Read Zotung Chin 1 SHERIANAW 26 Bible Online

1 SHERIANAW 26 - Zotung Chin bible

1 SHERIANAW 26

¹Sakoih ngawtu hae rya neenaw tuh hynhte nynh thua: Korah phin Asaf ciihan hae kya-e Kore ccapaw Meshelemiah.

²Meshelemiah nynh ccapaw hae a saah: ccatawccaw tuh Zekhariah, lu ningnaw Jediael, lu thumnaw Zebadiah, lu palinaw Jathniel,

³lu pangawnaw Elam, lu taruhnaw Jehohanan te lu sarinaw Eliehoenai nynh thua.

⁴Obed-edom nynh ccapaw hae a saah: ccatawccaw tuh Shemaiah, lu ningnaw Jehozabad, lu thumnaw Joah, lu palinaw Sakhar, lu pangawnaw Nethanel,

⁵lu taruhnaw Ammiel, lu sarinaw Issakhar te lu taryanaw Peullethai nynh thua; pawccecize Pachia nynh Obed-edom kha hythua a pya.

⁶A ccapaw Shemaiah nynh mah mih puizia hae raveih kya uktu lang tang hae paw kha a saah hae, pawccecize minmin tuh myarya ryalah kho hae paw nynh thua.

⁷Shemaiah ccapaw hae tuh: Othni, Refael, Obed, Elzabad te ryalah kho hae paw mih uno hae Elihu te Semakhiah nynh thua hae.

⁸E hae balyn tuh mih ccapaw hae te mih uno hae ryte Obed-edom ccapaw hae nynh thua, minmin tuh ryalawnaw hanlan athung hae paw, rya phe lah kho hae paw nynh thua; Obed-edom ciihan tuh sung taruh lu ning acih hae.

⁹Meshelemiah nynh ccapaw hae te uno hae a hoi hae, rya phe lah kho hae paw pise lu haw lae tarya acih hae.

¹⁰Merari ccapaw hae kya-e Hosiah nynh ccapaw hae a saah: lupi tuh Shimri (aning tuh ccatawccaw athua khyh zemah a paaw nynh lupi lang a nung),

¹¹lu ningnaw Hilkiah, lu thumnaw Tebaliah, lu palinaw Zekhariah; Hosah ccapaw hae te a uno hae tuh mih balynte lu haw lae thum acih hae.

¹²Mih uno hae nynh BAWIPAW inn kya rya a hoi hae hawte, e sakoih ngawtu hae lang ryalaw nee athua hae paw hynh nynh mih piccan hae raveih thyhte rya a hoibua hae;

¹³mih sakoih hanlan milu alung azya ci um leite, phe lokuh lante mih puizia hae raveihte ccungthy a dung hae.

¹⁴Nithua lang e sakoih hanlan ccungthydungte a muepaw tuh Shelemiah nynh thua, a ccapaw Zekhariah, ahawpaw tuanaw pyatu hanlan ccungthydung hae zah thahlang sakoih hanlan a mue.

¹⁵Obed-edom tuh ccungthydung zah alia lang e sakoih hanlan mue zah a ccapaw hae tuh sisuainn do-oihtu lang a mue hae.

¹⁶Shuppim te Hosah tuh niccaw lang e sakoih hanlan a mue hae, tuh-e tuh akaethungpaw laanpi kya umpaw Shallekheth sakoih kya nynh a um. Phe lokuh lante a ngaw hae.

¹⁷Nin takyhte nithua langkhe lu taruh tyty a um hae, thahlang khe nin takyhte lu pali tyty um hae zah alia langkhe nin takyhte lu pali tyty a um hae, te sisuainn kya ccyh kheit ze, lu ning ccite a um hae;

¹⁸niccaw lang umpaw inn taraw elang kha laanpi kya lu pali te inn taraw kya lu ning a um hae.

¹⁹E hae tuh Korah ccaawno hae te Merari ccaawno hae kya-e sakoih ngawtu hae aphuphute ryalaw neenaw nynh thua.

²⁰Levi phin hae lungkhu e, Ahijah nynh Pachia inn kya-e sisua hae te pyapaw lasung hae kha a ngaw.

²¹Ladan ccapaw hae, Ladan te asekuhpaw Gershon ciihan hae kya-e ccapaw hae, Gershon ciihan athuapaw Ladan te asekuhpaw puizia hae kya-e lu tuh Jehieli.

²²Jehieli ccapaw Zetham te a unopaw Joel tuh BAWIPAW inn e sisua hae kha a do-oihtu hae nynh thua.

²³Amram ciihan hae, Izhar ciihan hae, Hebron ciihan hae te Uzziel ciihan hae kha mah ryalaw neebua athua hae:

²⁴Moses ccapaw Gershom a ccapaw Shebuel tuh sisua hae do-oihnaw kyaze ale huapaw bawi nynh thua.

²⁵A uno hae tuh: Gershom a neitaw Eliezer, Eliezer ccapaw Rehabiah, Rehabiah ccapaw Jeshaiah, Jeshaiah ccapaw Joram, Joram ccapaw Zikhri, Zikhri ccapaw Shelomoth.

²⁶Shelomoth te a uno hae tuh David siapharan, mih puizia hae raveih kya-e lu hae, ccungccaw athong uktu hae te ccungccaw aza uktu bawi hae te rhawkawphu kya-e rhawbawi hae nynh a hlu hae paw lasung hae, sisua hae balyn kha a do-oihtu hae nynh thua.

²⁷Minmin nynh rhawtuknaw kya-e a luade hae paw uccaw hae kha BAWIPAW inn do-oihnaw hanlan a hlu hae.

²⁸Profeh Samuel, Kish ccapaw Saul, Ner ccapaw Abner te Zeruiah ccapaw Joab nynh a hlu hae paw uccaw miakaw—a pya hae paw lasung balyn kha Shelomoth te a neitaw hae nynh a do-oih hae.

²⁹Izhar ciihan hae lungkhu e, Khenaniah te a ccapaw hae tuh Israel hae hanlan atolang e ryalaw kya bawi hae te byapiatu hae lang nung athua hae.

³⁰Hebron ciihan hae lungkhu e, Hashabiah te a uno hae, rya phe lah kho hae paw ccungccaw thong kheit za sari nynh Israel ram lungkhu Jordan niccaw lang kyakhe BAWIPAW rya balyn te siapharan rya balyn kha a law hae.

³¹Hebron ciihan hae lungkhu e Jerijah tuh Hebron ciihan hae lupi nynh thua. (David nynh siapharan lang a tangnaw kum sung palinaw kum khe tuh-e ciihan hae kha ccung hae zah Gilead ram Jazer khua khe minmin laku e myarya ryalah kho hae paw kha a muih hae.)

³²Jerijah te a uno hae, rya phe lah kho hae paw, mih puizia hae raveih kya lu athua hae paw thong ning za sari kha Reuben phin hae, Gad phin hae te Manasseh phin angankuh kha a uktu lang David siapharan nynh nung hae zah, minmin nynh Pachia rya te siapharan rya aphuinphuin kha a law hae.