Read Zotung Chin 2 SHERIANAW 1 Bible Online

2 SHERIANAW 1 - Zotung Chin bible

2 SHERIANAW 1

¹David ccapaw Solomon tuh a peenaw lungkhu kya tynkaring lan a um; BAWIPAW a Pachia tuh a kya um zah amaw kha myarya a lesaepaw lang a rae.

²Solomon nynh Israel hae balyn, ccungccaw athong uktu te aza uktu rhawbawi hae, byapiatu hae, Israel hae balyn kya-e cciakhaetu balyn, puizia raveih kya-e lu hae kha a ko hae.

³Solomon te a kya pumkuh hae paw balyn tuh Gibeon kya umpaw ahangpaw hmin langkhe a cceih hae; pawccecize BAWIPAW ryalahtu Moses nynh ramkaw kya a sakpaw Pachia kya-e tungkunaw bu tuh tuin kya a um.

⁴(Thuasalama Pachia thingkua kha tuh David nynh a paccynpyanaw hmin, Jerusalem kya a sakpyapaw bu kalan khe David nynh Kiriath-jearim kyate phe a cciakhae vae.)

⁵Tuhpiaze Hur ccapaw Uri a ccapaw Bezalel nynh a raepaw sohin silawhang tuh BAWIPAW beikbu malang khe a um. Tukeiccuze Solomon te ccungccaw zapi hae nynh tuh-e silawhang kyakhe BAWIPAW kha a beik hae.

⁶Tungkunaw bu kya, BAWIPAW malang umpaw sohin silawhang kalan khe Solomon nynh cceihthung zah, tuh-e silawhang vawlan khe maee-ute silawnaw thong kheit kha a rae.

⁷Tuh-e khuazi khe Pachia tuh Solomon kalan yn langkuh zah, “Pawmou kae pya cih, yn ngiakuh,” a cipya.

⁸Solomon nynh Pachia kha, “Ka paaw David kya myarya lepaw te atynpaw sungsahnaw kha na langsakuh zah, amaw ccelang kae hynh siapharan lang nae khang vae.

⁹Pou BAWIPAW Pachia, ka paaw David kya bya na kinpyakupaw kha atu beih ccingsah tua, pawccecize kae hynh laenoi zeih alungpaw ccungccaw hae kya siapharan lang nae khang vae.

¹⁰Kae nynh e ccungccaw hae malang ka pou ka tee kho nawlan hawnaw te nynaw kha beih yn pya, pawccecize myarya lungpaw hynh-e na ccungccaw hae hynh hum nynh mou a uk kho cih hae?” a cipya.

¹¹Pachia nynh Solomon kha, “E hynh na thinlung kya um zah, nang nynh hoirumnaw, sisua te sawtuanaw kha thuasah, na rhaw hae hiinnaw kha thuasah, hiinshe saenaw kha heize thuasah ngiaku leite, siapharan lang kae nungnaw ka ccungccaw hae uk kho nawlan, namaw hanlan hawnaw te nynaw kha nae ngiaku keiccuze,

¹²hawnaw te nynaw kha kae pya. Nang na mawze a la um vae hae paw siapharan hae te nang koute a um cih hae paw siapharan hae lu kheit nynh san a hoi boi lei hae paw hoirumnaw, sisua te sawtuanaw kha mah kae pya cih,” a cipya.

¹³Tukeiccuze Solomon tuh Gibeon kya umpaw ahangpaw hmin kya umpaw, tungkunaw bu kyate Jerusalem lang a cceih. Te Israel ram kha a uk.

¹⁴Solomon nynh marangle hae te marang rhawkaw hae kha a pum hae; aning nynh marangle thong kheit za pali te marang rhawkaw thong haw lae ning kha hoi zah, tuh-e hae tuh marangle khua hae kya te Jerusalem khua siapharan kyakhe a nung hae.

¹⁵Siapharan nynh Jerusalem khua khe sui te ngun kha lungpyng zeih lungsah zah, sidar thing kha Shefelah kya umpaw thaeku ku zeih a lungsah.

¹⁶Solomon kya-e marang hae tuh Izip te Kue langte teekhaepaw nynh thua; siapharan a kungkutu hae nynh amee pyate Kue kya-e kha a re hae.

¹⁷Izip ram kya-e marangle ccangkheit kha ngun shekel za taruh te, marang sa kheit kha za kheit sung pangaw te a re hae; tuhcite Hit siapharan hae te Siria siapharan hae balyn kalan khe a zua pathy hae.