Read Zotung Chin 2 SIAPHARAN 6 Bible Online

2 SIAPHARAN 6 - Zotung Chin bible

2 SIAPHARAN 6

¹Profeh hae phu nynh Elisha kha, “Dotua, namaw ryte atu ah umnaw oh hmin tuh myaryasankae aby.

²Jordan vaw lang cceih oh sih lah, khuing kya thingpyng ccangkheit cci byngte, umnaw hmin sakkuh oh sih,” a cipya hae. Aning nynh, “La cceih oh,” a ci.

³Minmin laku e lu kheit nynh, “Na ryalahtu hae kaening kya cceihbua,” cipah zah, Elisha nynh, “Ka cceihbua cih,” a cipya.

⁴Tukeiccuze minmin kya a cceihbua. Jordan vaw he a thua hae te, thing hae kha a nge hae.

⁵Lukheitpaw nynh thing a ryng lyakhe a hae tuh tui lungkhu lang accah; aning nynh sia zah, “Ezou, ka bawipaw! Ka hohpaw hae nynh thua,” a cipya.

⁶Pachia ccungccapaw nynh, “Teikyamou a ccaw?” cite a khia. A ccawnaw hmin kha he a muihsah te, ccungngue kha khya zah tuin kya a saw, te hae tuh yn phaly vae.

⁷Elisha nynh, “Lah ccavae,” cipah zah, tuh-e paw nynh a kuih kha dyng zah a law.

⁸Vae kheit tuh Siria siapharan nynh Israel kha a tuk, a kuihkaw e bawi hae ryte khuakhan hae zah, “Tuin hmin, khe hmin kyakhe ka ryahmin tuh tah athua cih,” a ci.

⁹Pachia ccungccapaw nynh Israel siapharan kha byataw zah, “E hmin kya na ccia khyh nawlan oh raeringkuh oh, pawccecize Siria hae tuh tuin hmin kya a cceih cih hae,” a cipya.

¹⁰Pachia ccungccapaw nynh a hopaw hmin langkhe Israel siapharan nynh ccungccaw saw zah bya a taw hae. Aning nynh tuh-e hmin tuh a raeringku nawlan hae raeringnaw a pya hae keiccuze vae kheit vae ning lae alung lan a lue hae.

¹¹Hynh-e keiccuze Siria siapharan tuh myarya a bungzou; a kuihkaw e bawi hae kha ko hae zah, “Aening laku kya hummou Israel siapharan kalan a pan cipaw nae hopah lan khyh oh tou?” a cipya hae.

¹²A kuihkaw e bawi lu kheit nynh, “Siapharan ka bawipaw, lu kheit san um khyh, na inaw khaan kya na hopaw bya kha Israel ram umpaw profeh Elisha nynh Israel siapharan kha a hopya,” cite a cipya.

¹³Siria siapharan nynh, “Cceih oh lah, a umnaw hmin kha la ccung oh; ccungccaw ka saw cih zah ka kyng cih,” a ci. Amaw kha, “Dothan khua kya nynh a um,” cite a hopya hae.

¹⁴Tukeiccuze tuh-e khua langkhe marang hae, marangle hae te rhawkaw patae kha a saw hae; khuazi khe thua hae zah khua kha a koihlu hae.

¹⁵Pachia ccungccapaw a ryalahtupaw tuh awkhua takaw te tho zah atolang he a pou tuh, rhawkaw hae tuh marang hae te marangle hae ryte khua po voilu lan a um vae hae. A ryalahtupaw nynh, “Ezou, ka bawipaw! Pawtemou ah cyih cih oh?” a ci.

¹⁶Elisha nynh, “Rih nan, pawccecize aening kya um hae paw tuh minmin kya um hae paw laeze a lunghua hae,” a cipya.

¹⁷Te Elisha nynh sawsang zah, “Pou BAWIPAW , a muih kho nawlan a mit beih awsah tua,” a ci. Tukeiccuze BAWIPAW nynh tuh-e ryalahtupaw tuh a mit awsah zah a muih vae; Elisha a pepan po voilu lan, mua tuh marang hae, maee marangle hae khate phe abeih.

¹⁸Siria hae nynh he a ccianua bung hae tuh, Elisha nynh BAWIPAW kalan sawsang zah, “E ccungccaw hae hynh mih mit beih mohsah hae,” a ci. Tukeiccuze Elisha nynh saw a sang thyhte, mih mit a mohsah hae.

