Read Zotung Chin 1 SHERIANAW 16 Bible Online

1 SHERIANAW 16 - Zotung Chin bible

1 SHERIANAW 16

¹Pachia thingkua kha cciakhae hae zah David nynh a sakpyapaw bu lungkhu khe a nung hae; te Pachia malang khe maee-ute silawnaw te ccawkunaw silawnaw kha a rae hae.

²David nynh maee-ute silawnaw te ccawkunaw silawnaw kha he a rae koute BAWIPAW min te ccungccaw hae kha hythua a pya hae;

³Israel ccungccaw miakaw—nopi te pise phe lokuh lante—sanlou phe kheit, saw nge kheit te misu thae aroupaw aphe phe kheit cci kha ccarou a nee hae.

⁴Levi phin hae abang kha BAWIPAW thingkua malang ryalahtu lang, BAWIPAW , Israel Pachia kalan sawsang khylan, lungtuabya ho khylan te thehoysah khylan a khang hae.

⁵Lupi tuh Asaf, amaw koute lu ningnaw Zekhariah, Jeiel, Shemiramoth, Jehiel, Mattithiah, Eliab, Benaiah, Obed-edom te Jeie; minmin tuh tintang te tintang dihpaw a khua cih hae paw nynh thua; Asaf tuh lanchi a khua cih paw thua zah,

⁶ranpibawi Benaiah te Jahaziel tuh BAWIPAW byakin thingkua malang mungkae tyty a tu cih hae paw nynh thua.

⁷Te tuin nin khe David nynh BAWIPAW kalan thehoysahnaw hlawsah khylan Asaf te a puizia hae kha a khang hae.

⁸BAWIPAW kalan lungtuabya ho oh, a min kha ko oh lah, a cyipaw kha ccungccaw hae nysah oh.

⁹Amaw kalan hlawsah oh, thehoysahnaw hlawsah oh; ngaeangthua lan umpaw a ryalaw balyn kha ho oh.

¹⁰A min thyaapaw kha phu-esah oh; BAWIPAW a ccung hae paw thinlung tuh a lungtua sah.

¹¹BAWIPAW te a thawzung kha ccungtua; a mitmae kha ccung zungzae oh.

¹²Pou a ryalahtu Abraham ciihan, a popaw Jakob ccaaw hae, ngaeang lan umpaw a la cyipaw, ngaeang lan umpaw a ryalaw hae te a hopaw byapianaw kha liathui oh.

¹⁴Aning tuh BAWIPAW ah Pachia nynh thua; a byapianaw tuh laephi pynpi hanlan nynh thua.

¹⁵A byakinnaw kha zungzae a liathui, kaw a pyapaw kha she thong kheit cia a liathui,

¹⁶Abraham kya a raepaw byakinnaw, Isak kya a kinpyakupaw a byakinnaw,

¹⁷Jakob kya phungbya lante tynsah zah, Israel kya zungzae tynpaw byakinnaw lante a tynsah,

¹⁸“Kanaan ram hynh rho lang kae pya cih,” a la cipaw kha a liathui.

¹⁹Minmin tuh milu beihtaraw kyalya cih hae zah, ramccang ccungccaw lang tangte

²⁰ram kheit kyate ram kheit kalan, pee kheit kyate ccangpaw pee kheit kalan he a khiavuikuh hae tuh,

²¹minmin tungvaw tuaasahnaw rae lan, aning nynh humhung sanmah ua khyh; minmin keiccuze siapharan hae kha pe hae zah,

²²“Chitui ka thuh hae paw kha ty nan oh; ka profeh hae kha vawsawnaw pya nan oh,” a cipya hae.

²³Laephi ccungccaw balyn, BAWIPAW kalan hlawsah oh. a khumnaw thehoypaw kha nin takyhte ho oh.

²⁴Minphuin hae kalan a phu-enaw kha siakhae oh lah, ccungccaw balyn kalan ngaeangthua lan umpaw a ryalaw kha ho oh.

