Read Zotung Chin 1 SHERIANAW 11 Bible Online

1 SHERIANAW 11 - Zotung Chin bible

1 SHERIANAW 11

¹Israel phin hae balyn nynh Hebron khua umpaw David kalan pynkheihlan oun thua hae zah, “Dotua, kaening tuh na ru te na saw nynh kae thua.

²Alia vae paw ccyh kya, Saul nynh siapharan lang oun tangpya lya heize, Israel rhawkaw hae kaw a pyatu tuh namaw nynh na thua. BAWIPAW nynh nang kha ae hopah zah: Nang tuh ka ccungccaw Israel hae tuurin na thua cih zah, ka ccungccaw Israel hae uktu na thua cih, ae cipya,” cite a hopya hae.

³Tuhcite Israel piccan hae balyn tuh Hebron khua umpaw siapharan kalan a thua hae; David nynh Hebron khua BAWIPAW malang khe minmin ryte byakinnaw a rae. Samuel kyate BAWIPAW bya yn thua thyhte, David kha Israel siapharan lang chitui a thuh hae.

⁴David te Israel hae balyn tuh Jerusalem khua lang a cceih hae, tuh-e khua tuh Jebus khua thua zah tuin ram kya um hae paw Jebus hae nynh tuin khua kya a um hae.

⁵Jebus khuaccaaw hae nynh David kha, “Hynhlang nae tee lan khyh,” a cipya hae. Thuasalama atu David khua a ci hae paw Zion rhawlungrua kha David nynh a law.

⁶David nynh, “Jebus ccungccaw hae kha masaty a tukpaw tuh rhawbawi lehuapaw athua cih,” a ci. Zeruiah ccapaw Joab nynh masaty a ccia keiccuze aning tuh rhawbawi lehuapaw lang a tang.

⁷David tuh rhawlungrua lungkhu a um keiccuze tuh-e tuh David khua a ci hae.

⁸David nynh khua kha po voilu lan, Millo kyate tho zah marya akoihkuh lante a rae; khua kya-e tuhlaepaw kha tuh Joab nynh a raethui.

⁹Vaaw BAWIPAW tuh David kya a um keiccuze aning tuh houhouh a lesae.

¹⁰E hae tuh David rhawkaw athung hae paw kya-e lupi hae nynh thua, Israel te asekuh lante BAWIPAW bya thyhte, amaw kha siapharan lang khang khylan minmin nynh a peenaw kyakhe Israel hae balyn ryte pynkheihlan thawte a bawm hae.

¹¹E hynh David rhawkaw athung hae paw konglang nynh thua: Hakhmon ccapaw Jashobeam tuh Lu Thum hae kyaze lupi nynh thua; aning nynh a ccoi ccyngkute ccungccaw za thum kha vae kheit te a chia hae.

¹²Te lu thum hae laku kya tuh-e paw koute he a zuipaw tuh Ahohi ccungccaw Dodo a ccapaw Eleazar nynh thua.

¹³Filistin hae tuh rhawtuk khylan Pas-dammim kya a sueluaku lya hae ze, aning tuh David ryte a umkheih hae. Barli phe abeihpaw loo ccyngkheit a um. Ccungccaw hae tuh Filistin hae kyate a ccue hae,

¹⁴thuasalama David te aning tuh loo ngaelung kya thadynnaw hmin lawkuh hae zah tuh-e hmin kyate Filistin hae kha a chia hae; BAWIPAW nynh taenaw lepaw te a khum hae.

¹⁵Cciakhaetu hae sung thum kya-e lu thum tuh Adullam lungkarung kya umpaw David kalan a cceih hae, tuh lyatuin Filistin rhawkaw hae tuh Refaim accya kya a rya hae.

¹⁶David tuh rhawlungrua lungkhu um zah, Filistin hae rhawviatu rhawkaw hae tuh Bethlehem kya a um hae.

¹⁷David nynh , “Lukhakheit nynh koikua pe umpaw Bethlehem tuisung kya-e tui kha nia lan yn pya ravo nyn!” cite lungdeite a ho.

¹⁸Tetuh athungpaw lu thum hae nynh Filistin hae ryahmin kha roh hae zah koikua pe umpaw Bethlehem tuisung kya-e tui kha the hae zah David kalan a cciakhae hae. Thuasalama David nynh nia leite BAWIPAW malang khe moh lae zah,

¹⁹“E tui hynh ka nia khyh nawlan ka Pachia nynh yn khee vae sah. E ccungccaw hae chiise hynh ka neih kho cih zawtou? Pawccecize ka chi ze ka chih cite cceih hae zah, e tui hynh oun thuakhae hae,” a ci. Tukeiccuze aning nynh neih khyh. Tuh-e rhawkaw hae lu thum nynh tuhcite rya a law hae.

