Read Zotung Chin 1 SHERIANAW 19 Bible Online

1 SHERIANAW 19 - Zotung Chin bible

1 SHERIANAW 19

¹Tukoute Ammon hae siapharan Nahash tuh chih zah a ccapaw tuh amaw ccelang siapharan lang a tang.

²David nynh, “Hanun paaw Nahash tuh ka tungvaw a lungzi keiccuze a ccapaw Hanun tungvaw kya lungzite ka ccuepe cih,” a ci. Tukeiccuze David nynh a paaw te asekuh lante lungtangnaw pya khylan locceihtu hae kha a saw hae. David a locceihtu hae tuh Ammon hae ram kya he a thua hae te,

³Ammon hae bawi hae nynh mih bawipaw Hanun kyakhe, “David nynh lungtangnaw pyatu hae kha na kalan yn saw hae keiccuze na paaw kha sawtuanaw a pyapaw nynh thua cite na tua tou? A ryalahtu hae tuh ram hynh akaw-aleih dote dophi khylan te ro khylan na kalan oun thua khyh hae tou?” a cipya hae.

⁴Tukeiccuze Hanun nynh David ryalahtu hae kha kyngte mih khawming kha a ngo hae, mih boeining kha ccepahthua te aw hae zah a cciasah hae, te minmin tuh a cceih hae.

⁵Tuh-e tuh David kya he a hopah hae te, minmin tuh myaryamaw mih maethya keiccuze minmin kha cciadue khylan locceihtu hae a sawpya hae. Te siapharan nynh, “Nae khawming asae mawlaezung Jeriko khua kya la um oh, tukoute nae ki cih oh,” a cipya hae.

⁶Ammon hae nynh David tungvaw cceikhyanaw kae rae vae cipaw he a nyh hae te, Hanun te Ammon hae nynh Mesopotamia ram, Aram-maakah ram te Zobah ram kya-e marangle hae te marang rhawkaw hae hohnaw lanpaw ngun talent thong kheit kha a ky hae.

⁷Marangle sung thum thong ning te Maakah siapharan te a rhawkaw hae kha a hoh hae, te cceih hae zah Medeba malang khe a rya hae. Mimaw khua raveih kya-e Ammon hae kha pum hae zah rhawtuknaw lang a cceih hae.

⁸Tuh-e tuh David nynh he a thae te, Joab te athungpaw rhawkaw hae balyn kha a saw hae.

⁹Ammon hae tuh oun pou hae zah koikua teenaw kyakhe rhawtuk lan a um hae; oun cceih hae paw siapharan hae tuh mawmaw raveihte ramkaw khe a um hae.

¹⁰Joab nynh nulang malang te rhaw yn tuk vae cih hae cipaw he a nyh tuh, Israel hae lungkhu e athung huaccepaw ccungccaw abang kha po hae zah Siria hae kha tuk khylan a nung hae;

¹¹tuhlaepaw a ccungccaw hae kha tuh Ammon hae kha tuksah khylan a neitawpaw Abishai kuihkaw khe a nung hae.

¹²Joab nynh, “Siria hae tuh ka hanlan myaryamaw a thung hae ze, nang nynh nae bawm cih; te Ammon hae tuh na hanlan myaryasankae a thung hae ze, kae ccianua cih zah kae bawm cih.

¹³Rawthungte um lah, ah ccungccaw hae hanlan te ah Pachia khua hae hanlan rawhoyte um sih; BAWIPAW nynh ahoy a ci thyhte cyih vae sah,” a cipya.

¹⁴Tetuh Joab te a kya um hae paw tuh Siria hae kha tuk khylan naenuakuh hae zah, a malang te Siria hae tuh a ccue hae.

¹⁵Siria hae a ccue vae hae cipaw kha Ammon hae nynh he a muih hae tuh, minmin mah Joab neitaw Abishai malang te ccue hae zah khua lungkhu lang a tee hae. Te Joab tuh Jerusalem lang a ki.

¹⁶Thuasalama Israel hae nynh oun tae vae hae cipaw kha Siria hae nynh he a muih hae tuh, locceihtu hae saw hae zah Zufrates vaw khuraw lang um hae paw Siria hae, Hadadezer a rhawbawipaw Shofak nynh a uk hae paw kha a kosah hae.

¹⁷Tuh-e tuh David kya he a hopah hae te, aning nynh Israel hae balyn kha pynkheihlan suelua hae zah Jordan vaw kha a zua hae, te rhaw hae kya thua hae zah minmin kha rawsete a rhawkaw hae kha umnaw a lawsahku hae. David nynh Siria hae kha tuk ty hae zah minmin nynh mah a tuk hae.

¹⁸Siria hae tuh Israel hae malang te a ccue hae; David nynh Siria hae marangle ccikuh hae paw rhawkaw thong sari te ccu rhawkaw thong sung pali kha a chia hae, mih rhawbawipaw Shofak kha mah a chia.

¹⁹Israel hae nynh oun tae vae hae cipaw kha Hadadezer a ryalahtu hae nynh he a muih hae tuh, David ryte daenaw rae hae zah a kuihkaw kya a um hae. Tukeiccuze Siria hae nynh Ammon hae kha bawm ry vae khyh hae.