Read Zotung Chin 1 SHERIANAW 12 Bible Online

1 SHERIANAW 12 - Zotung Chin bible

1 SHERIANAW 12

¹Kish ccapaw Saul keiccuze David tuh rythyte a ccia bungthung kho khyh lyakhe, akawlan e ccungccaw hae tuh Ziklag khua umpaw David kalan oun thua hae paw nynh thua; minmin tuh rhawtuknaw kya David a bawmtu hae athungpaw rhawkaw hae kya a umbua hae.

²Minmin tuh thekawthya hae paw, mih voi mih rang te the kaw te lung deih athya hae paw, Benjamin phin hae, Saul a puizia hae nynh thua.

³Ale huapaw lupi tuh Ahiezer, tukoute Joash thua zah, parouh mawte Gibeah khuapaw Shemaah ccapaw hae nynh thua; Azmaveth ccapaw hae Jeziel te Pelet; Berakah, Anathoth ccungccaw Jehu,

⁴Gibeon khuapaw Ishmaiah, aning tuh Sung Thum hae kyaze athungpaw thua zah Sung Thum hae a uktu cciakhaetu nynh thua; Gederah khuaccaaw hae tuh Jeremiah, Jahaziel, Johanan, Jozabad,

⁵Haruf khuaccaaw hae tuh Eluzai, Jerimoth, Bealiah, Shemariah, Shefatiah,

⁶Korath ciihan hae tuh Elkanah, Isshiah, Azrel, Joezer te Jashobeam;

⁷te Gedor khuaccaaw hae tuh Jeroham ccapaw hae Joelah te Zebadiah.

⁸Ramkaw rhawlungrua akoihkunaw a umpaw David kalan a cceih hae paw, thung zah rhawtuk boi vae hae paw, khawriaphua te ccoi a mangthya hae paw, mih maesue tuh chindeih maesue lo zah mua vaw e sazuh hawte mih liazawpaw Gad phin hae tuh:

⁹Lupi tuh Ezer, lu ningnaw Obadiah, lu thumnaw Eliab,

¹⁰lu palinaw Mishmannah, lu pangawnaw Jeremiah,

¹¹lu taruhnaw Attai, lu sarinaw Eliel,

¹²lu taryanaw Johanan, lu takuanaw Elzabad,

¹³lu hawnaw Jeremiah, lu haw lae kheitnaw Makbannai.

¹⁴E Gad phin hae tuh rhawkaw hae kyaze bawi hae thua zah, adih huapaw tuh milu za kheit, ale huapaw tuh milu thong kheit a uktu hae nynh thua.

¹⁵E hae tuh masaty sawpaw kya Jordan vaw varae balyn tui pong aleiku lyaze vaw kha zua hae zah nithua lang te niccaw lang accya kya um hae paw kha a deetu hae nynh thua.

¹⁶Benjamin phin hae te Judah phin hae abang tuh David kalan rhawlungrua akoihkunaw lang oun thua hae.

¹⁷David nynh tungku khylan pounua hae zah, “Ccawkunaw te kae hynh bawm khylan nae cceih oh paw athua ze, ka nawccah; thuasalama ka tungvaw cyiseinaw a um lei pite, ka rhaw hae kuih kalan pya khylan nae cceih oh paw athua zetuh, ah minpaaw hae Pachia nynh muih sah lah, byapia vae sah,” a cipya hae.

¹⁸Tetuh sung thum hae lakuze lupi athuapaw Amasai tungvaw kya muisaw yn thua zah aning nynh a hopaw tuh: “Pou David, kaening tuh na ccungccaw hae nynh kae thua; Pou Jesse ccapaw, namaw kalan a pan hae paw nynh kae thua! Daenaw, daenaw tuh na kya um vae sah, daenaw tuh nang ae bawmtu hae kya um vae sah! Pawccecize na Pachia tuh nang ae bawmtu nynh thua,” a cipya. Tetuh David nynh minmin kha lehkhan hae zah, a rhawkaw hae a uktu bawi lang a nung hae.

¹⁹David tuh Filistin hae ryte Saul dou khylan a ccia lya hae khe, Manasseh phin hae abang tuh David kalan a ccue hae. (David nynh Filistin hae kha bawm khyh hae, pawccecize Filistin uktu hae nynh tuanaw suelua hae zah, “Aening hynh oun phee cih zah a bawipaw Saul kalan oun zuakuh sei cih,” cite tua hae zah Ziklag lang a kisah hae.)