¹⁹Elisha nynh minmin kha, “E laanpi thua khyh, e khua mah thua khyh; yn zui oh lah, na ccung oh paw ccungccapaw kalan kae saw cih oh,” a cipya hae. Te Samaria khua lang a cciakhae hae.

²⁰Samaria khua he a tee takaw hae te, Elisha nynh, “Pou BAWIPAW , e ccungccaw hae nynh ngaw a muih kho nawlan hae, mih mit beih awsah hae,” a ci. BAWIPAW nynh mih mit kha awsah zah, minmin nynh Samaria khua lungkhu a um hae paw kha a nyku hae.

²¹Israel siapharan nynh minmin kha he a muih hae tuh, Elisha kha, “Apang, minmin hynh ka theih cih hae tou? Ka theih cih hae tou?” a cipya.

²²Elisha nynh, “Na theih lan khyh hae! Na thaloi te na li te na kyng hae paw kha na theih cih hae tou? Minmin nynh ae hae zah a nia ccaw hae, looh te tui kha mih malang khe nungpah hae; te mih bawipaw kalan cceih hae sah,” a cipya.

²³Tukeiccuze minmin elang loohdangnaw poi pi kha a raepya hae; a ae a neih kou hae te cciasah hae zah mih bawipaw kalan a cceih hae. Tuin koute tuh Siria hae nynh thiing khylan Israel ram lungkhu lang tee vae khyh hae.

²⁴Ccyh syntaraw aro koute, Siria siapharan Benhadad nynh a rhawkaw hae balyn kha pumte Samaria khua kha ccianua zah a koihlu.

²⁵Ccyh khaw cia a koihlu keiccuze Samaria khua kya ccakan myarya ccih, lann lu ccangkheit kha ngunphua shekel sung tarya lang zua hae zah, vahu ia kab pum pali pum kheit kha shekel ccangpangaw lang a zua hae.

²⁶Israel siapharan nynh khualungrua vawlan a ccia cciamang lyakhe nopinung lu kheit nynh ko zah, “Siapharan ka bawipaw, beih yn bawm!” a cipya.

²⁷Siapharan nynh, “BAWIPAW nynh ae bawm khyh ze, kae nynh pawtemou kae bawm kho cih? Huimin kya-e tou, tuhkhyhze misu mianaw khu kya-e tou kae muepah kho cih?” a cipya.

²⁸Siapharan nynh, “Pawmou na vawsaw?” cite khia zah, nopinung nynh, “E nopinung nynh, ‘Na ccapaw kha atunin ae sih lah, awkhualan ka ccapaw kha ae lan,’ yn cipya.

²⁹Tukeiccuze ka ccapaw kha kae thungkuh zah kae ae. Awkhualan tuh kae nynh, ‘Na ccapaw kha ae lan vae,’ ka cipya. Thuasalama a ccapaw kha zya a thuruh vae,” cite a hopya.

³⁰Siapharan nynh nopinung bya he a thae tuh, a boeining kha a seii—khualungrua vawlan a ccia lya thua zah, a pyn kya kawdah lang buriboei a lawkupaw kha ccungccaw hae nynh a muih kho hae—

³¹te aning nynh, “Shafat ccapaw Elisha a lu tuh a raw vawlan atunin a um zetuh Pachia nynh ka tungvaw kya tuh-e ciate thuasah, tuhlaeze alung lante mah thuasah cyih vae sah,” a ci.

³²Te a umnaw kyate ccungccapaw lu kheit kha a saw. Elisha tuh a inn kya haung zah piccan hae tuh amaw kya a haungbua hae. Locceihtupaw yn thua mawkhe, Elisha nynh piccan hae kha, “E ccungccatheihpaw nynh ka lu pae khylan lukhakheit kha yn saw cipaw na nyh oh tou? Locceihtupaw he yn thua te, thuakaw khaw oh lah, thuakaw kin khe phang umkhaw oh. A bawipaw laanccia roi tuh a nulang khe ccae khyh tou?” a ci.

³³Minmin kya bya a ho cciamang lyakhe siapharan tuh amaw kalan yn thua zah, “E vawsawnaw hynh BAWIPAW kyate nynh yn thua! BAWIPAW bawmnaw kha pawccemou ka ngaehoi ung cih?” a ci.