Read Zotung Chin 1 SHERIANAW 10 Bible Online

1 SHERIANAW 10 - Zotung Chin bible

1 SHERIANAW 10

¹Filistin hae nynh Israel hae kha a tuk hae; Israel hae tuh Filistin hae malang khe ccue hae zah Gilboa Mua vawlan khe patae a chih hae.

²Filistin hae nynh Saul te a ccapaw hae kha phah hae zah, Filistin hae nynh Saul ccapaw hae Jonathan, Abinadab te Malkhishua kha a chia hae.

³Rhawtuknaw kya Saul tuh myarya a teing; thekawthya hae paw nynh maw a muesah hae.

⁴Tetuh Saul nynh a rhawtuk-zunghe ccyngtu kha, “Na thaloi kha thuaakuh lah, kae hynh yn thuing, tuhteze nynh e vingdungawkuh lei hae paw nynh kae hynh ccianuate yn thuing lan khyh hae zah ccyasah nawlan yn mang lan khyh hae,” a cipya. Thuasalama a rhawtuk-zunghe ccyngtu nynh myarya rih zah thuing ry khyh. Tukeiccuze Saul nynh a thaloi kha lawkuh zah thaloi dung kha bakhung thin zah a chih.

⁵Saul a chih vae cipaw kha a rhawtuk-zunghe ccyngtu nynh he a muih tuh, aning nynh mah a thaloi kha bakhung thin zah, Saul kya a chihbua.

⁶Tuhcite Saul te a ccapaw hae lu thum te a innbyn hae balyn tuh pynkheihlan a chih hae.

⁷Israel rhawkaw hae tuh ccue hae zah Saul te a ccapaw hae tuh a chih vae hae cipaw kha accya kya um hae paw Israel hae balyn nynh he a thae hae tuh, mih khua hae kha poutaw hae zah a ccue hae; te Filistin hae nynh ccianua hae zah khua hae kha a law hae.

⁸Awkhualan khe, Filistin hae nynh michi hae uccaw kha khahku lan he oun thua hae tuh, Gilboa Mua vawlan a chih hae paw Saul te a ccapaw hae kha a muih hae.

⁹Saul lu kha pae hae zah a rhawtuk-uccaw kha a khah hae, te mih zohtuh hae kalan te ccungccaw hae kalan thongpang hoypaw ho khylan, locceihtu hae kha Filistin ram phe lekuh lan a saw hae.

¹⁰Saul a rhawtuk-uccaw kha mih pachia hae beikinn kya a nung hae; a lu kha Dagon beikinn kya a sae hae.

¹¹Filistin hae nynh Saul tungvaw a cyisahnaw hae atyn-are kha Jabesh-gilead khuaccaaw hae balyn nynh he a thae hae tuh,

¹²mih rawthung hae paw balyn nynh thonuakuh hae zah Saul rhua te a ccapaw hae rhua kha lah hae zah Jabesh khua lang a cciakhae hae. Te mih ru kha Jabesh khua e phaesi ku kaw khe a uu hae, te nin sari looh-ae a sung hae.

¹³Tuhcite Saul tuh a lungzi khyh keiccuze a chih; BAWIPAW tungvaw a lungzi khyh zah BAWIPAW kawbya kha zui khyh; tuhpiaze chihiinleihthyanung kha tuanaw ngiakute a bya kha zui ry zah,

¹⁴BAWIPAW kha tuanaw ngiakuh khyh. Tukeiccuze BAWIPAW nynh theih zah peenaw kha Jesse ccapaw David kalan a pya.