Read Zotung Chin 2 SIAPHARAN 4 Bible Online

2 SIAPHARAN 4 - Zotung Chin bible

2 SIAPHARAN 4

¹Profeh hae phu kya-e lu kheitpaw zu nynh Elisha kha, “Na ryalahtu ka vawpaw tuh a chih vae; na ryalahtupaw tuh BAWIPAW rawrihpaw nynh thua cipaw kha nang nynh na ny, laebah oun umsahtupaw tuh ka ccaaw hae lu ning kha see lang lawku lan yn thua vae,” cite sia zah a hopya.

²Elisha nynh amaw kha, “Pawmou kae cyipah cih? Yn hopah, na inn kya pawmou na hoi?” cite khia zah aning nynh, “Na ryalahtunung nynh ka inn kya chitui ang kheit laelan pawpaw mah ka hoi vae khyh,” a cipya.

³Elisha nynh, “Atolang la cceih lah, na innpaw hae balyn kya-e ang hae, accawnghanpaw ang hae patae kha la hoh hae.

⁴Te inn lungkhu lang tee lah, namaw te na ccaaw hae nynh thuakaw khawsungkuh oh lah, ang hae lungkhu langkhe chitui ruin oh; chitui he abeihpaw ang miakaw kha akin lang nung oh,” a cipya.

⁵Tukeiccuze amaw kyate cceih zah amaw te a ccaaw hae tuh thuakaw a khawsungkuh hae; minmin nynh ang hae kha lawpah hae zah aning nynh chitui a ruin.

⁶Ang hae tuh he abeih hae te, a ccapaw kha, “Ccangpaw ang yn lawpah,” cipah zah, aning nynh, “Um vae khyh,” a cipya. Tetuh chitui tuh lua vae khyh.

⁷Tuh-e nopinung nynh Pachia ccungccapaw kalan cceih zah, tuh-e paw nynh, “La cceih lah, chitui kha la zua lah, na laebah kha la sangkuh, te alaepaw chitui khate nang te na ccaaw hae nynh khua la sah oh,” a cipya.

⁸Nin kheit tuh Elisha tuh Shunem khua lang cceih zah, tuin khua kya umpaw mihoinung lu kheit nynh Elisha kha looh-ae a kopya. Tukeiccuze tuh-e laanpi kya a ccia takyh vae ze looh ae khylan tuin kya leih a teepaw.

⁹Aning nynh a vawpaw kha, “Dotua, aening laanpi tyty a cceih bungthungpaw hynh-e ccungccapaw hynh Pachia ccungccaw mithyaapaw nynh thua.

¹⁰Inn tungvaw kya pang thungkuhpaw akhaan taraw rae oh sih lah, amaw elang ikhung, ccaboi, haungnaw te maeekhua ccangkheit kha nungpah oh sih, aening kalan yn thua ze tuin kya a um cih,” a cipya.

¹¹Nin kheit tuh Elisha tuh tuin kya yn thua zah, tuh-e akhaan kalan kae zah a ih.

¹²A ryalahtupaw Gehazi kyakhe, “Shunam nopinung kha yn kotua,” a cipya. Aning nynh yn ko zah nopinung tuh amaw malang a thadyn.

¹³Elisha nynh Gehazi kha, “Nopinung kyakhe, kaening hynh hynhcih ciate nae do-oih zah, pawmou kae cyipah cih? Siapharan kalan thuasah, rhawkaw hae a uktu rhawbawipaw kalan thuasah hopya na ry hae paw bya a um tou? cite hopya tua,” a cipya. Nopinung nynh, “Kae tuh ka ccungccaw hae laku kya nynh ka um,” a cipya.

¹⁴Elisha nynh, “Tuhte athua ze, aning elang pawmou cyipya lanpaw a um?” cite khia zah, Gehazi nynh, “Ahoy, e nopinung hynh ccapaw hoi khyh, a vawpaw tuh ataw vae,” a cipya.

¹⁵Elisha nynh, “Nopinung kha yn ko,” a cipya. Aning nynh yn ko zah nopinung tuh thuakaw kya a thadyn.

¹⁶Elisha nynh, “Khuavae atu ccyh kya, khyapaw accyh yn thua te, ccapaw na pom cih,” a cipya.Nopinung nynh, “Pou Pachia ccungccapaw, ka bawipaw, na ryalahtunung hynh yn ling nan,” a cipya.

¹⁷Nopinung tuh ccaawpoi zah Elisha nynh a hopya thyhte, khyapyapaw accyh he yn thua tuh ccapaw a saah.

¹⁸Imua tuh yn lethung zah nin kheit tuh loohruetu hae kalan a paaw kalan a cceih.

¹⁹A paaw kha, “Ka lu ccih, ka lu ccih!” a cipya. A paaw nynh a ryalahtupaw kha, “A nung kalan cciakhae,” a cipya.

²⁰Aning nynh a nung kalan a cciakhae; imua tuh a nung phae vawlan ninthu cia duakuh zah a chih.

²¹Nopinung nynh cceih zah a rhua kha Pachia ccungccapaw a ikhung vawlan a nung koute thuakaw khawsung zah a cciataw.

²²Te a vawpaw kha ko zah, “Pachia ccungccapaw kalan arangte ka cceih cih zah bua kae ki kho nawlan, ryalahtu lu kheit te lann sa kheit kha yn sawpah hae,” a cipya.

²³A vawpaw nynh, “Pawccemou amaw kalan atunin na cceih cih? Sawpaw thawpaw mah thua khyh, sabbath nin mah thua khyh,” a cipya. Aning nynh, “Phe hoy cih,” a cipya.