²⁰David nynh Ziklag lang a ccia lyaze amaw kalan a ccue hae paw Manasseh phin hae tuh: Adnah, Jozabad, Jediael, Mikhael, Jozabad, Elihu te Zillethai; e hae tuh Manasseh phin kya-e milu athong a uktu lupi hae nynh thua.

²¹Ccungccaw thiingtu hae aphu kha dounaw kya minmin nynh David kha a bawm hae, pawccecize minmin tuh mih balynte athungpaw thua hae zah rhawkaw hae kya-e rhawbawi hae nynh thua.

²²Pachia rhawkaw phu hawte myarya lepaw rhawkaw phu lang a tang mawlaezung ccungccaw hae tuh nin takyh mawte David bawm khylan oun thua hae.

²³BAWIPAW bya thyhte, Saul peenaw kha David kalan pya khylan David a umnaw Hebron khua lang oun thua hae paw, zunghe a hoipaw rhawkaw hae phu kya-e milu rianaw tuh hynhte nynh thua.

²⁴Judah ccungccaw hae khawriaphua te ccoi ccyngkute zunghe a hoipaw rhawkaw hae tuh thong taruh za tarya acih hae.

²⁵Simeon phin hae kya-e athungpaw rhawkaw hae tuh thong sari za kheit.

²⁶Levi phin hae kya-e thong pali za taruh.

²⁷Aaron ciihan hae cciakhaetu Jehoiada te amaw kya um hae paw tuh thong thum za sari.

²⁸Athungpaw ccangvaepaw Zadok te a puizia hae kya-e rhawbawi hae lu kuin lae ning.

²⁹Benjamin phin, Saul a puizia hae thong thum, e phin kya-e alunghua tuh Saul ciihan hae kya lungzite a um hae.

³⁰Efraim phin hae, mih puizia hae kya aphu-e hae paw, athungpaw rhawkaw hae thong kuin za tarya.

³¹David kha siapharan lang khang khylan ccia lan min ccazing law athua hae paw Manasseh phin angankuh hae tuh thong haw lae tarya acih hae.

³²Issakhar phin kya-e ccyh nyhthya zah Israel nynh a cyi lanpaw a nyhthya hae paw lupi za ning te mih kuihkaw e mih puizia hae balyn.

³³Zebulun phin kya-e mih lungzipaw, eenaw ccangkheit te David kha bawm khylan, rhawtuk lan rhawtuk-zunghe phe ccing lan a ccyngkuh hae paw rhawkaw thong sung pangaw,

³⁴Naftali phin kya-e rhawbawi thong kheit te minmin ryte um hae paw khawriaphua te ccoi a ccyngkuh hae paw rhawkaw sung thum thong sari.

³⁵Dan phin kya-e rhawtuknaw ccangpya athua vae hae paw thong kuin lae tarya za taruh.

³⁶Asher phin kya-e alungzipaw rhawkaw hae, rhawtuk lan paccynkute um hae paw thong sung pali.

³⁷Jordan vaw khuraw lang um hae paw Reuben phin hae, Gad phin hae te Manasseh phin hae angankuh kya-e rhawtuknawpaw zunghe phe ccing lan a ccyngkuh hae paw cciing kheit thong kuin acih hae.

³⁸E hae balyn, rhawtuknaw kalan ccia lan paccynkute um hae paw tuh David kha siapharan lang khang lan cite eenaw ccaccing te Hebron khua lang a cceih hae; tuhmaminte tuhlaepaw Israel hae balyn tuh David kha siapharan lang khang khylan mih lungnging.

³⁹Minmin tuh David ryte nin thum umkheih hae zah a ae a neih hae, pawccecize mih puizia hae nynh a paccynpya hae.

⁴⁰Te anaenaw um hae paw nynh mah, Issakhar ram, Zebulun ram te Naftali ram kyacia um hae paw nynh looh kha lann, kalauh, lann adihpaw phin te tangnuapaw hae khate oun phu hae—aepaw aphuinphuin, saw, thaeku sanlou aphepaw hae, misu thae ange hae, misutui, chitui, tangnuapaw hae te tuu hae kha oun phu hae, pawccecize Israel ram kya lungpawnaw a um.