae.

⁷Amaziah nynh Loi Accya kyakhe Edom hae kha thong haw a chia hae, Sela khua kha lah zah Jokthe-el cite minphu zah atunin cia a min lang a tang.

⁸Amaziah nynh Israel siapharan, Jehu ccapaw Jehoahaz a ccapaw Jehoash kalan khe locceihtu hae saw hae zah, “Yn cceih lah, lu kheit te lu kheit hawiliakute doku tua sih,” a cipya.

⁹Israel siapharan Jehoash nynh Judah siapharan Amaziah kalan byataw zah, “Lebanon mua e hinpawbu nynh Lebanon mua e sidar thingku kalan byataw zah, ‘Na ccanung kha ka ccapaw zu lang yn pya,’ a cipya; te Lebanon e loramsaw sa kheit nynh po a ccia lyakhe hinpawbu kha a syde.

¹⁰Edom ram kha na tae ccaccing zah, na thinlung na hangsakuh vae. Na phu-enaw khate na lungryachikhaekuh sah lah, innvaw khe zya um; pawccecize namaw te Judah ram tuh khuliaku khylan pawccemou vawsawnaw kha na ccungku?” a cipya.

¹¹Thuasalama Amaziah nynh ngae ry khyh. Tukeiccuze Israel siapharan Jehoash tuh cceih zah, Judah ram Beth-shemesh kyakhe Judah siapharan Amaziah te hawiliakute rhaw a tukkuh hae.

¹²Israel nynh Judah kha tae zah, mih inn raveih lang pong a ccue hae.

¹³Israel siapharan Jehoash nynh Judah siapharan Amaziah kha Beth-shemesh kyakhe a kyng; Amaziah tuh Jehoash ccapaw, Jehoash tuh Ahaziah ccapaw nynh thua; te Jerusalem lang cceih zah Jerusalem khualungrua kha Efraim Koikua kyate Apaki Koikua kyacia dong za pali a ro.

¹⁴BAWIPAW inn kya a umpaw te siapharan inn e sisuainn kya a umpaw miakaw sui, ngun te angphe balyn kha lah zah, rhaw hae nynh a la kyng hae paw ccungccaw hae ryte Samaria khua lang a ki.

¹⁵Tuhlaepaw Jehoash nynh a cyipaw, a thungnaw te Judah siapharan Amaziah a tuknaw kong kha Israel Siapharan hae Sherianaw Ccauh kya a zei hae.

¹⁶Jehoash tuh a minpaaw hae ryte ih hae zah, Israel siapharan hae ryte Samaria khua kya a uu hae; te a ccapaw Jeroboam nynh amaw ccelang siapharan lang a tang.

¹⁷Judah siapharan Joash ccapaw Amaziah tuh Israel siapharan Jehoahaz ccapaw Jehoash a chih koute kum haw lae pangaw a hiin ung.

¹⁸Tuhlaepaw Amaziah nynh a cyi hae paw kha Judah Siapharan hae Sherianaw Ccauh kya a zei hae.

¹⁹Jerusalem khua kya Amaziah kha phee hae zah Lakhish khua lang a ccue. Lakhish khua lang ccungccaw deehuisah hae zah, tuin kya a chia hae.

²⁰A rhua kha marang te Jerusalem lang phusah hae zah, a minpaaw hae ryte David khua khe a uukheih hae.

²¹Judah ccungccaw hae balyn nynh kum haw lae taruh acih vae paw Amariah kha ko hae zah, a paaw Amaziah ccelang siapharan lang a khang hae.

²²Siapharan Amaziah tuh a minpaaw hae ryte a ih kou hae te, Amariah nynh Elath khua kha raethui zah Judah ram lungkhu lang bua a nung.

²³Joash ccapaw Amaziah tuh Judah siapharan lang a tangnaw kum haw lae pangawnaw kum khe, Joash ccapaw Jeroboam tuh Israel siapharan lang tang zah Samaria khua kyate ram kha a uk takaw; aning nynh sung pali kum kheit a uk.

²⁴Aning nynh BAWIPAW muihnaw kya hoyleinaw kha rae zah, Nebat ccapaw Jeroboam nynh Israel hae a raesah hae paw seinaw balyn kha cciataw khyh.

²⁵BAWIPAW , Israel Pachia nynh a ryalahtu Gath-hefer khuapaw Amattai ccapaw, profeh Jonah kyate a la hopaw bya thyhte, aning nynh Israel ram kha Hamath khua teenaw kyate Arabah Rili kyacia bua a law.

²⁶Pawccecize Israel hae nynh a teing hae paw riathaenaw tuh myarya accih cipaw kha BAWIPAW nynh a muih; kyngpaw ccungccaw thuasah, a luepaw thuasah Israel a bawm lanpaw lu kheit san um vae khyh.

²⁷Thuasalama BAWIPAW nynh Israel min kha vaawlui zakaw te ka thee cih cite ho khyh, tukeiccuze Joash ccapaw Jeroboam kuih khate a khum hae.

²⁸Tuhlaepaw Jeroboam nynh rya a lawpaw, a cyipaw balyn te a thungnaw, rhaw a tuknaw, Judah kya-e a la thuapaw Damaskas te Hamath khua hae kha Israel elang pawtemou bua a law cipaw kha Israel Siapharan hae Sherianaw Ccauh kya a zei hae.

²⁹Jeroboam tuh Israel siapharan hae, a minpaaw hae ryte a ih hae; te a ccapaw Zekhariah tuh a paaw ccelang siapharan lang a tang.