Read Zotung Chin 2 SIAPHARAN 19 Bible Online

2 SIAPHARAN 19 - Zotung Chin bible

2 SIAPHARAN 19

¹Hezekiah Siapharan nynh tuh-e bya kha he a thae te, a boeining kha seii zah buriboei kha a zingku, te BAWIPAW inn lang a cceih.

²Siapharan inn do-oihtu Eliakim, ryaccinkhan Shebna te buriboei a zingkuh hae paw ranpibawi piccanhua hae kha Amoz ccapaw profeh Isaiah kalan a saw hae.

³Minmin nynh Isaiah kyakhe, “Hezekiah nynh hynhte a ho, Atunin tuh lungriathae nin, thuihei nin te thethya nin nynh thua; imua pui zaw zah a pui nawlan thawzung um khyh.

⁴Ahiinpaw Pachia kha sarya khylan Assiria siapharan nynh yn sawpaw a ryalahtu Rabshakeh bya balyn kha BAWIPAW na Pachia nynh la thae vae sah, te BAWIPAW na Pachia nynh a thaepaw bya kha detah vae sah; tukeiccuze a laehypaw ccungccaw hae hanlan saw la sang,” a cipya hae.

⁵Hezekiah Siapharan a ryalahtu hae nynh Isaiah kya he a thua hae te,

⁶Isaiah nynh minmin kha, “ ‘BAWIPAW nynh hynhte a ho: Assiria siapharan a ryalahtu hae nynh ka thethya oun ho hae paw bya na thae keiccuze rih nan.

⁷Aning nynh laanbya kha thae zah amaw ram lang a ki nawlan, a thinlung kya ka sang cih; amaw ram kyakhe thaloi te ka chisah cih, a ci,’ cite nae bawipaw kha la hopah oh,” a cipya hae.

⁸Rabshakeh tuh yn ki zah, Assiria siapharan nynh Libnah khua a tuk cciamangpaw kha a muih; pawccecize siapharan tuh Lakhish khua kyate a pou vae cipaw kha a thae vae.

⁹Te Ethiopia Siapharan Tirhakah tuh Assiria rhawkaw kha dou khylan yn thokuh vae cipaw kha Assiria siapharan nynh he a thae te, locceihtu hae kha Hezekiah kalan bua saw hae zah,

¹⁰“Judah Siapharan Hezekiah kha hynhte na la hopah cih oh: Jerusalem tuh Assiria siapharan kuih kalan pya thua lan khyh, cite ae kinpyakupaw bya khate na doliakupaw na Pachia kha lingsakuh nan.

¹¹Assiria siapharan hae nynh ram hae balyn kha khaleih roh hae zah pawtemou a cyi hae cipaw kha phe na thae vae. Na lue cih zawtou?

¹²Ka minpaaw hae nynh a la ro hae paw Gozan, Haran, Rezef khua hae te Telassar khua a um hae paw Eden ccungccaw hae kha mih pachia hae nynh a khum hae zawtou?

¹³Hamath siapharan, Arpad siapharan, Sefarvaim khuapi e siapharan, Hena siapharan te Ivvah siapharan kha teimou a um hae?” cite bya a taw.

¹⁴Hezekiah nynh tuh-e ccaw tuh locceihtu hae kuih kyate lawkuh zah a ria; oute Hezekiah nynh BAWIPAW inn lang cceihthung zah, tuh-e ccaw tuh BAWIPAW malang a daw.

¹⁵Hezekiah nynh BAWIPAW kalan sawsang zah a hopaw tuh: “Pou vaaw BAWIPAW , cherubim vawlan a haungpaw, Israel Pachia, nang tuh Pachia nynh na thua, laephi vaw e peenaw balyn kyaze nang rou nynh Pachia na thua; vaaw te lae kha na rae.

¹⁶Pou BAWIPAW , na nakaring kha beih yn tuakuh lah thaetua; pou BAWIPAW , na mit kha dae lah beih muihtua; Sennakherib nynh ahiinpaw Pachia kha sarya khylan ccungccaw sawte a hosah hae paw bya kha thaetua.

¹⁷Thanccingte, pou BAWIPAW , Assiria siapharan hae nynh minphuin hae te mih ram hae balyn kha roh hae zah,

¹⁸mih pachia hae kha maee lungkhu lang a phungpya hae, tuh-e pachia hae tuh pachia thua khyh hae, ccungccaw kuih te raepaw thing te lung athua hae keiccuze ro athua vae hae.

¹⁹Tukeiccuze, pou BAWIPAW kae Pachia, kaening hynh Assiria siapharan kuih kyate oun khumtua cite na kalan saw ka sang, tuhteze nynh laephi vaw e peenaw balyn nynh, pou BAWIPAW , nang rou nynh Pachia na thua cipaw kha a nyh cih hae,” a ci.

