Read Zotung Chin 1 SHERIANAW 14 Bible Online

1 SHERIANAW 14 - Zotung Chin bible

1 SHERIANAW 14

¹Tair siapharan Hiram nynh David hanlan inn sakpya khylan locceihtu hae kha sidar thing hae, pazan thya hae paw te lehccama hae ryte a saw hae.

²BAWIPAW nynh David kha Israel siapharan lang a khangpaw te a ccungccaw Israel hae hanlan a peenaw a hangthungpaw kha David nynh a ny.

³David nynh Jerusalem khua kya zu hae hoichih zah David tuh ccapaw hae te ccanung hae patae paaw lang a tang.

⁴David nynh Jerusalem khua kya a saah hae paw a ccaaw hae min tuh: Shammua, Shobab te Nathan; Solomon,

⁵Ibhar, Elishua te Elpelet;

⁶Nogah, Nefeg te Jafia;

⁷Elishama, Beeliada te Elifelet.

⁸David tuh Israel siapharan lang chitui a thuh vae hae cipaw kha Filistin hae nynh he a thae hae te, Filistin hae balyn nynh David kha ccung khylan a cceih hae; tuh-e konglang tuh David nynh thae zah minmin kha tuk khylan a ccianua hae.

⁹Filistin hae nynh oun cceih hae zah Refaim accya um hae paw kha a thiing hae.

¹⁰David nynh Pachia kha khia zah, “Filistin hae kha tuk lan ka ccianua cih hae tou? Minmin kha ka kuih kalan nae pya cih hae tou?” a cipya. BAWIPAW nynh David kha, “Ccianua hae; pawccecize Filistin hae kha na kuih kalan kae pya ccaccing cih,” a cipya.

¹¹Tukeiccuze David tuh Baal-perazim lang cceih zah, tuin kyakhe minmin kha a tae hae. David nynh, “Pachia nynh ka rhaw hae kha avuakuhpaw tuileih hawte ka kuih te a vuasaku vae hae,” a ci. Tukeiccuze tuh-e hmin tuh Baal-perazim cite a ko hae.

¹²Mih zohtuh hae kha tuin kya a vuasya hae, te David nynh kawpya hae zah maee te a soi hae.

¹³Filistin hae tuh bua oun cceih hae zah, accya kya um hae paw kha a thiing hae.

¹⁴David nynh Pachia kha bua he a khia tuh Pachia nynh, “Na deehui lan khyh hae; koihlu hae lah, balsam thing hae te arawsekunaw kyakhate na naangbia cih hae.

¹⁵Balsam thing dung hae kyakhe mih siho kha he na thae te, rhawtuk khylan na pou cih; pawccecize Filistin rhawkaw hae kha chia khylan Pachia tuh na malang a cceih lalo vae,” a cipya.

¹⁶Pachia nynh kaw a pya thyhte David nynh cyih zah, Filistin rhawkaw hae kha Geba kyate Gezer kyacia po a chia hae.

¹⁷David a minthaannaw tuh ram miakaw kya zeihkuh zah, BAWIPAW nynh minphuin hae balyn kha David raw a risah hae.