²⁵BAWIPAW tuh lesae zah, thawmawte thehoysah lanpaw nynh thua; ccangpaw pachia hae balyn laeze sawtuahua lanpaw nynh thua.

²⁶Minphuin ccangpaw hae kya-e pachia hae tuh zohtuh hae nynh thua, thuasalama BAWIPAW nynh vaawlui kha a rae.

²⁷Sawtuanaw te lesaenaw tuh amaw malang a um; thawzung te lungpawnaw tuh amaw a umnaw hmin kya a um.

²⁸Pou minphuin hae balyn, BAWIPAW kha thehoysah oh, BAWIPAW a phu-enaw te a thungnaw kha thehoysah oh.

²⁹A phu-epaw BAWIPAW min kha thehoysah oh; silawnawpaw kha ccyngkute amaw malang cceih oh. Alesaepaw thyaanaw khate BAWIPAW kha beik oh;

³⁰laephi ccungccaw balyn, amaw malang rawrite um oh. Laephi tuh tynkaring lan a thadyn; nuekuh boi lan khyh.

³¹Vaawlui hae tuh mih lungpaw sah lah, laephi tuh a lungtua sah. “BAWIPAW tuh siapharan nynh thua!” cite minphuin hae kya ho hae sah;

³²Rili te a lungkhu um hae paw tuh sia hae sah; loo te a lungkhu umpaw atyn-are balyn tuh mih lungtua sah.

³³Te ramkaw e thingku balyn tuh BAWIPAW malang lungtuate hlaw a sah cih hae; pawccecize BAWIPAW tuh laephi kha byapia khylan yn thua.

³⁴BAWIPAW tuh hoy zah atynpaw a sungsahnaw tuh zungzae atyn keiccuze amaw kalan lungtuabya ho oh.

³⁵“Pou kaening oun khumtu Pachia, athyaapaw na min kha kae luung zah namaw thehoysahnaw kyakhe phu kae esah nawlan, minphuin hae laku kyate kaening hynh khumte oun suelua lah, oun luesah tua.

³⁶BAWIPAW , Israel Pachia tuh zungzae te zungzae cia thehoysah thua vae sah,” cite ho oh. Ccungccaw balyn nynh, “Amen!” ci hae zah, BAWIPAW kha the a hoysah hae.

³⁷David nynh Asaf te a uno hae kha BAWIPAW byakin thingkua malang khe nin takyhte ahoboupaw rya kha tyty law khylan a nungsya hae,

³⁸Obed-edom te a puizia hae sung taruh lu tarya kha mah a khang hae; Jeduthun ccapaw Obed-edom te Hosah tuh thuakaw ngawtu nynh athua hae.

³⁹Te ranpibawi Zadok te a uno hae ranpibawi hae kha Gibeon khua ahangpaw hmin kya umpaw BAWIPAW beikbu malang khe a nungsya hae,

⁴⁰BAWIPAW nynh Israel hae kaw a pya hae paw a kawbya kya azeikuhpaw balyn thyhte, minmin nynh awkhua te zete ccyh kya maee-ute silawnawpaw silawhang vawlan khe BAWIPAW kalan maee-ute silawnaw kha tyty a rae cih hae.

⁴¹BAWIPAW sungsahnaw tuh zungzae atyn keiccuze amaw kalan lungtuanaw byaho khylan Heman te Jeduthun thuasah, popaw te min ccazing law athua hae paw mingccang hae thuasah minmin kya a umbua hae.

⁴²Heman te Jeduthun nynh hlawsahnaw hanlan mungkae te lanchi hae kha hoi hae zah hlaw thyaapaw hanlan khuakupaw uccaw hae kha a hoi hae. Jeduthun ccapaw hae kha thuakaw ngawtu lang a nung hae.

⁴³Te ccungccaw balyn tuh mih inn raveih lang ki hae zah David tuh a innbyn hae kha hythuapya khylan a inn lang a cceih.