Read Zotung Chin 1 SHERIANAW 5 Bible Online

1 SHERIANAW 5 - Zotung Chin bible

1 SHERIANAW 5

¹Israel a ccatawccaw Reuben ccapaw hae (aning tuh ccatawccaw athua zemah a paaw ikhung kha a thusah keiccuze ccatawccaw thuanaw kha Israel ccapaw Josef a ccapaw hae kha pya athua, tukeiccuze sherianaw ccazing kya aning kha ccatawccaw a thuanaw thyhte zei thua khyh.

²Judah tuh a uno hae lakuze athungpaw ccungccaw thua zah amaw kyate uktu bawi a langku zemah, ccatawccaw thuanaw kha tuh Josef kya-e nynh thua.)

³Israel a ccatawccaw Reuben ccapaw hae tuh: Hanok, Pallu, Hezron te Karmi.

⁴Joel ccapaw hae tuh: Joel ccapaw Shemaiah, Shemaiah ccapaw Gog, Gog ccapaw Shimei,

⁵Shimei ccapaw Mikah, Mikah ccapaw Reaiah, Reaiah ccapaw Baal,

⁶Baal ccapaw tuh Assiria siapharan Tilgath-pilneser nynh kyng zah a cciakhaepaw Beerah nynh thua; aning tuh Reuben phin cciakhaetu lupi nynh thua.

⁷Te a puizia hae tuh mih innbyn raveih thyhte, mih she raveih sherianaw kha hynhte zei athua: lupi hae, Jeiel te Zekhariah,

⁸Azaz ccapaw Bela, Azaz tuh shema ccapaw, Shema tuh Joel ccapaw nynh thua, minmin tuh Aroer khua kyate Nebo te Baal-meon khua kyacia a um hae.

⁹Nithua lang Zufrates vaw hynhlang raw laesia ram athotakawnaw kyacia a um hae, pawccecize Gilead ram kya mih sahiin hae tuh myarya a pungthung.

¹⁰Saul she lyakhe Hagrit ccungccaw hae kha dou hae zah tuh-e hae tuh mih kuih te a chia hae; te Gilead ram nithua lang e ram hae balyn kyakhe mih bu hae kya khua a sah hae.

¹¹Gad ccapaw hae tuh Bashan ram lungkhu Salekah khua kyacia, Reuben phin hae pe khe a um hae:

¹²Joel tuh lupi thua zah Shafam tuh lu ningnaw nynh thua, te Bashan ram kya Janai te Shafat tuh lupi nynh thua hae.

¹³Mih phin thyhte mih puizia hae tuh: Mikhael, Meshullam, Sheba, Jorai, Jakan, Zia te Eber, lu sari acih hae.

¹⁴E hae tuh Abihail ccapaw hae nynh thua; Abihail tuh Huri ccapaw, Huri tuh Jaroah ccapaw, Jaroah tuh Gilead ccapaw, Gilead tuh Mikhael ccapaw, Mikhael tuh Jeshishai ccapaw, Jeshishai tuh Jahdo ccapaw, Jahdo tuh Buz ccapaw;

¹⁵Guni ccapaw Abdiel a ccapaw Ahi tuh mimaw phin kya lupi nynh thua;

¹⁶minmin tuh Gilead ram te Bashan ram e khua hae kya te Sharon ram kya sahiin rampaeekunaw hmin hae balyn kyakhe mih ramri thyhte a um hae.

¹⁷E hae balyn hynh Judah siapharan Jotham te Israel siapharan Jeroboam she lyakhe mih thokeinaw thyhte ccazing kya nung athua hae.

¹⁸Reuben phin hae, Gad phin hae te Manasseh phin angankuh hae kyakhe khawriaphua te thaloi ccyngkuh hae zah li kawthyapaw te rhawtuk thyapaw athungpaw rhawkaw hae, rhawtuk lan paccynkute a um hae paw sung pali thong pali za sari sung taruh a um hae.

¹⁹Minmin nynh Hagrit hae, Jetur hae, Nafish hae te Nodad hae kha rhaw a tuk hae;

²⁰minmin nynh bawmnaw he a mue hae te, Hagrit hae te minmin kya um hae paw balyn kha mih kuih kalan pya athua hae, pawccecize rhawtuknaw kyakhe Pachia kha ko hae zah amaw kha a doliaku hae keiccuze a ngia hae paw kha a pya hae.

²¹Minmin nynh mih sahiin hae kha a cciakhaepya hae: mih kalauh thong sung pangaw, tuu cciing ning thong sung pangaw, lann thong ning te ccungccaw cciing kheit kha kyngte a cciakhae hae.

²²Rhawtuknaw tuh Pachia kya-e athua keiccuze rhaw hae kha patae a chia hae. Te see lang cciakhae athua mawlaezung hae, tuin ram kya a um hae.

²³Manasseh phin angankuh tuh tuin ram kya a um hae; Bashan kyate Baal-hermon, Senir te Hermon Mua kyacia myarya alung hae.

²⁴E hae tuh mih phin raveih kya-e lupi hae nynh thua: Efer, Ishi, Eliel, Azriel, Jeremiah, Hodaviah te Jahdiel, athungpaw rhawkaw hae, mih minthaan hae paw te mih phin kya-e lupi hae raveih nynh thua.

²⁵Thuasalama mih minpaaw hae Pachia tungvaw sei hae zah, mih muihnaw kya Pachia nynh a ropaw ram kya-e ccungccaw hae pachia hae kyakhe a ohhuaku hae.

²⁶Tukeiccuze Israel Pachia nynh Assiria siapharan Pul thinlung te Tilgath-pilneser thinlung kha tuhou hae zah, tuh-e hae nynh Reuben phin hae, Gad phin hae te Manasseh phin angankuh hae kha a cciakhae hae, Halah, Habor, Hara te Gozan vaw kalan cciakhae hae zah atunin cia a um hae.