²⁰Tetuh Amoz ccapaw Isaiah nynh Hezekiah kalan ccungccaw saw hae zah, “BAWIPAW , Israel Pachia nynh hynhte a ho: Assiria Siapharan Sennakherib te asekuh lante ka kalan saw na sang keiccuze,

²¹BAWIPAW nynh aning te asekuh lante bya a hopaw tuh hynhte nynh thua: ‘Ccanung liaccady Zion nynh nang kha pawlang ae ria khyh zah ae nuinse; Jerusalem ccanung nynh na nulang te a lu ae henua.

²²‘Nang nynh hummou nuinsete na san na ruin? Na sianua zah lysakunaw mit te na dopaw kha hum cite mou na tua? Israel Pachia Athyaapaw lakha na rawse!

²³Na locceihtu hae kha mangte Bawipaw kha na sarya zah, “Ka marangle patae ryte mua ahangnaw kalan, ahang huapaw Lebanon mua dung hae kalan ka kaethung vae; ahang huaccepaw a sidar ku hae te ahoy huaccepaw a maeccaw ku hae kha ka nge hae; ahang huaccenaw, thingku athaaw huaccenaw tuhpi kya phe ka thua.

²⁴Tuisung ka thae zah ramccang tui kha ka nia, Izip ram e vawkhu balyn kha ka ccukaw te ka rousah,” na ci.

²⁵‘E hynh langmawlya te ka la paccynku vae cipaw na thae boi khyh tou? Lungrua te koihlupaw khuapi hae kha aronahpaw apumkuhpaw lang na rae nawlan, khawlya te ka la paccynpaw kha atu tuh ka ccingsah vae;

²⁶tuin kya a um hae paw tuh mih thawzya, siikuh hae zah mih lung pong mangkhaekuh vae; minmin tuh loo lungkhu e aku hae hawte thuasah, nebaleihpaw lonua hawte thuasah, innccukaly umpaw lonua hawte thuasah, ale kheccung mawze baleih anaanpaw aku hawte thuasah athua hae.

²⁷“ ‘Thuasalama na thokunaw te na haungnaw, na pounaw te na teenaw, te ka tungvaw na thinrianaw kha phe ka ny.

²⁸Ka tungvaw na thinria zah na lysakunaw kha ka naw te ka thae vae keiccuze, na napaw kae tho cih zah, na mung kha rangtei kae teisah cih; nae ccianaw laanpi mawkhate kae kisah cih.

²⁹“ ‘Nang na hanlan muihsahnaw tuh hynhcite athua cih: Atu kum tuh amaw le lan alethungpaw ccathae kha ae oh, khuavae kya mah tuhcite alethungpaw kha ae oh; hankum kya tuh ccathae kha ccoukuh oh lah, rue oh, misu khokhu kya lin oh lah, misu thae kha ae oh.

³⁰Ahiinhypaw Judah phin hae tuh akawlan mih tharui a sawthui cih zah, avawlan khe mih thae athae cih;

³¹pawccecize a laehy hae paw tuh Jerusalem kyate oun pou cih hae zah, ahiin hae paw phu tuh Zion Mua kyate oun pou cih hae. E hynh vaaw BAWIPAW nynh lungthote a cyih cih.

³²“ ‘Tukeiccuze Assiria siapharan te asekuh lante BAWIPAW nynh hynhte a ho: Aning nynh e khua lungkhu lang tee lan khyh, khuapi lungkhu kya the ccangkheit san kaw lan khyh, khawriaphua ccyngkute khuapi malang langkuh lan khyh, khuapi kha rawsete po voilu lan laephi adohpaw kha pumnua lan khyh hae.

³³Yn ccianaw laanpi mawkhate a kithui cih; aning nynh e khuapi lungkhu lang tee lan khyh, cite BAWIPAW nynh a ci.

³⁴Kamaw hanlan te ka ryalahtu David hanlan, e khua hynh khum khylan ka thungkhaw cih,’ a ci,” cite a hopya.

³⁵Tuh-e khuazi ccaccei khe BAWIPAW vaawpaw tuh yn langkuh zah, Assiria rhawkaw ryahmin kya-e milu cciing kheit sung tarya thong pangaw kha a chia hae; awkhua takaw khua he yn dae tuh, michi rhua lang pong a tang hae.

³⁶Tetuh Assiria Siapharan Sennakherib tuh toikuh zah, inn lang ki zah Nineveh khua kya a um vae.

³⁷A pachia Nisrok inn kya a beik cciamang lyakhe a ccapaw hae Adrammelek te Sharezer nynh amaw kha thaloi te phe a chia hae, minmin tuh Ararat ram lungkhu lang po a ccue hae. A ccapaw Esar-haddon nynh a paaw ccelang siapharan lang a tang vae.