Read Zotung Chin 1 SHERIANAW 18 Bible Online

1 SHERIANAW 18 - Zotung Chin bible

1 SHERIANAW 18

¹Tukoute David nynh Filistin hae kha tuk hae zah a tae hae; David nynh Filistin hae kuih kyate Gath khua te khua taraw hae kha a law.

²Moab ram kha tae zah Moab hae tuh David kuihkaw um hae zah ngunto kha a pya hae.

³David nynh Zufrates vaw kya a lungbing bing khylan a ccia lyakhe Hamath langsang a umpaw Zobah siapharan Hadadezer kha mah a chia.

⁴David nynh aning kyate marangle thong kheit, marang rhawkaw thong sari te ccu rhawkaw thong kuin kha a kyng hae. David nynh marangle a suepaw marang hae balyn kha mih ccukantho a seih hae, thuasalama marangle za kheit hanlan phe azaw lante a haang bang hae.

⁵Damaskas khua e Siria hae nynh Zobah siapharan Hadadezer kha bawm khylan he oun cceih hae tuh, David nynh Siria hae kha thong kuin lae ning a chia hae.

⁶David nynh Damaskas khua e Siria hae kyakhe rhawviatu hae kha a nung hae; Siria hae tuh David kuihkaw um hae zah ngunto a pya hae. BAWIPAW nynh David kha a ccianaw takyh kya taenaw a pya.

⁷Hadadezer a ryalahtu hae nynh a ccyng hae paw sui khawriaphua hae kha David nynh lah zah Jerusalem lang a phu.

⁸Hadadezer kya-e khua hae Tibaath te Kun kyate sohin patae kha David nynh a law. Tuh-e tuhte Solomon nynh sohin tuikua, sohin tung te sohin angphe hae kha a rae.

⁹Zobah siapharan Hadadezer a rhawkaw hae balyn kha David nynh a tae vae cipaw Hamath siapharan Tou nynh he a thae te,

¹⁰David nynh Hadadezer kha tuk zah a tae keiccuze byabeih khylan te lungtuakhae khylan David Siapharan kalan khe a ccapaw Joram kha a saw; pawccecize Hadadezer nynh Tou kha atu te atu rhaw a tuk. Joram nynh ngun, sui, sohin te raekuhpaw uccaw hae kha a ccyngpya;

¹¹tuh-e uccaw hae kha mah David Siapharan nynh a taepaw minphuin hae balyn, Edom hae, Moab hae, Ammon hae, Filistin hae te Amalek kyate a lawpaw sui te ngun hae ryte BAWIPAW kalan pynkheihlan a pya.

¹²Zeruiah ccapaw Abishai nynh Loi Accya kyakhe Edom ccungccaw hae thong haw lae tarya kha a chia hae.

¹³Edom ram kya rhawviatu hae kha a nung hae; Edom hae balyn tuh David kuihkaw a um hae. BAWIPAW nynh David kha a ccianaw takyh kya taenaw a pya.

¹⁴Tuhcite David nynh Israel ram pynpi kha a uk; David nynh a ccungccaw hae balyn kha byading te ngingnaw te a uk hae.

¹⁵Zeruiah ccapaw Joab tuh rhawkaw hae a uktu rhawbawi thua zah Ahilud ccapaw Jehoshafat tuh ccazing zeitu nynh thua;

¹⁶Ahitub ccapaw Zadok te Abiathar ccapaw Ahimelek tuh ranpibawi hae thua hae zah, Seraiah tuh ryaccinkhan nynh thua;

¹⁷Jehoiada ccapaw Benaiah nynh Khereth hae te Peleth hae kha a uk hae; David ccapaw hae tuh siapharan rya kya bawi lepaw hae nynh thua hae.