Read Zotung Chin 2 SHERIANAW 11 Bible Online

2 SHERIANAW 11 - Zotung Chin bible

2 SHERIANAW 11

¹Rehoboam nynh Jerusalem khua he a thua te, Israel hae kha tuk lan zah peenaw kha Rehoboam kuih kalan pyathui khylan, Judah phin te Benjamin phin kya-e popaw rhawkaw cciing kheit thong sung tarya kha a pum hae.

²Thuasalama BAWIPAW bya tuh Pachia ccungccapaw Shemaiah kalan yn thua zah:

³Solomon ccapaw, Judah siapharan Rehoboam te Judah ram te Benjamin ram umpaw Israel balyn kyakhe,

⁴“BAWIPAW nynh hynhte a ho: Nae uno hae kha tuk lan ccianua nan oh. Nae balynte nae inn lang ki oh, pawccecize e hynh kamaw kyate yn thuapaw nynh thua, a ci cite hopah hae,” a cipya. Tukeiccuze minmin nynh BAWIPAW bya kha ngae hae zah Jeroboam kha tuk leite a kitaw hae.

⁵Rehoboam tuh Jerusalem kya um zah, thungkhawkunaw hanlan Judah ram kya khua hae kha a rae hae.

⁶Bethlehem, Etam, Tekoa,

⁷Beth-zur, Soko, Adullam,

⁸Gath, Mareshah, Zif,

⁹Adoraim, Lakhish, Azekah,

¹⁰Zorah, Aijalon te Hebron khua kha a rae hae, e hae tuh Judah ram te Benjamin ram e lungrua te akoihkuhpaw khua hae nynh thua.

¹¹Rhawlungrua hae kha phe tyn lan rae zah rhawbawi hae kha a nung hae, te looh, chitui te misutui kha a ccakhung hae.

¹²Khua takyh kya khawriaphua hae te ccoi hae kha nung zah khua hae kha myarya tyn lan a rae. Tuhcite Judah ram te Benjamin ram kha a uk.

¹³Israel ram balyn kya um hae paw ranpibawi hae te Levi hae nynh mih umnaw miakaw kyate amaw kalan a pan hae.

¹⁴Levi phin hae nynh a hoi hae paw ram hae te mih hoirumnaw kha cciataw hae zah Judah ram te Jerusalem khua lang a cceih hae, pawccecize Jeroboam te a ccapaw hae nynh minmin kha BAWIPAW ranpibawi hae ryalaw lanpaw kha khee hae zah,

¹⁵ahangpaw hmin hae, miaa-khozi hanlan te amaw nynh a raekupaw vaetuataw hae hanlan amaw a ranpibawi hae kha a khang hae.

¹⁶BAWIPAW , Israel Pachia kha ccung khylan mih thinlung te a ry ccaccing hae paw nynh tuh Israel phin hae balyn kyate pou hae zah BAWIPAW , mih minpaaw hae Pachia kalan silawnaw rae khylan Levi phin hae kha a zui hae.

¹⁷Minmin nynh Judah peenaw kha tynsah hae zah Solomon ccapaw Rehoboam kha kum thum lungkhu a khynsah hae, pawccecize minmin nynh kum thum lungkhu David te Solomon laanpi kha a zui hae.

¹⁸Rehoboam nynh Mahalath kha zu lang a hoi, Mahalath a paaw tuh David ccapaw Jerimoth thua zah a nung tuh Jesse ccapaw Eliab a ccanung Abihail nynh thua.

¹⁹Aning nynh a saahpyapaw ccapaw hae tuh: Jeush, Shemariah te Zaham.

²⁰Tukoute Absalom ccanung Maakah kha zu lang hoi zah Abijah, Attai, Ziza te Shelomith kha a saah hae.

²¹Rehoboam nynh Absalom ccanung Maakah kha ccangpaw a zu hae te a lovaenung hae balyn laeze a sungsahua (zupi lu haw lae tarya te lovae sung taruh hoi zah, ccapaw lu kuin lae tarya te ccanung sung taruh a saah hae).

²²Rehoboam nynh Maakah ccapaw Abijah kha siapharan lang a paccyn keiccuze a uno hae kyaze bawi lepaw lan a nung.

²³Hawrarih lante ryalah zah, Judah ram te Benjamin ram kya a umpaw akoihkuhpaw khua hae miakaw kyakhe a ccapaw hae abang kha pong pazaekuh lan a nung hae; aepaw niapaw looh patae pya hae zah, zu patae a dypya hae.