²⁴Te lann kha khungnin de zah a ryalahtupaw kha, “Lann hynh cciasah, kae hopah leite byabyate yn cciasahpah nan,” a cipya.

²⁵Tuhcite nopinung tuh cceih zah Karmel Mua kya Pachia ccungccapaw kya a thua. Pachia ccungccapaw nynh nopinung yn cciapaw kha he a muih tuh, a ryalahtu Gehazi kha, “Dotua, Shunam nopinung yn cceih;

²⁶tungku khylan ccuenua lah, Na dan tou? Na vawpaw so a dan tou? Imua so a dan tou? cite la khiatua,” a cipya. Nopinung nynh, “Ka dan,” a cipya.

²⁷Mua vawlan Pachia ccungccapaw kya he a thua te, a ccu kha a pom. Nopinung kha ccaring tuu khylan Gehazi nynh yn naenuaku. Thuasalama Pachia ccungccapaw nynh, “Amaw um lan um sah, pawccecize aning tuh a lungria myarya athae; e kong hynh BAWIPAW nynh kae yn muihsah khyh zah yn hopah khyh,” a cipya.

²⁸Tetuh nopinung nynh, “Ka bawipaw, ccapaw kae ngiakuh zawtou? Kae hynh yn ling nan, cite kae hopah khyh tou?” a cipya.

²⁹Elisha nynh Gehazi kha, “Taevoiboei voikuh lah, ka hoitang kha ccyngkute cceih. Lukhakheit na tungku oh ze byabeih nan, lukhakheit nynh bya ae beih zemah khungru nan; te ka hoitang kha imua a mae vawlan khe na la khang cih,” a cipya.

³⁰Te imua a nung nynh, “BAWIPAW tuh a hiin thyhte, namaw mah na hiin thyhte, nang kha kae cciataw lan khyh,” a cipya. Tukeiccuze Elisha nynh thokuh zah nopinung kha a zui.

³¹Gehazi nynh malang cceihlo zah hoitang kha imua mae vawlan a khang zemah pawpaw roi mah ccae khyh, hiinnaw muihsahnawpaw pawpaw mah um khyh. Tukeiccuze Elisha kha tungku khylan yn kinua zah, “Imua tuh tho khyh,” a cipya.

³²Elisha nynh inn lungkhu lang he a tee tuh, achihpaw imua, a ikhung vawlan a ihpaw kha a muih.

³³Tukeiccuze tee zah thuakaw khaw zah mih lu ning te a um hae, te BAWIPAW kalan saw a sang.

³⁴Te ikhung vawlan thokuh zah imua vawlan bakhung zah a mung kha imua mung te, a mit kha imua mit te, a kuih kha imua kuih te a tungsaku; tuhcite imua vawlan a bakhung lyakhe imua ngesaw tuh yn so.

³⁵Te Elisha tuh tho zah akhaan lungkhu kya cciabung cciathung a cceih, te imua vawlan bua a bakhung; imua tuh vae sari hachi zah a mit yn dae.

³⁶Elisha nynh Gehazi kha ko zah, “Shunam nopinung kha yn ko,” cipah zah a ko. Nopinung he yn thua te, Elisha nynh, “Na ccapaw hynh hoei ccavae,” a cipya.

³⁷Nopinung tuh yn thua zah Elisha a cculeihpaw laekhu kya a bakhung; te a ccapaw kha hoei zah a pou.

³⁸Elisha nynh Gilgal khua lang a ki lyakhe, tuh-e ram kya ccakan accih. Profeh hae phu kheit tuh amaw malang a haung lya hae khe, aning nynh a ryalahtupaw kha, “Profeh hae phu elang ang pipi khang lah, ehang sahtua,” a cipya.

³⁹Minmin laku e lukheitpaw tuh enaw-eho lo khylan ramkaw lang a cceih; ram tui-ung ku kha muih zah, athae kha a phu kho zeihte a boei te a poi, te yn thua zah tuh-e tuh aw zah, paw nynh athua cipaw nytaw leite, ehang ang te a thung.

⁴⁰A ae ccaw hae cite a suapya hae. Tuh-e tuh a ae lya hae khe, “Pou Pachia ccungccapaw, ang lungkhu kya chinaw a um!” cite sia hae zah, ae kho vae khyh hae.

⁴¹Elisha nynh, “Vaekhui beihtaraw oun cciakhae oh,” cipah hae zah, tuh-e tuh ang lungkhu thung zah, “Ccungccaw hae kha dang oh, ae hae sah,” a ci. Te ang lungkhu kya ri lanpaw pawpaw mah um vae khyh.

⁴²Baal-shalishah khua e ccungccapaw lu kheit nynh yn cceih zah, athae typaw barli te raekuhpaw sanlou phe kuin te a sohrae lungkhu a sangpaw pawhaleihpaw ccathae kha Pachia ccungccapaw kalan a ccyngpya. Elisha nynh, “Ccungccaw hae kha pya hae lah, ae hae sah,” a cipya.

⁴³Thuasalama a ryalahtupaw nynh, “Hynh-e te ccungccaw za kheit kha pawtemou ka dang kho cih hae?” a ci. Tukeiccuze Elisha nynh, “Ccungccaw hae kha pya hae lah, ae hae sah, pawccecize BAWIPAW nynh hynhte a ho, ‘Minmin nynh a ae cih hae zah, beihtaraw alae ung cih,’ a ci,” cite a hopya.

⁴⁴Aning nynh minmin kha dang hae zah, BAWIPAW bya thyhte, minmin nynh ae hae zah beihtaraw alae.