²⁰Joab neitaw Zeruiah a ccapaw Abishai tuh Ccungccaw Sung Thum hae kyaze lupi nynh thua. A ccoi te ccungccaw za thum kha tuk hae zah a chia hae keiccuze Lu Thum hae kya a minthaanbua.

²¹Aning tuh Ccungccaw Sung Thum hae kyaze a minthaan huaccepaw thua zah mih rhawbawipaw lang a tang; thuasalama Lu Thum hae hawte tuh a minthaan khyh.

²²Kabzeel khuapaw Jehoiada ccapaw Benaiah tuh arawthungpaw ccungccaw thua zah, ryalaw lepaw a lahpaw nynh thua; Moab ccungccaw Ariel ccapaw hae lu ning kha a chia hae. Vuiraw accaw nin khe cceih zah laekarung lungkhu umpaw chindeih kha a chia.

²³Izip ccungccaw dong pangaw ahangpaw, a pynrua hoypaw kha a chia. Izip paw tuh a kuih kya phaeccya cia acihpaw ccoi a hoi; thuasalama Benaiah nynh hoitang ccyngkute ccianua zah, Izip paw kuih kya-e ccoi kha a lua koute amaw ccoi toulou maw te a chia.

²⁴Jehoiada ccapaw Benaiah nynh tuhcite cyih zah athungpaw lu thum hae kya a minthaanbua.

²⁵Aning tuh ccungccaw Sung Thum hae kya a minthaanbua, thuasalama Lu Thum hae hawte tuh a minthaan khyh. David nynh amaw a rhawviatu hae lupi lang a nung.

²⁶Rhawkaw hae kyaze mih rawthung hae paw tuh, Joab neitaw Asahel, Bethlehem khuapaw Dodo ccapaw Elhanan,

²⁷Harod khuapaw Shammah, Pelon ccungccaw Helez,

²⁸Tekoa khuapaw Ikkesh a ccapaw Ira, Anathoth khuapaw Abeizer,

²⁹Hushath ccungccaw Sibbekai, Ahoh ccungccaw Ilai,

³⁰Netofah khuapaw Maharai, Netofah khuapaw Baanah ccapaw Heled,

³¹Benjamin phin hae kya-e Gibeah khuapaw Ribai ccapaw Ithai, Pirathon ccungccaw Benaiah,

³²Gaash accya hae ccungccaw Hurai, Arbath ccungccaw Abiel,

³³Baharum ccungccaw Azmaveth, Shaalbon ccungccaw Eliahba,

³⁴Gizon ccungccaw Hashem, Harar ccungccaw Shagee ccapaw Jonathan,

³⁵Harar ccungccaw Sakhar ccapaw Ahiam, Ur ccapaw Elifal,

³⁶Mekherath ccungccaw Hefer, Pelon ccungccaw Ahijah,

³⁷Karmel ccungccaw Hezro, Ezbai ccapaw Naarai,

³⁸Nathan neitawpaw Joel, Hagri ccapaw Mibhar,

³⁹Ammon ccungccaw Zelek, Beeroth khuapaw Naharai, aning tuh Zeruiah ccapaw Joab kya-e rhawtuk-zunghe ccyngtu nynh thua,

⁴⁰Ithra ccungccaw Ira, Ithra ccungccaw Gareb,

⁴¹Hit ccungccaw Uriah, Ahlai ccapaw Zabad,

⁴²Reuben phinpaw Shiza ccapaw Adina, aning tuh Reuben phin hae te amaw kya um hae paw sung thum hae cciakhaetu nynh thua,

⁴³Maakah ccapaw Hanan te Mithni ccungccaw Joshafat,

⁴⁴Ashterath ccungccaw Uzzia, Aroer ccungccaw Hotham ccapaw hae Shama te Jeiel,

⁴⁵Tiz ccungccaw Shimri ccapaw Jediael te a neitawpaw Joha,

⁴⁶Mahav ccungccaw Eliel, Elnaam ccapaw hae Jeribai te Joshaviah, Moab ccungccaw Ithmah,

⁴⁷Mezoba ccungccaw Eliel, Obed te Jaasiel nynh thua hae.