Read Zotung Chin 1 SHERIANAW 13 Bible Online

1 SHERIANAW 13 - Zotung Chin bible

1 SHERIANAW 13

¹David nynh ccungccaw athong uktu te aza uktu rhawbawi hae te cciakhaetu miakaw ryte tuanaw a suelua hae.

²David nynh Israel ccungccaw zapi hae balyn kha, “Nanning nynh ahoy cite na tua oh zah BAWIPAW ah Pachia rynaw athua zetuh, Israel ram pynpi kya um hae paw tuhlaepaw ah uno hae, sahiin rampaeenaw hae a hoipaw khua hae kya um hae paw ranpibawi hae te Levi hae kha aening kalan pyku bua lan ccungccaw sawte hyy oh sih.

³Te ah Pachia thingkua kha ahmaw kalan bua lah oh sih; pawccecize Saul she lyaze aening nynh ah la sawphah oh,” a cipya hae.

⁴Ccungccaw zapi balyn nynh tuhcite cyi lan mih nawccah, pawccecize tuh-e tuh ccungccaw balyn nynh a ry hae.

⁵Tukeiccuze David nynh Pachia thingkua kha Kiriath-jearim kyate cciakhae khylan Izip ram e Shihor vaw kyate Lebo-hamath khua kyacia um hae paw Israel hae balyn kha a pum hae.

⁶Cherubim vawlan a haungpaw BAWIPAW min te kopaw Pachia thingkua kha law khylan Israel hae balyn tuh Baalah khua lang a cceih hae, tuh-e khua tuh Judah kya-e Kiriath-jearim khua nynh thua.

⁷Pachia thingkua kha le thawpaw vawlan khangte Abinadab inn kyate a cciakhae hae, Uzza te Ahio nynh le kha a mawng hae.

⁸David te Israel hae balyn tuh hlaw te tintang te tyng te daw te lanchi te mungkae hae khate Pachia malang khe mih thawzung balyn te a law hae.

⁹Khidon huimin kya he a thua hae te, tangnuapaw hae nynh thingkua kha a thyngbia hae keiccuze Uzzah nynh thingkua kha kyng khylan a kuih a dyngnua.

¹⁰BAWIPAW thinrianaw tuh Uzzah tungvaw maee lang arua; thingkua kha a kyng keiccuze detah zah tuin kya Pachia malang khe a chih.

¹¹BAWIPAW nynh Uzzah tungvaw a thinria keiccuze David tuh a thinria; tukeiccuze tuh-e hmin tuh atunin cia Perez-uzzah cite a ko hae.

¹²Tuin nin khe David nynh BAWIPAW kha rih zah, “BAWIPAW thingkua hynh pawtemou ka kalan ka thuakhae ngan cih?” a ci.

¹³Tukeiccuze David nynh thingkua kha David khua lungkhu lang teekhae khyh; Git khuapaw Obed-edom inn langkhe a cciakhae.

¹⁴Pachia thingkua tuh Obed-edom inn kyakhe a innbyn hae ryte sawpaw sah thum a um; BAWIPAW nynh Obed-edom innbyn te a hoipaw balyn kha hythua a pya.