Read Zotung Chin 2 SIAPHARAN 20 Bible Online

2 SIAPHARAN 20 - Zotung Chin bible

2 SIAPHARAN 20

¹Tuh lyatuin Hezekiah tuh ccih zah vyavya a chih. Amoz ccapaw profeh Isaiah nynh a kalan cceih zah, “BAWIPAW nynh hynhte a ho: Na inn ryalaw kha hoyte synriasya, pawccecize na chih vae cih; na dan vae lan khyh,” a cipya.

²Tetuh Hezekiah nynh pan kalan khe a mae kha hawi zah BAWIPAW kalan saw a sang:

³“Pou BAWIPAW , ka thinlung balyn te lungzite na malang ka hiin zah, na muihnaw kya ahoypaw uccaw ka cyipaw kha atu beih liathuitua, namaw kha kae ngiaku,” ci zah, thawte a rah.

⁴Isaiah tuh siapharan inn angaelung e voidu kyate a pou mawkhe, BAWIPAW bya tuh a kalan yn thua zah:

⁵“Ki lah, ka ccungccaw hae bawipaw Hezekiah kha la hopah, BAWIPAW , na minpaaw David Pachia nynh hynhte a ho: Na sawsangnaw kha ka thae zah, na mitphi kha ka muih vae; kae dansah ccaccing cih; nin thumnaw nin khe BAWIPAW inn lang na cceihthung cih.

⁶Na hiinnaw kha kum haw lae pangaw kae piapah chih cih. Nang te hynh-e khua hynh Assiria siapharan kuih kyate kae luesah cih oh; kamaw liate thuasah, ka ryalahtu David liate thuasah e khua hynh ka thungkhaw cih,” a cipya.

⁷Te Isaiah nynh, “Thaeku thae ange nge kheit kha oun lah oh. Te cciakhae hae sah lah, siapharan a danthui nawlan a vaemaw kha la bongpah hae sah,” a ci.

⁸Hezekiah nynh Isaiah kha, “BAWIPAW nynh yn dansah cih zah, nin thumnaw nin kya BAWIPAW inn lang ka cceihthung cih cinawpaw muihsahnaw tuh pawmou athua cih?” a cipya.

⁹Isaiah nynh, “BAWIPAW nynh bya ae kinpyakupaw kha a cyih cih cinawpaw BAWIPAW kyate na kalan yn thuapaw muihsahnaw tuh hynh-e hynh nynh thua: mynlyh tuh malang tou kaw haw a cceih cih, nulang tou kaw haw a ki cih?” cite a khia.

¹⁰Hezekiah nynh, “Mynlyh hanlan malang kaw haw saehua tuh huatawpaw nynh thua; mynlyh tuh nulang kaw haw ki vae sah,” cite a khung.

¹¹Profeh Isaiah nynh BAWIPAW kalan he a sia tuh, Ahaz kya-e khuanin tounawpaw vawlan phe anuekuh vae paw mynlyh kha nulang kaw haw a kisah.

¹²Tuh ccyh lyakhe Baladan ccapaw, Babilon Siapharan Merodak Baladan nynh Hezekiah tuh ccih zah a dan vae cipaw a thae keiccuze ccaw te lasung phusahpyate locceihtu hae kha Hezekiah kalan a saw hae.

¹³Hezekiah nynh minmin kha hoyte do-oih hae zah, a sisuainn, ngun, sui, amynkhuhpaw, aphutepaw chitui, a zunghe inn abalyn, a uccaw ccynawpaw inn kya a umpaw balyn kha a dosah hae. A inn kya te a uknaw ram kya a umpaw balyn kha Hezekiah nynh a dosah lei hae paw ccangkheit san um khyh.

¹⁴Tetuh profeh Isaiah tuh Hezekiah Siapharan kalan yn thua zah, “E ccungccaw hae nynh pawtemou a ho hae? Paw kyate mou na kalan oun thua hae?” a cipya. Hezekiah nynh, “Myarya asawnaw Babilon ram kyate nynh ka kalan oun thua hae,” a cipya.

¹⁵Isaiah nynh, “Na inn kya pawmou a muih hae?” a cipya. Hezekiah nynh, “Ka inn umpaw miakaw pong a muih hae; ka uccaw ccynawpaw inn kyaze minmin ka dosah lei hae paw ccangkheit san um khyh,” a cipya.

¹⁶Tetuh Isaiah nynh Hezekiah kha, “BAWIPAW bya kha ngaetua:

¹⁷Na inn kya a umpaw balyn te na minpaaw hae nynh atunin cia a ccakhung hae paw balyn kha Babilon lang cciakhaenaw ccyh yn thua cih; pawpaw sanmah cciataw thua lan khyh, cite BAWIPAW nynh a ci.

¹⁸Na saahku hae paw na ccapaw hae abang tuh ccaring a cciakhae cih hae zah, Babilon siapharan inn kya ryalaw khylan mih tin a reih cih hae,” a cipya.

¹⁹Tetuh Hezekiah nynh Isaiah kha, “Na hopaw BAWIPAW bya tuh ahoy,” a cipya. Pawccecize aning nynh, “Ka she lungkhu daenaw te khynnaw a um cih,” cite a tua.

²⁰Tuhlaepaw Hezekiah a cyisahnaw te a thungnaw balyn kha thuasah, pawtemou tuili te tuizypi kha rae zah khua lungkhu lang tui a thuasah cipaw kha thuasah Judah Siapharan hae Sherianaw Ccauh kya a zei hae.

²¹Hezekiah tuh a minpaaw hae ryte a ih hae; te a ccapaw Manasseh nynh amaw ccelang siapharan lang a tang.